فرحتي مش محتاجة سمَّاعة

ميلاد ثابت إسكندر
(Melad Thabet Eskander)

الحوار المتمدن-العدد: 6471 - 2020 / 1 / 23 - 20:14
المحور: الادب والفن
    

اسـمـع بـقـي يا ابني أنت وهوَّ
طـرطـق ودنـك للــي هـقـوله
أيـوَّه هـتـسـمــع ، لـو بالـقـوَّة
ده كلام ليك بس علي أصولُه

المــوضوع وباخـتـصــار
علشان ما أطوَّلش عليك
أفراحنا بقت خزي وعار
وده واضح جـداً لـعـنيك

ده زمان قالوا فـي الأمثال
العــروســـــة للـعـــــريـس
لكن الحال بقي غير الحال
تقاليع بايخة وناس بتهيص

كـذا سـماعــة ترُج الشــارع
اسمها أيه لامؤاخـذة دي جي
والمـطــرب شـارب أو بالـع
مش مزيكة دي خناقة يا بيه

والكـارثـة إن الناس مُـنشَكحة
نازلين رقـص غـريب الشـكل
دي أغانـي من الأخـر وقـحـة
الـذوق مـات ،،، وإتاكل أكل

خبط ورزع ودَوشــة غريبـة
وشباب مَرسومة واستظراف
إللـي بيحصـل أكـبـر عـيـبَـة
أخلاقـنا بقـت خِـلـف خـلاف

والنـعـمـة وبـيـلـفـوا سجاير
محشـيـة حاجات مش ولابُد
ده غير البانجو سـارح داير
وحـاجـات بتـفـرقـع بتخض

وحبال من نور وصوانـي بتدور
مـولـد مـنـصوب تـحـت الـبـيـت
والشــــاي والســــاقـــع بالـدور
ومـهـازل يـامـا ،،، وحــواديـت

ومافـيـش تقـدير لظـروف الناس
لازم الحـنــة تـسّـمَّـع مـوســكـو
مـات جـوانا ،،، معني الاحساس
حـنـة أيـه !! يا اخـوانا إتـوكسـو

تقاليد وعادات ، أنا برصدها
فشخـرة ومـظـاهـر خـداعـة
وأنا أول واحـد برفـضهــــا
فرحتي مش محتاجة سمَّاعة
**************
فنان تشكيلي
وأشكيلك
!!!

#ميلاد_ثابت_إسكندر (هاشتاغ)       Melad_Thabet_Eskander#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل