هاملت السوري - مشهد مسرحي يومي و تاريخي

مازن كم الماز

الحوار المتمدن-العدد: 5112 - 2016 / 3 / 24 - 08:18
المحور: الادب والفن
    

هاملت السوري - مشهد مسرحي يومي و تاريخي


خشبة المسرح غير مرئية , لا يرى إلا الظلام .. لكن الأصوات شديدة الوضوح ...

- هكذا انتهيت ..
- ...
- متسول ..
- ...
- هارب .. تهرب من أوهامك إلى أوهامك .. من أكاذيبك إلى أكاذيبك , من جلادك إلى جلادك .. من قيودك إلى قيودك ...
- ...
- معهم حق يعاملوك بكل هالاحتقار , شايفينك شحاد .. أجدب , عم تكذب كذبات غبية لتبين شحادتك و خوفك و هروبك أحلى , و كإنك عن جد شهيد .. أو ثائر , أو حر ...
- .......
- إنت بتستاهل أكتر بكتير من هالملاليم , من هالعيشة , بس مو هيك .. مو بهالطريقة
.. - ...
- هدول اللي عم تذل حالك إلهم و اللي عم يحتقروك مو أحسن منك .. أبدا .. إنت اللي أخرى منهم
.....
- ...
- قلتلك حاجة تزاود على الشهداء , و الجوعانين و المعتقلين .. بيكفي .. بيكفي كذب ... -
...
- حاجة تبيع و تشتري فيهم ...
- ...
- هي اللقمة المرة اللي عم تاكلها دم شهداء ...
- .
- جوع الجوعانين .. و خوف الأولاد .. عم تقبضه إنت لقمة مغمسة بالذل ..
- ....
- .. الرجال بيكمل رجال للآخر ...
- ... - هي مو حرية .. إنت بتعرف منيح .. بس عم تضحك على حالك .. بتعرف إنك لسه بنفس السجن , حتى لو صار سجانك هو جارك و يمكن ابنك .. إنت بتعرف إنك لسه محبوس , و أجدب , و ما بتسوى شي , و عم تكذب على حالك , متل ما عملت أربعين سنة ...
- ...
- و يمكن لأربعين سنة كمان , يمكن أربعين قرن , يمكن من أول الدنيا و إنت هيك .. من أول جد إلك ركب على ظهره أول خرى ..
- ..
- كان فيك تموت واقف , كان فيك تموت و إنت عم تقول لأ على القليلة , و إنت مفتح عيونك , و إنت ..
- بس أنا ما بدي موت ... -
... - أنا ما بدي موت ..
- ...
- إنت بدك تموت , أنا ما بدي موت ..
- ...
- هلكتني ما عندك شغلة غيري ..
- ...
- بدك ياني قول لأ , و موت .. بس أنا ما بدي موت .. أنا بدي عيش ...
- ...
- إي بدي عيش .. عيش .. كيف ما كان ... فار , أو صرصور , شحاد , أي شي .. أنا بدي عيش ...
- ...
- إنت بدك تموت روح موت , بدك تقول لأ , روح قول لأ , حل عني , اتركني .. بدي ارتاح منك ...
- .... -
إي أنا و لا شي .. إذا هدا بيريحك , إذا بيخليك مبسوط .. بس إذا أنا و لا شي , إنت كمان و لا شي .. إي إنت كمان و لا شي .. ما شفت منك غير الحكي , حكي و بس .. حكي جرايد ما بيسوى الورق المكتوب عليه ..
- ..
- و بدك ياني قول لأ , و غير الدنيا , بالحكي ..
- ..
- ( "بعمق" ) إنت ما بتعرف شو يعني حبس .. إنت ما بتعرف شو يعني مخابرات .. إنت ما بتعرف شو يعني سجن .. ما بتعرف شو يعني خوف .. شو يعني فقر .. إنت بتعرف تحكي و بس ...
- ..
- إنت ما بتعرف الجوع , و لا البرد , و لا العطش , و لا الموت .. أنا بعرفهم منيح .... بس أنا اللي بعرفهم منيح ... إنت بتعرف تحكي و بس ...
- ...
- إي بدي عيش .. كيف ما كان .. بدي اتخبى , و اشحد , و وطي , و بوس الأيادي , و طعمي ابني , أي شي ..
- ...
- و بدي اكذب على حالي , و عليك , و على الكل .. إي بدي عيش .. بدي اكذب لعيش .. بدي اكذب لابني يعيش ...
- ..
- الحكي بيشبعك إنت , بس ما بيشبعني أنا ... حكيك ما بيطعميني خبز .. ما بيدفي , ما بيرد مطر ..
- ...
- و إنت كمان عم تكذب على حالك .. علي , و على الكل ..
- ..
- و بتكذب عالثقيل .. و بتبوس الأيادي و بتوطي , و بتدبرها مع حالك , و لاحقني عالواحدة يا خرى .. -
...
- و هدول جماعتك , أولاد ميركل , هن كمان غلطانين .. إي غلطانين ..
- .. -
شو ما كانت كذباتي , شو ما كانت قصصي ما بتتصدق أو ما بتنبلع .. قد ما كنت أنا صغير ... و ما بسوى شي ... هن كمان عم يكذبوا على حالهم ... متلي ..
- ..
- إذا شايفيني أكبر مصايبهم , أنا الأجدب , أنا الصغير , أنا الصرصور , بيكونوا هن كمان عم يكذبوا على حالهم ...
- ...
- اخرس .. اخرس .. -
...
- إي عم يكذبوا على حالهم ... إي متلي .. إي متلي .. سمعتك , سمعتك يا خرى .. قلتلك اخرس ... ما عاد بدي اسمع صوتك .. هلكتني .. اخرس ... -
....
- بدي آكل غصب عنك , بدي عيش غصب عنك .. شحادة , سرقة , كذب , شرمطة .. بدي عيش , و طعمي ابني , و جيب أولاد ..
- ..
- أكيد واحد منهم رح يوصل .. رح يعملها و يصير بني آدم .. حيصير أسد ...
- .. ( يبدوالصوت مصدوما .. ثم يبدأ بالانهيار )
...
( يتصاعد "التوتر" في "المسرح" ... تسمع شهقات مكتومة , يتخللها بكاء طفل رضيع يتلوه صوت صفعة قوية جدا ثم يعود الصمت من جديد )
- أسد ؟؟؟؟ !!! أنا قلت أسد ؟؟!! -
... -
أسد ؟؟!! - ...
/ الصوت على وشك الانهيار .. تسمع بعض الهمهمات غير المفهومة لكن التي تدل على التشويق و الترقب .. يصرخ أحدهم : لا تصفق ( يفضل استخدام صوت أحد مرافقي باسل حافظ الأسد الذي قال نفس الكلمات عندما كان باسل حافظ الأسد يقفز على حصانه"الأغر" في دورة الألعاب المتوسطية في اللاذقية لمنع المتفرجين من التنفس )
- يلعن روحك يا ....
- ..
- ..
- ..
- كله منك .. كله منك .. بدي اخلص منك .. بدي ارتاح .. بدي عيش ..
- ..
- بتطل تقول بدك تموت .. رح خليك تموت .. إنت لازم تموت .. أنا بدي ارتاح .. بدي عيش ... أنا بدي عيش ..
- ... أصوات عراك غريبة .. أشبه بسقوط رجل ... أو بمحاولته الالتفاف على نفسه أو العودة إلى داخله ... أو إلى رحم أمه
- ... -
... - آه !!!!!!
- .....................................
- آخ !!! آخ ...........................
يضاء المسرح إضاءة خافتة جدا .. في نفس الوقت ينفجر التصفيق الحاد , بصوت مرتفع جدا , رتيب , ميكانيكي , كأنه آلة تسجيل .... تسلط بقعة ضوء خافتة حمراء على جثة هامدة وسط المسرح .. جثة واحدة .. يخرج منها سكين , تماما عند القلب .. يستمر التصفيق بنفس الرتابة و الضجيج ......... ( ستارة )

#مازن_كم_الماز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل