الإرهاب

محمد قاسم علي
كاتب و رسام
(“syd A. Dilbat”)

الحوار المتمدن-العدد: 6990 - 2021 / 8 / 16 - 22:45
المحور: الارهاب, الحرب والسلام
    

هذا ما جنيناه من الأنظمة القمعية القذرة والى هذا المنعطف أودت بنا الأحزاب الإسلامية.

الناجي من الموت بدافع الكراهية و الحقد
الناجي من مجزرة سبايكر علي حسين يتحدث
"حقيقة أنا الناجي من مجزرة سبايكر ، هنالك فرق بين الناجي من سبايكر و الناجي من المجزرة ، سبايكر كعموم هنالك الكثير من الناجين لكن آني من من المجزرة اللي أطلقوا عليهم النار و بقوا بين الجثث. حقيقة راح أتكلم قليل من قصتي لأن ما أريد أطيل عليكم بالوقت ، آني سجلت بمعسكر سبايكر في تاريخ 18|5- 2014 طلع إسمي رحت داومت هناك ، نزلونة للبيت رجعد بعد يوم 1|6 بقيت دوام و بشكل طبيعي 12 يوم حقيقة بالمعسكر ، يوم 9|6 أكو ضباط ما نشوفهم جانو عدنة سابقين ، ما جنة نشوفهم بعد يوم 11|6 بدة الوضع يتدهور عدنا لا بقة عدنة أكل حقيقة ، فتعرف مدرسة ويتركها المعلمين و المدرسين مالتها ، ويبقى الطلاب فبقينة أحنة بدون قادة أو بدون شي فصارت فوضى عارمة يعني بالمعسكر ، فيوم 11|6 بالليل حوالي الساعة 12 بالليل أجونة عمليات صلاح الدين ، اللي هسة هم يطلقون عليهم مجزرة سبايكر 1700 هذولة هم عمليات صلاح الدين 1700 هذولة بالليل أجوي هاربين من أماكنهم الى معسكر سبايكر لأن كان محصن جداً ، فبقوا ويانة الى حد الصبح ماكو شي عبالنة هذولة أجوي دعم و قوة النة ، يوم 16|6 الصبح آني جنت ناي مبرة ماكو مكان يبقى يتسع النة فنمنا برة وية الجنود ، فكعدت الصبح شفت هاي الجنود تطلع كلتلهم شكو أخوان خو ماكو شي كالوا أنطونة أجازة ، والحقيقة آني ما سمعت أي أحد ما أريد يعني آني الله سبحانه و تعالى نجاني آني أجيت هنا ما كاتب قصتي على ورقة لأن المر بيه ما ممكن أنساه مستحيل فأكون شاهد حي على هاي المجزرة و أنقل بصدق يشهد الله و رسوله. كلتلهم شنو أنتوا وين تردون ؟ كالوا أنطونة نزول ، آني حقيقة ما شفت واحد كال أنطونة نزول ، فمشينة طلعنة ، آني خابرت أهلي ، عمي كال ديربالك تطلع أبقى بالمعسكر لأن أذا طلعتوا تصيرون معرضين للقتل من قبل الدواعش. فطلعنة و الكل طلعت الحقيقة ما بقى غير 200 بالمعسكر و نجوا حقيقة لأن ما كدروا الدواعش يخترقون معسكر سبايكر.
طلعنة بالباب أتلكونة الفرقة الذهبية كالوا أذا طلعتوا يكتلونكم الحقيقة ، آني أريد أختصر ما أريد أطيل عليكم ، حتة رمونة رمي جوانة و فوكانة كالوا أذا طلعتوا يكتلونكم فرجعنا ، أكو مندسين مع الأسف من بعض المحافظات الغربية من بعض الجنود وياهم "لا مالكم علاقة بالحجي هذه فعاليات يريدون يبقوكم بالموصل طلعوهم ، حتى الأهالي أنطوهم الدشاديش وهيجي فأقنعونا بالكلام ، أجينا عليهم منعوا رادوا منة كالو يابة أذا طلعتوا يكتلونكم فالمهم جفتناهم و طلعنة.
طلعنة بالباب تلكتنا الأهالي هذولة تلكونا لغرض أن يفرهدون المعسكر يفرهدون الأسلحة فشفنة دواعش وهاي بالبداية ، نمشي مالهم علاقة بينة الى ان وصلنا الى جامعة تكريت صلاح الدين ، فهناك بدوا أجوي الدواعش اليوم مثل ما مذكور آني يعني الحقيقة تعبت من هاي ، يكولون أنتوا ليش هيجي ليش انطيتوا أنفسكم ، أحنة عمي مو جبناء ، يشهد الله مو جبناء ، بس رحنة مغدورين ، آني بعيني شفت همر و عليها أحادية خلف الكواليس يعني أنتوا تشوفون بالكاميرة اللي يطلعوهم كم شخص ، خلف الكواليس بالمئات مع الأسف ناس مدنيين ، فالمهم مشينة وية الهاي كالوا أحنة مالنة علاقة بيكم أنتم ولدنا و أنتم مقشمرتكم الحكومة و أنتوا ما جايين تقتلونا ، واحنة تعرف هذا الشي ، كانت خطة مشينة مشينة وهسة تجي سيارات حقيقة أجتي سيارات كالوا راح توصلكم الى سامراء ، جانت الخطة هنانة من توصل السيارات يوزعونة ويفرقونة الى مجاميع صغيرة لغرض تفريقنا حتى يسيطرون علينا وهاي المجاميع مسبقاً موزعة ، يعني موزعة على بعض من أفراد شيوخ العشاير، على بعض كبار البعثيين السابقين ، بعض الشخصيات يعني .
ف أجتي السيارات صعدونة بالسيارات أتجهت بينا السيارات الى تكريت الى القصور الرئاسية لعنة الله عليهم ، طبينة للقصور الرئاسية أكو سيارات بعض الشباب يكولون أنتوا هذه السيارات عليها فد شخص واحد ، أخذوها! أكو ولد من أهالي الناصرية تريلة كاملة شردوا من عدها كتلوا هذا اليمهم و كتلوا السايق و شردوا ، زين آني يعني آني من أشرد بوسط تكريت شلون ذولة ما ، فالمهم لحكوهم وراهم و كتلوهم ، يشهد الله آني موقف هذا طبعاً ما يروح عن بالي و أحنة جاي نمشي من بقينة قليلين يعني بصف الشارع أكو جماهير جانت تباوع تتفرج من الأهالي و تصور ، أكو ولد شفته من عدنة من الجنود مشى يركض نزل وية هذولة الجماهير ف من نزل الناس مدنيين نساء و أطفال و كبار و شباب كالوا هذا هذا مو من عدنة ، هذا من عدهم اخذوه ، هو وكف هيجي يتفرج وياهم كانه ماشي كالهم جذب جذب هذا مو من عدنة ، كان بأمكانهم يسكتون و لا يكولون و يبقى عادي ، فكالولهم هذا جذب مو من عدنة تعالوا أخذوه ، فأجوي أخذوه. طبينا للقصور الرئاسية موزعين على مجاميع ، كل مجموعة ، مجموعة النهلر مجموعة الصبة يسموهة، و مجموعة الوادي اللي هي مجموعتي و بعد أكو مجاميع حافريلها بالشفل ، أكو مجاميع ، بلشوا بيها الأعدامات مباشرة واللي هي مجموعة النهر ، المجزرة اليوم ما يسمى بالمذبح .
فأحنة من طبينا ذولة ولد كالوا والله هذولة يكتلونا فأحنة آني بعد ما أعرف عن باقي المجاميع ، كل مجموعة عن مجموعة مشوف مجموعة مسافة . بعيدة بيهة نسمع أطلاقات النار أعدامات ، نسمعها بس ما نشوفهم أحنة جتفونة علساس يتفاوضون وية الحكومة لغرض أطلاق الحرائر او هيجي شي ، فبقينة مجتفين أول ما يجتفونة ، أكو كرفانات خلونة بيهة ، هذا الكرفان يتسع الى عشر أشخاص يخلون بي 30 شخص ثلاث أضعاف يعني اللي بالأخير ، يكون يموت من الخنكة ، لا بي شباك و لابي شي و حر موت . و كان يجي يرددون بعبارات طائفية أنتوا ولد المتعة أنتوا خنازير ، أنتوا حلال قتلكم ، فجان أكو شباب رحمة الله عليهم الشهداء المغدورين أكو بيارخ يخلوها على ذراعهم من الإمام العباس أو الإمام الحسين أو الإمام علي ، منهم كاموا يعرفون يطلعوها و ياخذوها ، خل يفيدكم حسينكم و عباسكم خل يفيدكم ، يشلعوها و يدوسوها برجلينهم ، والله آني شفته هيج برجله يدوسها ، فبقينا مجتفين حقيقة ، نكله نريد مي أريد أشرب مي ، يكلي تريد ماي رافضي مو ؟ أكله أي والله ، فيجي شنو ينطيني مي شلون ينطينياه ، دخيلك يا أبو عبدالله الحسين ، ينطيني ماي بالدك هذا الماي مالته ، يضربني الى أن أكله شربت بعد ما أكدر ، هذا الماي مالته ، حقيقة.
فبعدين طلعونة من الكرفان من يطلعونة ، فأكو موقف صار و أحنة بالكارفان ، جنود حقيقة سباع ، راحوا شهداء بيهم أصدقائي من اهل النجف و هاي ، فكاموا يصيحون ولكم أحنة شيعة علي الكرار ، تكتلونا عدنا ولدنا يجون ياخذون بثارنا يشهد الله العظيم لهاي الدرجة عدنة سباع ، شيعة علي ، فبعدين أحنة بقت هاي مجموعتنا الى تقريباً 16:30 العصر ، فكالوا يعني آني طبعاًهواي أني أعبر بيها ما أريد أدخل بالتفاصيل كلش طويلة ، ف للأربعة العصر قبل هاي بس فد ملاحظة ، و أحنة مجتفين جوة أكو سيارات هاي اللي ينقلون بيها تحديداً أنترناش العسكري موجود هسة اكو صور هاي تلث طوابق من البشر والله العظيم تلث طوابق بعيني شفتهم. الجوة كلهم ميتين. مطلعين أيديهم من الباب . ف أكو جانوا دواعش مو عراقيين دواعش أجانب هذولة الدواعش الأجانب جانت عدهم رحمة ، أحسن من جماعتنا العراقيين ، ذاك جاي عن عقيدة بس هذا يقتلني عن حقد ، يعرف آني على حق هذا العراقي أبن بلدي يقتلني على حقد ، ذاك جاي عن عقيدة قاري نبراسه وهيجي شي . فشيسوون والله العظيم لازمله ترمز ماي يصعد وينطي لذولاك الجنود بالسيارات ينطي لهذولة البرا الغير مكان يصعد و ينطي ، أحنة جماعتنا نكله يجي يضربني ، لان أكله أريد ماي وكله سبب البعث حقيقة يعني جانت يرددون ، أنتوا اللي كتلتوا صدام والله لناخذ بثار صدام كل شعرة مدري شكم جندي ناخذ بثاره، الله يرحم الشهداء و يصبر أهلهم ............ التكملة توجد في مقطع كامل من رواية قصته على الشاشة"
ما بعد العملية الغادرة الجبانة بحق الجنود الأبرياء أنطلقت عمليات عسكرية أحرقت الأخضر و اليابس و أنطلقت المليشيات الطائفية من جهة أخرى لتصفية الحسابات بدواعي مريضة من ضمنها عصائب أهل الحق و كتائب حزب الله المتورطين بمجازر تكاد تفوق مجازر تنظيم داعش الإرهابي.
الى متى ستستمر هذا الأحقاد؟

#محمد_قاسم_علي (هاشتاغ)       “syd_A._Dilbat”#          

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات