عم عبدالرحيم

عبير سويكت

الحوار المتمدن-العدد: 7633 - 2023 / 6 / 5 - 00:10
المحور: الادب والفن
    

عبير المجمر(سويكت)

بعد مرور قرابة العام فى احد معاقل اليسار لضرورة المهنة مما أتاح لى كأنسانة مستقلة الفكر و التوجه
فرصة التعمق فى فهم أدبيات اليسار فأصبح الآن فى إمكانى الاستماع لرائعة الفنان الإنسان اليسارى الفكر مصطفى سيد احمد (عم عبدالرحيم) بمفهوم أكثر عمقًا.

فتّاح يا عليم
رزّاق يا كريم
صلى على عجل
همهم همهمة
حصّن للعباد .. وهوزز سبحتو
دنقر للتراب .. هم فوق هم همى
صنقع للسما
وكان فى الجو فى غيم
وكم نجمات بُعاد
وكان الدنيى صيف
ﻻ قالتلوا كيف
.. كيف أصبحت .. كيف
ﻻ لمسة وداد
ﻻ لمسة حنان
ﻻ رمشة طِريف
من قلباً وفى
زى أيام زمان .. أيام الدِفِى
كانت ماها فِى .. كانت فى المراح
شدَّتلو الحمار ..
تحلب في الغنم لى شاى الصباح والطير ما نضم .. ما رسـّل نغم.


عم عبدالرحيم
إتوكـّل نزل .. فى المُشرَع لِقَى
زُمﻼن الشقا
الجا من الجريف .. الجا من الجبل
علْ الناس بخير
صبّح هاظرُمْ .. نقْنقْ ناقَرُمْ
غاظوهو .. ونعَل
وعم عبدالرحيم ما بخَبِر زعل
كل الناس هنا ما بتخبِر زعل
تزعل فى شِنو .. وتزعل من منو ..
كل الناس هِنا .. كل الناس صِحَابْ .. كل الناس أهَل
والماهُم قُرَاب .. قرّبـُمْ العمل
الطاق اليَطُقْ .. عشتْ .. آ .. أبوالزَمَل
بى الحال العليك .. بى الفال .. بى اﻷمل.

عم عبدالرحيم ..
كُتْ فﻼح فى يوم
فى إيدك تنوم .. على كيفك تقوم
ﻻ دفتر حضور .. ﻻ حصة فطور
تزرع بالقمر .. تقرع بالنجوم
لكن الزمن .. دوّار .. آ .. بِدُوم.

عم عبدالرحيم ..
ماشى على الشغل
فى البال القديم .. من عار التُكل
تنشايح جِراح
يــا ......
.. كيف الغُسُل
والدِنيِى أم صﻼح تبدا من التُكُل
من حِجـّة صباح .. فى حق المُﻼح
فى الغُبُن الجديد .. فى القسط القديم
وبيناتِن عشم ..
فى الفرج القريب.

أمونة الصباح ..
قالتْلُو النـِّعال والطِرقى .. إنَهَرَنْ
ما قالتْلُو جِيب
.. شيلِن يا الحبيب غشّهِن النُقُلْتـِى والترزى القريب
بس يا ام الحسن ..
طقّهِن .. آ .. بِفيد .. طقّهِن .. آ .. بزيد
إنطقّن زمن
وإن طقّ الزمن .. ﻻزمِك توب جديد
بى أيـّاً تمَن
غصباً لى الظروف .. والحال الحَرَنْ
شان يا أم الرحوم .. ما تنكسفى يوم
لو جاراتن جَنْ .. مارقات لى صُفاح
أو بيريك نجاح
ده الواجب .. إذن
وأيه الدِنيِى غير .. لمّة ناس فى خير
أو ساعة حُزُن.

عبد الرحيم يا حُر
ماكا حُر
يا ريت التمر ..
ياريت لو يشيل كلِّ تَﻼتْ* أشـُرْ
وﻻّ أيام زمان كانت ما تمُر
كان ماجاك هوان .. ما ﻻقاكى ضـُر
كان ﻻ ضِيق يضيق
ﻻ أنغرغَرْ صبر
ﻻ شابيت غريق .. وﻻ طلوَحْ فقُر
كان ماكان .. وكان أكسيكي دُر.

حيكومات تجى
وحيكومات تغور
تحكم بى الحِجِى .. بى الدجل الكِجُور
مرّة العسكرى .. كسـّار الجِبُور
ويوم بإسم النبى .. تحكمك القبور
تعرف يا صبي مره تلف تدور
وللا تقول بري أو تحرق بخور
هِم يا الفنجرى .. يا الجرف الصبور
كل السقتو مات ، باقى على التِمور
وأرضك راقدِى بور
ﻻ تيراب وصل .. ﻻ بابور يدور
والماهية أُفْ
عيشة هاك .. وكُف
فى هذا الزمن .. تـُف يادنيا .. تـُف.

يا العَبِد الشقى
ما أتعوّدْ شكى
لكن الكفاف فوقك .. منتكى
والسوق فيك يسوق
حالك ما بتسـُر
إِلِّى كمان فى ناس فايتاك بى الصبُر
ساكنين بى اﻹيجار .. ﻻ طين .. ﻻ تمُر
وواحدين بى اﻹيجار .. ما ﻻقين جُحُر
سِلعـتُمْ الضُراع .. والعرق اليخُر
عمال المدن
كﻼّت الموانى
الغُبُش التعانى
بحّارة السُفُن
حشّاشة القصوب
لقاطّة القطن
الجالبة الحبال
الفِطن الفُرُن
الشغﻼنتو نار
والجو كيف سُخُن
عيشُنْ كمّهو .. وديشُن هان قَدُر
فرقاً شتى بين
ناساً عيشا دين
مجروره وتجر
تقدح بالأجر ومره بلا أجر ،
وناساً حاﻻ زين
مصنع .. مصنعين
طين فى طين .. ووين
ما مرابا مُر .. بارد همها
ﻻ يعرق جبين .. وﻻ وشاً يصُر
عين والله .. عين
كلها كمها .. وهمها هان قدُر
فى الجنة أم نعيم .. فى الجنة أم قُصُر
يا عبد الرحيم إلِّىِ ورا القبُر ؟.

ويلكد فى النعال
فتاح يا عليم
وإن كان الفقر يا عبدالرحيم
أشبه بى الكُفُر
ونقرط للحمار
نقريط الحمار .. ﻻتنسى النِعال
الطِرقِى الخدار
اللِّبِس الجديد
تسريح السفر .. لى الماشى الصّعيد.

ماشى الدّيش .. نَفَر
والبال إشتغَل
بى الأبى ما يعِيد .. الحول ما أشتغل
الغُبُن الشديد .. السابا ورحَل
الضيق .. المحَل
والفرج القريب
الجا .. وما وصَل
زى الحال ده يوم .. لا كان .. لا حصَل
والبال إشتعَل
السكة الحديد .. يا عمو القَطَر
يا عبدالرحيم قِدّامك قطر
...........
وسال الدم .. مطر
وطارت دمعتين .. وإنشايح وتر
يا طاحن الخبر
ما بين القضا .. ومَرْحاكة القدر
الشِّهدوا الدموم .. والدمع الهَدَر
إيدُمْ فى التُراب .. والعين فى القطر
عارفين الحصل
عارفين فى حذر
الخبر ليقين .. بوّخ .. وإنتشر
أطفال القرى .. وعمال الحضَر
أدوهو الطيور .. ودَّوا البحر
إنصاعت سحاب
وإنْدافَقْ مطر
عم عبد الرحيم .. فى الشارع عَصر
لى تالا اليسار
متفادى الكَجر .. دورية الكجر
جفّلت الحُمار .. وطلوَح زى حجر
وعم عبد الرحيم .. إتلافا القطر
فتاح يا عليم .. سال الدم مطر
جرتق لى التُراب
منشور بى كتاب
روشتّة .. وجواب
مفتاح أب قُراب .. أورنيقين سَهَر
جنب لِبدة حُمار
مقطوعين ضَهر
... عم عبد الرحيم ..يا كمِّين بشر
صحِّى الموت سلام
ما يغشاك شر …

#عبير_سويكت (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل