كَوّام الخضر وكَوّام العراق...

موسى فرج

الحوار المتمدن-العدد: 7104 - 2021 / 12 / 12 - 22:58
المحور: كتابات ساخرة
    

أمس أجوني شباب أثنين... ها عمي تفضلوا...كَالوا دزنا أبو حسين يكَول عندك حديقه تريد تنظفها وتنظمها واحنا على باب الله...أهلا وسهلاً بيكم وبأبو حسين أنتم منين عمي...؟كَالوا من الخضر...من الخضر من الخضر ما غيره...؟ كَالوا نعم كَلتلهم الخضر النشف أرياكَ النبي موسى...؟ كَالوا شلون نشف أرياكَه كَلتلهم أي تورط النبي موسى راح سفره بحريه ويا الخضر وطبعا مو بس وحدهم بالسفينه وياهم وادم، بنص البحر كَام الخضر زرف السفينه كَال له النبي موسى اشسويت مو راح تغركَ الوادم البيها كَال له " ألم أقل لك إنك لا تستطيع معي صبرا" كَال له النبي موسى بطّلت بعد ما أعترض...من نزلوا شاف طفل يلعب كَام كتله للطفل شاغت روح النبي موسى وكَال له ليش عمي كتلت نفس بريئه من دون حق...؟ كَال له مو كلتلك "إنك لا تستطيع معي صبرا..." كَال له التوبه اذا أحچي بعد ...يمشون بالشارع شافوا حايط الخضر كَام وكَعه للحايط كَال له النبي موسى ليش عمي تعتدي على المال العام ...؟ كَال له أشكَلنا مو كَتلك إنك لا تستطيع معي صبرا...؟ كَال له يا چلمه ردي لمكانچ روح بفالك عمي بطلنا...ويعبرها وياه كلما يعترض يكَله هاه مو كَتلك إنك لا تستطيع معي صبرا...وبعدين عافه وما قبل يمشي وياه وكَال له "هذا فراق بيني وبينك" كَال له ليش ...؟ كَال له لأن كل السويته بيه حكمه وانت تعترض عليه... السفينه من غركَتها بوادمها لأن أدري أكو أعداء جايين بالبحر وياخذون السفينه ، والطفل من كتلته لأن أدري من يكبر راح يأذي أهله ، والحايط من وكَعته لأن أدري تحته كنز واحد تاركه لأبنائه اليتامى وما يندلوه اذا ما أوكَع الحايط ...كَال له النبي موسى چا اذا عدك هيچي قدره وتحكم بالأشياء ما رفعت السفينه فوكَ السحاب وما يوصلوها الأعداء أو على الأقل تحرف رويس السفينه ويتيهوهه الأعداء...؟ والطفل اللي يأذي أهله ما أصلحته يالعبد الصالح چا أنت مو من دعاة الإصلاح...؟ والكنز التحت الحايط ما دام تعرف مكانه ليش ما بحشت تحته وتطلعه وتسلمه للأيتام ...؟ صدكَ ما عندك سالفه وچماله تكمم الأفواه ...مثل ربعكم هسا... تكَلّه كهرباء ماكو يكَلّك موكَلنالك إنك لا تستطيع معي صبرا...؟ عمي الدوا مغشوش وغالي والبطاله صاعده لبو موزه والدينار صار بنص قيمه والفقر بالسماوه والخضر 54% يكَلك الفقير بالدنيا غني بالآخره بس انت ما عندك غيره على المذهب ويوميه جاي أكَلك يطلع المهدي ويعدل الأمور بس انت عجول ولن تستطيع معي صبرا...شفتوا يهل الخضر....
هسا بالله عوفونا من الخضر ردت اسألكم على كَوّامه تعرفون كَوّام الخضر...؟ كَالوا نعم ...كَلتلهم أحچيلكم شغله على كَوّام الخضر...طبعاً الكَوّام جمع كَيم وجايه من قيّم على الضريح يستلم الوارد من نذور وهدايا ويصرف على متطلبات الضريح أو المقام...بعدنا بأول أسبوع بعد سقوط نظام صدام عام 2003 وهبة الفرهود خفّت وبدأت شغلة الثارات وهاي تتراوح بين القتل غيله وبين التقارير وبين الشكاوى، آنا چنت بمثابة الرجل الثاني في ادارة المحافظه وقت ذاك، أكو الحاكم الإداري وانا المستشار الاداري، الحاكم الاداري عينوه الامريكان وانا عيني الحاكم الاداري وطبعاً بلّوشي بدون راتب ،دوائر الحكومه معظمها معزله وانا بالطابق الثاني بالبنايه دخل عليَّ رجل كبير بالسن وينفت فحطان من صعدة الدرج بادرته بالترحيب قائلاً: أهلاً بك في العراق الديمقراطي ...كَال ان شاء الله... تفضل معالي المواطن كَال: أحنا چنا عائلتين كَوّام بالخضر وبيننا اتفاقيات مصدقه بالمحاكم من زمان "وبالفعل شوفني أوراق عليها طابع فيصل الثاني ملك العراق قبل عام 1958" وأردف قائلاً الاتفاقيات تنص على المناصفه بين عائلتنا والعائلة الأخرى بالوارد بس بوكت البعثيين العائله الثانيه صاروا بعثيين واستأثروا بكل الوارد وطردونا لا نحصل من النذور ولا من الواردات الأخرى وهسا مادام حكم البعث ولّى نريد حقوقنا كامله وفلس واحد ما نتنازل عنه وتحبسون شركانَّا الظلّام... وهذا العندي...
كَلتله شرايكم تنحبسون اثنينكم انتم وشركانكم ...؟ كَال شلوّن...؟ كَلتله انت عندك بيت ملك ...؟ كَال نعم، عندك أولاد ...؟ كَال نعم ، يصير أولادك يستارثون بيتك وانت عدل ...؟ كَال لا بالشرع ولا بالقانون يستارثوني وانا حي...
كَلتله چا الخضر حي لو ميت...؟ أخذله صفنه بوجهي بعدين ضحك وكَال لا الخضر حي ...كَلتله چا شلون تستارثون الرجال وهوه حي ...؟ الرجل حط علاكَة الأوراق على صفحه وضحك من خاطره ...
بعدين رفع راسه وعيونه أتدمع كَال والحل...؟ كَلتله تزوعون كل النذور الماخذيهن والفلوس وتنحسب عليكم فوائد بنسبة 8% واذا ما دفعتوا تنحبسون ...كَال والقرارات الصادره من المحاكم لصالحنا ...؟ كَلتله مو ما چانت بالدستور فقره تكَول كلشي يتعارض مع الشريعه الاسلاميه اضربوه بالحائط ومناه وهيچي لو تجيبلي فتوى من المرجعيه تكَول الخضر ميت بعقيدتنا لو فتوى تجيز تقاسم الإرث من قبل الورثه وابوهم عدل...كَال ماكو حل مناه مناه وانا جايك عناي من الخضر...؟ كَلتله تروح لربعك وتتصافون بالتراضي ولا تتصعب وياهم ترى عاقبتها عليكم أثنينكم مو زينه... ودعني وطلع والخيبه باديه على وجهه لأن كان يتوقع تروح وياه مفرزة شرطه بس رغم الخيبه كانت الضحكه تغالبه لأن ما محسب شغلة الخضر الحي...
هسا كَولولي الكَوّام بالخضر بعدهم عائله وحده لو صاروا عائلتين...؟ ضحكوا الشباب ، ما يضحككم ايها الشابان الخضريان ...؟ كَالوا ياعائله يا عائلتين ...؟ استاد صاروا كَوّام الخضر كل اسبوع تستلمها مجموعة عوائل تاخذ النذور وتكمكش الدخل...صدكَ تحچون ...؟! لا ياهفين البخت شادّين على الخضر اسبوعياً...؟ كَالوا چا بس الخضر شادّين عليه روح شوف العراق شمسويه بيه الكَوّام...؟؟؟

#موسى_فرج (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل