دوشه

عادل عياد

الحوار المتمدن-العدد: 5034 - 2016 / 1 / 4 - 19:42
المحور: الادب والفن
    

دوشه داخل الصمت
نور داخل الضباب
قبل بداية الزمان عاش
..
الوقت كان بيفوت
من غير ما يحسب ساعاته
كل يوم الروح بتغادر
واللي مات بيجري يحضن الحياه
سافر الفجر للأحلام
استسلم اللسان للكلام
فشال صاحبنا البحر فوق كتفه
وفرش بيه الأرض ونام
..
عاش هناك
وكمان هناك عاش فيه المكان
نسى إزاي يكون الحزن
والدمع كان من كتر الضحك
وعنده الضحك كان
المعنى الوحيد للحياه
..
دوشه داخل الصمت
بتسأله : انت مين ؟
حضن نفسه وقال :
أنا أعظم ما اكتشفه الإنسان
أنا نفسي
مع إني بتوه كتير من نفسي!!!
..
فجأه المكان اتحول زحمه
واتحول صاحبنا لصمت داخل الدوشه
عرفت الحقيقه الكدب
وعرف الكدب الحياه
الهوا اتجمد في الهوا وطلعله ملامح
حتى القمر نسي السهر
والمكان المنسي
بتهاجر ليه الطيور من كل مكان
..
لما خاف
رجع لوضعية الجنين
حاول يعيش من تاني طفل
فيمسك بلونه ويطير
وان سابت إيده وطارت
تتعلق بيها الطفوله وتطير معاها
..
نفسه يحس بأنه
مولود جديد
وانفاسه تسافر في فضاء بعيد

مين اللي بيسرق الفرحه
ويقدر يستمتع بيها رغم الخوف
مين اللي يقتل الألم في المهد رغم الضعف
مين اللي يمشي لأبعد طريق
وهو نايم بلا حركه
..
السر فين
الموت ؟
الولاده ؟
همس لنفسه :
ان قدرت تهرب فاهرب من الاتنين
..
ما تتلخبطش كتير
الحياه يوم هنا ويوم هناك
يوم توهبك أجمل ما فيها
ويوم تنتزع منك مجرد الابتسامه
وتبرز أسوأ ما فيها
فمتستناش الماضي يحضر شنطته ويعود
يقطع تذكره في الزمان ويجيلك
انت اتولدت للحياه
طب ليه بتنتظر في الموت
وتقول ما عشتش
دوس play للحياه
واخطف منها أي score
وعيش ...

#عادل_عياد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات