ما بين أنا وأنا الآخر ..

عادل عياد

الحوار المتمدن-العدد: 5157 - 2016 / 5 / 9 - 03:04
المحور: الادب والفن
    

من بعد ما اتزرعنا في الرحم
واحنا الاتنين بجسد واحد
عقلين
وقلبين
وشوية حاجات منها اتنين
والباقي واحد
توأم ملفوف بتوب جلد واحد
متفصل غلط
كتير الناس خافوا مننا
كتير اللي حبناهم سابونا ومشيوا
إحنا حاله غريبه عن البشر
..
ما بين أنا
وأنا الآخر
أنهار وسدود كتير من الفرقه
من اختلاف طعم الميه فينا
طريق واحد مقسوم رايح جاي بين عقلين
أرضه اللي بتجمعنا هى جسدنا المتنافر
إزاي إحنا الاتنين نحب شخص واحد
نحب حياه واحده
إزاى الحياه تعجبني أنا
وتعجب أنا الآخر ؟!
..
- إهدى
سيب أنفاسك تترص صفوف
وتكوّن طريق تعدي عليه
خلي تكوينك يتحرك بطريقه عكسيه
فتتكون جواك رغبه في اللاوعي مثلاً
فتضحك
وتفرح
وتنبسط
- كل حاجه فيا ثابته مابتتحركش أبداً
مابتفكرش أبداً
أنا ميت جواك
بس انت اللي مش واخد بالك
- فُوق ..
سيب احزانك في تابوت فرعوني
واقفل عليها بقفل أبدي وعيش
- في الحاله دي وباختصار
أنا بس اللي هاتدفن جوه التابوت
- ليه تبحث عن صدى خوفك
فنجري انا وانت ورا وهمك المدفون بعيد
- انا مش حقيقه
أنا مجرد وهم فيك
متفصل عليك
فافهم بقى وارتاح وريحني
- لكننا من بذره واحده طلعنا !!
- بذره ضعيفه مقسومه نصين
فشلت قبل الحياه
وفي الحياه
إحنا ياصاحبي مخلوقين غصب
مغصوبين على صراعات الحياه
محطمين جوه هيكل نص سليم
مربوطين غصب
..
ملحوظه :
بعد عملية فصل مريره
مات العايش
وعاش الميت

#عادل_عياد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل