تمرد الضياع

عادل عياد

الحوار المتمدن-العدد: 4994 - 2015 / 11 / 23 - 19:30
المحور: الادب والفن
    

مقدمه ملهاش معنى :

إلى من ترك الأنا
وساب وراه حطام
ورماده تاه في عالم السكوت
إلى من كان الهوى والروح
وساب وراه قبري
يغرق في العتمه
إلى أنا :
ليه مترجعشي ؟!
وليه رحلت عن الجسد القديم ؟!
مش كان زمان هو مسكنك الوحيد ! .

مقدمه مجنونه :

أنا أنا
أعزف للأنا
لحن الصمت في الدواوين
على صوت ناي فقد لذة الأنين
فمتسمعشي غير سكاته
أنا اللي طابع على وشي ضحكات ببنط عريض
وبمرور الزمان
بهتت الطباعه
ونسيت إزاي كنت بضحك الضحكه
نسيت كيفية العزف على الأحزان
أحشاء الليل قبضت بقبضتها على المكان
عتمه يمكن منيش شايف
نور يمكن منيش عايش
..
عيون كتير في الغرفه بتراقبني
عيون بلا أجساد
بتشوف اللي بيحصل في عقلي
رغم كل محاولات التخفي
هنا ..
وهنا ..
وهناك..
ورا ضلي
ورا أوهام الحياه
بس العيون شايفاني شايفاني
كشفاني كشفاني
طب أعمل ايه فيها ؟
وأروح لفين منها ؟
صوت دقات القلب بيعوي
عايز أخزق كل العيون دي
أقتلهم قتل دموي
لكن للأسف مقدرش ...

حاله من العجز :

سأل السؤال سائل :
مين فينا اللي انتصر ؟
مين اللي ليه علامة استفهام أكبر ؟
وقال كمان :
أنا عارف جوابي
مع إني مفهمتوش
والأسئله بتسألني
و أنا في جوابي تايه
علشان لما ببص في المرايه
مابشفنيش !! ...

متعلق بخيطان
خيط اتقطع وخيط دايب
واحد فاضل متشعلق فيه
وخط رسماه الحياه
مش قادر أخطيه

عقلي أصبح زي الأرض العقيمه
مبينبتشي غير صخور عوجه وأعشاب ضاره
واتمردت كل الشهوات عليا
زي لص عاوز يسرق حتى شقوق الجدران
عاوز يمسك التلج وهو فى حالة دوبان
يتمرد الفراغ كمان
عاوز يسلك طريق الأرواح الساميه
عاوز يصبح إله
..
حياتي قصيره ومتشابهه
أحداثها صابها الكسل
فخلتني أنام
..
لذة الألم في الروح وصلت المنتهى
داخل متاهة الجسد
يدوب التلج
يطفح عرق و دموع
..
في يوم حلمت بالخلود
براكين الحقيقه أفظع قيود
انطمس امتداد الماده
وفضل الصمت
ساجدين في طابور الموت
واقفين بصمود ..

نهايه محطمه :

أطياف ناس طايره في المكان
سرب من الخيال
وللا العقل بيستمتع بآلامي ؟
بخوفي من شيطاني ؟
يتحول المطر لتلال
تحجز عني نفسي
تخطف مني أحلامي
فنام تاني ...

نهايه حتميه :

الامتحان كان بلا نهايه
والإدراك عصفت بيه العاصفه
مجموع خوفي
خرجني خارج الحياه
أنا ..
رساله اترمت في محيط الموتى
أنياب الدهر بتفترس جسدي الخفي
وعقلي
مربوط بسلاسل زايله
هتزول بمجرد غروبي

#عادل_عياد (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل