مربوط بدوباره ، وهايطير .. (( قصائد غير معروفة لشاعر سابق مغمور ..))

حمدى عبد العزيز

الحوار المتمدن-العدد: 4627 - 2014 / 11 / 8 - 14:01
المحور: الادب والفن
    

بيحب سيرة البحر ..

موت ،

وبعبط مش عادى ،

فجأة .. بينتبه ..

على فكرة انه ..

إذاى مارحشى - ف يوم - قلع هلالهيله ،

ونزل ف الميه ،

وضرب غطسين ،

وبلبط ...

برجليه ،

ودرعاته ...

( بكل جسمه ، وروحه .. ) ف البحر ...

الى بيزقطط ..

بدراعات .. اللى نازلينه ...

.... ... .... ... ... ...

... .... .... ... ... ...

.. .. .. .. ( هيه دى ... ... ... )

، أتاريه ...

بيهرش

- من سنين - ف دماغه ..

من فكره لحوحه مغلباه ،

وبتختفى - دايما -

ف أول مايلاقيها ...

( آديه مسكها ،

وابتدا يحجل برجليه لشط البحر .. )

، ف اللحظه اللى

- هب -

هاينزل الميه
، وهايضرب شقلباظ ف البحر ...
فيه حاجه - فجأه - شدت رجله ...

فااتشنكل ،

وقع على وشه
ف الرمل ...
.. .. .. .. ( اللى اتحشت مناخيره بيه ... )

... ... ...

ابتدا - من وقتها -
يحس بحقيقة ...
انه مش للبحر ،
وانه مش لحاجات كتير
هايروحلها - بعدين -


( ... أتاريه ... من وقت طويل ،
مربوط ... بدوباره طويله )
طويله ، لدرجة ...
انها كافياه
ف مجيه ، ومرواحه ..
لآخر الدنيا ،
وأولها ..
...
.. .. .. .. ( مربوط بدوباره ، ومش حاسس بيها ... )

أتاريه ..

بيمشى بحجله ف رجله ،
ومش دريان ،
عمال بيقضى ..
ف أيامه ،
وعايش ...
على انه سعيد ...
بالحريه اللى ماسكها وماسكاه ..

.. .. .. .. .. ...

وآديه - بيشيل بطيخته ،
ورغفين العيش ،
والجبنه الرومى ،
وقرطاس الطعميه ،
وبيروح دايما يتعشى ...
... .... .... وبيجامع - بسعاده عاديه -
مراته ،
وبينام
بدوبارته إياها ...
... ( واللى مايعرفشى .. انها مربوطه ف رجليه .. )
مليان - دايما - بحقيقة ..
انه .. ثوانى ،
وهايطير ،
هايهز - بجناحاته طبق الدش بتاع الجار ..
(اللى بيضحك - على طول -
من بلاكونته )

على حجلة رجليه ،
وطريقته ف رد السلامات ...
بإيديه
اللى ماصدقشى ف يوم
انها مش جناحات ،
هاتشيله لفوووق ،
وبعيد عن رؤسائه ف الشغل ،
وأصحابه الأندال ،
اللى سابوه - ع الأرض - وطاروا ،
وسايبنله ..
أصحاب مربوطه بدباير زيه ...
.. .. ..
من ساعة مااتشنكل ،
وانكفى على وشه ...
قدام البحر ...
مابطلشى حنين ،
وأغانى قديمه ..
ف سره ..


دلوقتى بيمشى
بإيدين نازلين ف جنابه ،
ورجلين
(( وعيون عماله تدور ..
على قبضة إيد ...
مجهوله ،
هاتكون مقفوله - بحرص شديد -
على طرف دوبارته ... )
.. .. .. .. .. .. .. ..


----------------------------------------
(( حمدى عبد العزيز - 12/7/ 2002 ))

#حمدى_عبد_العزيز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل