قانون تقاعد خام برنت

عماد عبد اللطيف سالم
كاتب وباحث
(Imad A.salim)

الحوار المتمدن-العدد: 4949 - 2015 / 10 / 8 - 22:48
المحور: كتابات ساخرة
    

قانون تقاعد خام برنت


أمّي تقول: يابه شوَكِتْ تِطْلَعْ تقاعُد ؟ مو صار عمرك 100 سنة . شنو قابِل راح تاخُذ تقاعد مال ديناصور !!.
أنا أقول : والله حَقّج . بس إنتي إندعيللي حتّى يشملني قانون تقاعد جديد راح يصدُر مع حزمة الأصلاحات الخامسة ، وإسمه " قانون تقاعد خام برنت " . وهذا خوش قانون . بموجبهِ اذا صِعَدْ سعر النفط ، ناخُذ خوش راتب . واذا انخفض السعر .. راح إنكَدّي .
أمّي تقول : لا يابه الله لايكَولهه . انشاء الله ورا القصف الروسي " الثقيل " ، يصعد سعر النفط " الخفيف " ، ويرجَعْ براسنه خير . إنته بس إطلَعْ تقاعُد ، وأُخذني آني وأهلك لتركيا ، نعيش هناك بشقّة مفروشة ، وراتب التقاعُد يكفّينه ، ويزيد .
واستطردتْ أمّي : بعدين يمكن مثل متكَول راح يجون الروس ، ويقصفون . وذوله عدهُم خوش " بوتين " . يُرفِسْ رَفِسْ . ويقصفون بلا وجع كَلُب . وآني متعودة على قصف " قوات التحالف الدولي " ، لأن قصُفْهُم خوش قصف ، و ميأذّي هوايه ، وحافظه صوته زين .. و ميجَفّلْ .. و حبّاب !!! .
انا أقول : شخسرانين يُمّه . لننتظر " الحزمة " الخامسة و نشوف . يكَولون هاي الخامسة خوش حزمة ، وبيهه إصلاحات " بُنيويّة " . واذا طِلعَتْ هَمْ " كلاوات " .. وراهه إنْهِجْ .
أمّي تقول : إنته ليش تصير قشمَرْ يابه ؟ يا إصلاحات " بُنيويّة " ، وإحنه ماعدنه لا سيّارة " زِبِلْ " ، ولا سيّارة نجدة ، ولا سيّارة اطفاء ، ولا سيّارة اسعاف ، ولا سيّارة " أمّ الدخّان ".
أنا أقول : لعَدْ هاي هيّه يُمّه . ما طول ظلّمتيهه علينا ، لعد حَضْري غَراضْ الدفنه مالتج .. وخلّي نهاجِرْ . ولتنسين الصابونه مال حصة التسعينيات التموينية ، هاي الضامتهه بنُص الجِفَن من عشرين سنة .. لأن إنتي متروحين للجنّة إذا منغسلِجْ بيهه . وآني من باجر راح أقدّمْ طلب التقاعد . و وراها نروح نأجّرْ شُقّة بأسطنبول ، وعلى البحر ( لأن إنتي مشايفه البحر " شو كبير " أبد . وتكَولين لازم أشوفه كَبُل ما أموت ) . واذا الله راد ياخُذ امانته ، راح أدِفْنِج باسطنبول ، وعـلى البحر ، و تتدلّلين يُمّه .
أمّي تقول : وإنته وين راح تندفن يابه ؟ إنته هم جبير بالعُمر . ويكَولون ذولة الكبار بالعُمر ، بس يطلعون تقاعد .. يموتون .
أنا أقول : آني اذا اموت راح اندفِنْ لو بـ " هاواي " . لو بـ " ميونيخ " . لو بـ " سيبريا ".
أمّي تقول : يابه لتخلّي بالي عليك،وخلّيني أموت مرتاحة.هاي " الكَبور " وين صايرة ؟
أنا أقول : يُمّه هاي مو " كَبور " . هذي بيوت بـ " الجنّة " . بيت يَمْ عمّي حسين أوباما . وبيت يَمْ خالتي أنجيلا ميركل . وبيت يَمْ خالي فلاديمير بوتين .
و عندما تموتين يا أمّي .. و تذهبين الى الجنّة ، اندعيللي أروح يَمْهُم . هذوله لا يُذَلُّ عندهم أحد .. ولايُظلُم معهُم أحد .. ويشبهون " النجاشي " .. بسْ شويّة أفتَحْ .
هذوله يَمْهُم الواحد يموت منّاه .. و يندفِن منّاه .. لو يِنحِرِك اذا ماعنده فلوس الدفنة . والكُلّ تروح لـ " الجنّة " كَبَلْ .. بدون " جِفَنْ " .. وبدون صابونة مال حصّة مستلميهه بالتسعينيّات .
هاي الصابونة اللي ماتتْ ريحتهه قبل 25 سنة .. وإحنَهْ بعدنه عايشين !!!! .

#عماد_عبد_اللطيف_سالم (هاشتاغ)       Imad_A.salim#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل