الضيف الثقيل

سامي حرك

الحوار المتمدن-العدد: 4817 - 2015 / 5 / 25 - 10:40
المحور: دراسات وابحاث في التاريخ والتراث واللغات
    

الضيف السـءـيل, وولاد حورس الأربعة
الربات, ملوك الحواديت, في مصر الـقـديمة, وأهم واحدة فيهم, ربة التاريخ والكتابة, ستنا "سيشت".
طيب, الربات دول المفروض إنهم "نترو", يعني كائنات سماوية:
• بيظهرو للناس إزاي ؟
• وموجودين في كل العصور, ومع كل الأجيال, إزااااي؟
الحكاية ببساطة, إن النترو (رجالة وستات), زي القديسين, والأوليا (أقطاب/ مشايخ), بيـقـوم بدورهم في المعابد كاهن أو كاهنة, عارف علومه وأسراره, مش بس كده, إنما كمان لهم في كل أسرة ظهورات وتجليات.
ستنا "سيشت" دايما حاضرة مع الجدات, كل واحدة ست –بالنسبة لأحفادها- واخدة صورة "سيشت", ماسكة دفاتر العيلة, عارفة اللي راح واللي جاي, اللي مات واللي حي, وأهم حاجة إنها ملكة الحواديت.
كان فيه واحدة ست, إسمها "ستوتة", من "أبيدوس", سمعت إن ولاد بنتها متخانـقـين, سايبين بيت أبوهم, وراحو بيت أختهم الكبيرة.
ستنا ستوتة زارتهم, وبعد ما باستهم وحضنتهم, سألتهم:
- سايبين بيت أبوكو ليه؟
- عشان أخونا الخايب, مضيف واحد سـءـيل, غريب مش مننا, والضيف له تلاتيام أو سبعة! إنما دا كاتم علا نفسنا من 6 عاشورات (العاشورا عشرتيام), واللي كنا فاكرينو ضيف ومسافر, شاركنا في بيتنا وأرضنا, وخد أغانينا ولبسنا!
- طيب, مشوه من بيتكو, وإن رفض إشكوه للحاكم!
- المشكلة, إنه زي ما حط إيده علا كل حاجة ملكنا, واكل ودن أخونا الخايب, كتب له شوية ورق أصفر, وفهمه إن دي وصية أبونا وجدنا!
- وناويين علا إيه؟
- إتفـقـنا نجمع نفسنا, ونروح نطرده من بيتنا وأرضنا!
- طيب, خلوني أسمعكم وصية "حورس" لإولاده, قبل ما يكلفهم بأهم حاجة في الدنيا, وهيا حياة الإنسان.
حورس جمع ولاده الأربعة: "إمستي, وحابي, ودواموتف, وقبحسنوف", وقال لهم:
إدارة مملكة الموت, هيا مهمة أبونا "أوزيريس, وأنا مهمتي إدارة الحكم, وأنا عاوز أكلفكم بمهمة حراسة أهم أربع حتت في جتة الإنسان الميت, لأنهم لو متحفظوش كويس, الإنسان مش هيعيش, لأن قلبه مش هيشتغل تاني!
الولاد الأربعة إتحمسو, وفرحو بالمهمة, بس كل واحد فيهم كان حاسس إنه يـقـدر يـقـوم بيها لوحده, وفعلا "إمستي" كلم أبوه وإترجاه يسيبه هو يــقـوم بالمهمة دي لوحده, ويخلي إخواته لمهمات تانية ممكن يحتاجها منهم, أبوهم حورس.
حورس نبه ولاده, إن دي أكبر مهمة في الوجود, لأنها الخيط اللي بين الحياة والموت, والفرق بين الميت والحي, من غيرها أرض الحياة تبور, وميزان العدل يميل ما ينعدل, وعشان كده أمرهم, يتعاونو مع بعضهم:
• "إمستي" خليتك علا صورة إنسان, يعني معاك العقل والكلام والخيال, تحرس الكبد.
• "حابي", قرد البابون, يعني الحكمة والذاكرة القوية, تحرس الرئتين.
• "دواموتف", إبن آوى, مبتترددش في قرارتك, وسريع في رد الفعل, تحرس المعدة.
• "قبحسنوف", علا صورتي, الصقر, ملك العلالي, يعني الرؤية الشاملة عشان لو إخواتك نسو أي تفصيلة, تحرس الأمعاء.
أما وصيتي ليكم: "حافظو علا تميزكم, علا شخصية كل واحد فيكم, علا إسمه, وشكله, وصفاته, هو دا سركم, أشكالكم مختلفة, إنما هدفكم واحد: يعيش الإنسان.
ستنا "ستوتة" وصت أحفادها يفكرو في وصية حورس, وقالت لهم: "عدوكم هيحاول البدع, عشان ينسي كل واحد فيكو إسمه وكلامه وطباعه, وأخوكو الخايب, مسيره يرجعلكم بالورق الأصفر, وهو بيعيط علا خيبته, إوعو تسمعو نصيحته لما يـقـول لكم: إحنا حاجة واحدة, أبونا واحد وجدنا واحد, فـ لازم يكون إسمنا واحد وشكلنا واحد, وكلامنا واحد ... لو سمعتم كلامه هتخيبو زيه!
وتوتا توتا...

#سامي_حرك (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل