ورا الباب

عادل عياد

الحوار المتمدن-العدد: 5178 - 2016 / 5 / 30 - 04:09
المحور: الادب والفن
    

الصحاب ومليون ضحكه
لعبنا لحد ما لمسنا السحاب
وعملنا ألف مغامره مجنونه
كانت أغربهم من غير ملامح
كانت عباره عن خوف جامح
نقله لينا صاحبنا الجديد
من جوا حدوته مفزوعه
لما سمع أصوات ممزوجه
مربوطه
مخلوطه بدخان بيرسم أشباح وهميه
وطلاسم على جدران
شبت فيها ألسنة اللهب
ورق شجر حزين وهايج
بيبكي على طرده من قلب الفروع
وصوت ظاهر بس مش ظاهر
ظاهره غريبه ..
ناس سامعه
وناس تايهه
صوت بيانو في عزف حزين على غير العاده
كان صوت من نار :
نأتي من بين الأشياء
دون أن تفهم ما نشاء
هوس العقل فينا
يجعلك إلينا في اشتياق ..
أعوام من الخوف
ويوم ما تتمنى تشوف
نختفي من حياتك
فتفضل دايماً شارد
ملهوف

بيوت مليها الأشباح
أشباح مخدوعه ومأسوره
وللا البيوت مليها خوف الناس
دا كان تعبيري وتفسيري
وقلنا نواجه خوفنا
ونكون جزء ولو بسيط
من الحدوته الخرافيه

اتسحبنا ..
ظهر قدامنا جدار مشقوق
وفي الخفاء تحس بقوه خفيه
وملوك الظلام حاضرين
غير مرئيين
فتحس جواك برعشه مميته
فيزيد خوفك خوف
قدام باب معجز
ومغطيه التراب
العنكبوت عشش وفرد خيوطه
على شكل شيطان
وغزل لوحه مليها الضباب
كان باين على الباب
إنه محضنشي مفتاحه من سنين
قلبه كان واضح
مكشوف بإزاز غامق مزخرف
بيعكس الرعب على المسافرين في السلم
مسكت الزمام من إيد الخيالات المرعبه
ودقيت على الباب
تك .. تك .. تك .. تك تك
سمعت قلوب حواليا بتموت من الخوف
بصيت ورايا
لقيت غيوم
لقيت عيون مرعوبه
عايزه تهرب من وشوشها

فجأه طلع صوت غريب
وقع أقدام عنيف
خبط خفيف
حس خارج من قلب الخشب
زي المسامير
لبنت كاسره العشرين
- أيوه مين ! ..
- أنا .. أنا .. أنا صاحب صاحب البيت
- عايز مين ؟
- زين ..
- مفيش حد هنا بالإسم ده
- ممكن تفتحي ؟ ..
- لأ .. مقفول عليا من زمان
- مين قافل عليكي ؟
- ..........
- افتحي ..
- ..........
زاد السكوت فجأه
وفجأه ظهرت خيالات من خلف الإزاز
حوافر عايزه تنهش الأجساد
ونور أحمر كأنها بتقول :
" هشرب من دمكم في كاسات "
أصوات عربيات
تكسير حاجات
صراخ
لمبة السلم اهتزت
ونورها اترعب فارتعش
رزع جامد في قلب الباب
كأنه طوفان هايج بيعانق الرعد
الكل جري
وساب وراه حدوته
وجواه ألف قصه عن اللي ورا الباب

سبنا المكان بس المكان سكن فينا
كل اصحابي اترعبوا
وانا حبيت
البنت اللي ورا الباب

#عادل_عياد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل