قصة قصيدة غرگان

سلام إبراهيم
روائي
(Salam Ibrahim)

الحوار المتمدن-العدد: 6823 - 2021 / 2 / 24 - 17:43
المحور: الادب والفن
    

قصة قصيدة غركان لعلي الشباني
كتب صديقي الراحل هذه القصيدة 29/10/1969
كنت اول من يطّلع على قصائده فقد كان ينشدها لي في اليوم التالي ويستمع بعمق لانطباعي وهذه القصيدة من القصائد الشديدة العذوبة رغم جوها المأساوي، ارتقى الشاعر بحدث فقدان الأم ولدها الغريق الى ابعاد ودلالات ابعد من الحدث الفردي
وأتذكر اننا سافرنا انا وعلي الشباني وسعد نجم عبود السقا الى الشامية لمهرجان شعري قرأ فيه علي غركان فأدهش الحضور وتأخرنا وقتها ينقطع الطريق بين الشامية والديوانية
فبتنا في مضيف الشاعر الشعبي صالح الموسوي
ليلتها سهرنا ولأول مرة دون خمر
وكانت ليلة لا تنسى.
قدم علي للقصيدة
( وأبره الشرائع مثل ام ولد غركان)

غركَان
علي الشباني

يمة حدر يلحلاتك كذلة العمر الزغير
يغسل الكذلة الرمل الاخضر ...واعاين ذاك وينك
تضوي دنية الماي يل النجم الجبير
يمة عشك الماي اخذ شبكة لحدر
وانتجة الراس الزغير
دايخ الراس الزغير
داخن الجرفين والشط المشة يغني بمماتك
وانا سجة خوف مشتعلة لمماتك
يمة بالخوف شحلاتك
اوف... يل حسنك يندي
ويريع ورد دشداشتك
اني اريعلك بواجي , وامشي ظلمة بكل رصيف
يستحي الماي وضوة يجيبك لروحي
واوكف بدربك ضوة وطين ومحنة
انت مشحوف الورق سيس غفل
والماي يفتر وانوخذنة
دارت الدنية وطفل دمك يدير
عينك انشدهت نست نومك كصير
انت وردة بسمة عيوني
واني فختاية وملة جناحي العشب
والشجر واهس واطير
والعمر ريحة عرس خضرة واطير
انت يلنومك كصير
انت روح زغار تضحك ... واناي انبع
وانت ضحكاتك حرير
ليش يلنومك كصير؟
يلي طفيت النبع بالصيف
دنيانة عمت ياحيف
يمة شباجين ادينك ,والمضويات العصر جا وينها؟
يمة اودعك شهكة ام, النوم طارد عينها
يمة اصيح بريحة الغبشة ترد
صيحة الغبشة وتموت حيلها
رد ولك مغسول يبني
رد حزن عمرين يبني
الدهلة عيب تدفي ضلعك والشته الداير برد
رد علة امك ياحلو الدنية برد
ولو ميت بس ترد
واشبك الريحة البطولك ترس طولي
بروحي رنت كل معاضيدك... تراجيك
يلحبيب ... يليضوي الشيب فيك
وين يبني ؟
هذا وكتك بي ترد للبيت ... راوي من اللعب
تعبان ومشابك تذبني
ليش يبني ؟
حسي ماوعة اللعب بكليبك الغافي
وانه كليبي دمع
يمة زركة من الدمع
يمه فوك الماي حسي , وتضوي كل ضبة شمع
من نذر ذيج الليالي أمتانية ...ومتانية
ولنك ترس عمري لعب
وبدرب شوفاتي اخضرلك عشب
آني اشوفك وانت خضرلي عشب
حيل اشوفك تركض بدمي نهر
واكضي ليل ايامك التوها سهر
ياملذ روحي علة ايام السهر
يكبر بعيني كصير اليوم البعمرك شهر
وانت تمشي بلادرب روحي جدامك ركض
نام الذ ليلة يغافي ... وعيني بيك تنام
اطبكك وتغَمضْ
دمي ركض .. كلبي ركض
وحيلي من يومك نكض
......................................................
يا بخت بالماي ياعرس الشمع .. يل تانتك كل الناس, يا(صاحب) حزينة
روحي فاضت والمصايب سيسن ليغاد ووليدي سفينة
وين ماخذها الرمل والريح
مابيها تعت الريح
والشاطي مشة وي الريح
(ياصاحب ) مشة وي الماي وبدمي الحليب يصيح
(ياصاحب ) مشة وماودع أمة
ردة ودروب الحزن بالروح كثرن
كل درب طافح ونينة
ردة
ردة والوالد يغث الله حنينة.

#سلام_إبراهيم (هاشتاغ)       Salam_Ibrahim#          

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات