صرخه بحلك سكران....... تاليف هشام شبر

هشام شبر

الحوار المتمدن-العدد: 6638 - 2020 / 8 / 6 - 10:08
المحور: الادب والفن
    

( المكان ساحه يتوسطها صنم وتحت نصب الصنم يجلس رجل يشرب الخمر)

شنو انت من صنم ماتكلي ناس راحت وناس ماتت وناس اجت وانت على هالوكفه متعبت ماضجت فك منه ياخه عاد شجلبت

( يشرب من قنينة الخمر التي في يديه )

شكد فشله وشكد عيب واحد يحجي ويه الزعيم هيج وخاصة اذا جان هذا الواحد ملبوس .....ملبوس لو جكليت ههههههههههه
( صمت )

خو مازعلت الله عليك ...... مو صوجي تره المشروب يخلي الواحد يحجي شيش بيش ههههه اي شيش بيش ههههههههه
اشو ساكت خاف زعلت ...أركص لك أركص أركص ...

( يرقص مع الموسيقى والغناء)

من جينه للدنيه واحنه نركص نموت واحنه نركص نجوع واحنه نركص نفقد عزيز واحنه نركص نركص والعشه خباز

( يرفع قنينة الخمر بأتجاه الصنم )

بصحتك يازعيم ...جيرز...هههههههه أول مره اشرب ويه زعيم هههه بس بصراحه زعيم ثكيل حيل ثكيل ولا جنه شارب مايطوطح احنه نطوطحله..نطوطحله واحنه الممنونين

تدري انا مرات اسأل نفسي انت شنو الي سويته حته حطولك صنم اشو احنه الي ندافع واحنه الي نموت وانت بس واكف ورافع ايدك مدري تأشرعلينه مدري تفشرعلينه

لا تشرب زايد تاليهه تسكر وتتخورد بأرواحنه

( يدور حول الصنم وهو يتفحصه )

انا من اجيت للدنية أبوي كلي اكو صنم بالساحه وجدي كله لأبوي من اجه للدنيه اكو صنم بالساحه وأبو جدي كله لجدي من اجه للدنيه اكو صنم بالساحه لعد انت شكد صارلك عدنه

( يضحك بهستيريا )

تعال اكعد يمي شبيك معلك فوك مو عيب من الدول شتكول علينه واحنه صايرين مثل العمه وجنتهه ههههههه صايرين حلوه هاي مال صايرين ههههههههه


( يغني )

صايرين وصاير وطنه بيكم هههههههههههههههههههههه
( يلتفت الى الصنم )

تدري ليش اشرب يمك حته اثبت للحبربشيه مالوتك انا ماعندي ولاءات خارجيه عله كولتهم بس عندي ولاءات شربيه هههههه

( يغني)

شربيه هو المحبوب يايمه ......ههههههههههه

( يجلس تحت الصنم وهو يشرب )

في السنوات المنصرمه جنت اتختل منا ومنا خايف من المنصرمين وهسه هم جاي اتختل منا ومنا لان انحسبت على المنصرمين بينما انا لا منصرم ولا بطيخ ولا فكرت بيوم ان اكون منصرم

( يتحدث بهمس )

اريد احجي لك حجاية خاف انت ماتدري نص الموجودين يصفكولك لان خائفين منك والنص الثاني ماتوا وهمه منك خائفين يعني كسر بجمع انت فد واحد واوي وتخوف المايتخوف وعندك الجريمه ولبست الجواريب لا ترمش عالي ولا ناصي كبل وعدل بالكصه

لا تفهمني غلط بس الي اعرفه بأدب الجريمه لازم يتعرف القاتل على المقتول ويدخلون بحوار وهذه الحوار يدخلهم بفوضى وهاي الفوضى تتمخض عن رصاصة وهاي الرصاصه تتمخض عن قتيل.... يعني واحد يتمخض من الثاني...بس احنه ما نعرف منين تجينه الرصاصة
اشو ساكت خاف ضجت أركص لك أركص ... أركص
( يرقص مع الموسيقى والغناء)

( يتوقف عن الرقص فجأه)

ولو انا بعدني بأول طيحان الحظ بس سؤالك بمحله ..
سؤال مسؤول من مسؤول يعرف معنى السؤال... انا اشرب حته امحي الهزيمة الي بداخلي الهزيمة الي كلش مأذيتني بس المشكله من اشوفك روحي تفرفح وينسمط ابو ابوهه
لأن انت سجنت هواي ناس وقتلت هواي ناس ويتمت هواي ناس وبعدك الصنم الضرورة ولك ابن الضرورة

( يشرب من قنينة الخمر التي في يديه)

أعذرني عله هاي الميانه الزفره بس المشروب يخلي الملجوم يحجي كل المضموم

أركص لك ....أركص

( يرقص مع الموسيقى والغناء)
( يجلس وهو يتحدث بصعوبة من شدة التعب )

اريدك فد يوم تركص حته نشعر بيك صدك ضرورة بس اسمع ولك مثل ماجبرتنه نركص راح يجي يوم ونركصك الدنية تره دواره ...

( يشرب من قنينة الخمر وهو يغني )

دواره دواره يادنيه دواره راح الزعيم الغالي ونكطعت اخباره
( يضحك بهستيريا )

ههههههههههههههههههههه احلى شي من يطيح صنم واتعس شي من يجي ابداله صنم ثاني اخس منه يخلينه نركص حد مايطيح حظنه

( يلتفت الى الصنم )

انتهيت بحلك سكران يتمضمض احزانه تقطعت ازرار جرحه الي ارتداه بحرب سابقه وظل ينزف بكرامته لحد ماطاح حظه وهو يجدي من رصيف لرصيف ومحد يعبره كلهه تدوس عليه وتمشي جنه لا شي وهو الي انطاهم كل شي


تدري شكد لعوستنه وخليتنه فرجه لليسوه والمايسوه وايدك هاي الي رافعهه عساهه كسر مايوم دكت باب فقير مايوم انطت محتاج انت ملعون ملعون كلش ملعون
( يصرخ )

أركص لك ....أركص لك...أركص

( يرقص مع الموسيقى والغناء)

#هشام_شبر (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل