قصيدة المربد

سعدي جبار مكلف

الحوار المتمدن-العدد: 4854 - 2015 / 7 / 2 - 14:11
المحور: الادب والفن
    

المربد
أه يازمن أختل فيه الميزان وضاعت عند عتباته القيم ...لقد أوصينا توابيتنا ونحن صغار وأحياء ..أعذرني قد ذبحت أحلامي وأنا في عالم اليقظه ...
من الخندگ
من المربد
تهب ألها عواصف شوگ ما تنعد
رفيف الشاطي المربد
تهد هدت سيوف المو ت ما ترتد
أذكرك سوگ خضاره
أحبيب جايب أبشاره
حرز عوذه أحطنهن
أصيحن حيل گزاره
عزيز وحلوه أفكاره
لعد مالو أدگ الروح
وأغني اليهوه تذكاره
يصبري أخ ياخويه
حسافه أحنا تطشرنا
صحيح أسجون ضمتنا
أبد ما بعنا أسراره
ولا چنه صريم الشوگ
رحنا السدني عباره
خلسنا الخوف ينحت موت
شنهو گلي الچاره
خلص وشل عمرنا أمدلل الصوبين
تاليها السفن ضيعت البحاره
يظل شارع أنس ی-;-تفگد الموته
يظل يسأل
هم سويتلك تابوت
تدري بالمنايا أمخيمه بداره
تظل الروح محتاره
يا نجار تابوتك حسبت أحساب مگداره
يعمي بس ألك أتلوگ أهي زفه
أهو تابوت موتك شعت أنواره
فديوه زيد الخشبات
دگ تابوت ..مو واحد
دگ أكثر
أخذ مقياس ناسك كلها تتواره
قطعة كل شهيد أتعطر الحاره
يصبري أشلون ما تدري
عليمن يحصد الطاعون
كلها أتصيح ما ادري
يجينا الزود ياخويه
تظل الناس ماتدري
خلها أمسربه وتنام
ظل بس الدمع سچاب
بس هوعفاه يجري
تعال وشوف ياصبري
چانون أللهب يسري
أنا أبسدني ألهم ضيم
تفگ ومعطبه أبصدري
شحلات أيام لمتنا
شحلات أربوع بصرتنا
شحلات أزلام دشتنا
خساره احلامنا الوردي
يا غنوة الهيوه وصوت هلهوله
نغط شط الرباط أبعرضه وبطوله
تعودنا على التوقيف
وايام السجن سوله
ما نرتد ولا ترمش تراهي العين
يدگ تومان ماصوله
يعزف للسلام ألحان
وتضوي مراسيله
ماهمنا شته لا گيض
ولاهي رفة الشفه
ابد ما عشنا أبحيله
ندگ الروح بالتربان
وبسوگ المغايز نمشي أكحيله
جبل حيله
ماهمنا برد كانون
لا شرجي يصب سيله
كلها أموزره وتغني مدلوله
يمدلوله ...يمدلوله
يمدلوله أشبقى عندي
بعدك خويه ما تدري
أمعدل وألله ياصبري
ياصبري فزع أشلون ما تدري
ما تدري أنهدم بيتي
ما تدري العمر نوخ يحد أهمومه أبكتري
صبح ناطورنا ناوي على چتلي
يدمغنا الوكت صگعات
سكرنا الطوش والضايع بلا خمري
يصبري ونته ماتدري
يخويه الماتوا أبدسفول
على الساتر ...نهر جاسم
جثيره أدمايهم تجري
كل هذا وتكول أبشر
ياصبري التعده أيوب
يساومني على سري
بده حاصودها يحصد
بيده يگطع الاوتار
ماظلي لحن يسري
خلصت ياربع خلصت
لفانا الخير وعيونچ تره بشري
بعدك خويه ماتدري
أدريه أللهب چانون
يظل أمورث أبكتري
موش أنته ألي ما تدري
موش أنته ألي ما تدري
1-9-2013
سيدني أستراليا

#سعدي_جبار_مكلف (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل