طارت فى اتجاه البحر .. (( 5 - قصائد غير معروفة لشاعر سابق مغمور ))

حمدى عبد العزيز

الحوار المتمدن-العدد: 4622 - 2014 / 11 / 2 - 00:25
المحور: الادب والفن
    

الست ...

اللى دايما قلبها

بيشيلها ،

ويطير ف اتجاه البحر ،

والمزيكا،

والرسومات،

وطعم الشعر

مش ممكن تسيب روحها

رهينه

ف بنطلونه

.... ... ... ... .... .... ... ..
، الراجل

اللى بيتقلب ف الليل على شكل خرتيت ،

بيقلع بدلته ،

ويطفى نور الأوضه ،

بيطارد كيانها

- اللى انكمش ف الحيط -

ويصطادها ،

بمنتهى الإصرار ،

وبالقلب البليد

بيطبق كف ايده الميته

ع البنت

- اللى كانت جوه منها -

ف أول الكليه وف أول قراية الشعر

والروايات

.. ... ... ... ... ...
.. ... ... ... ... ...
الستات ..

بتطير الليله

ف سموات سرايرها ..

اللى بترقص

بغرام مجنون

وبلوعة حوامان جناحات الرجاله عليهم ..

...

إلاها ...

بتنام بعيون مفتوحه

وملزوقه ف سقف الأوضه ،

وبراجل ..

ببجامه ،

وروب ..

وممدد ،

بيراجع - ف سريره -

أوراق الحزب ،

وحسابات البنك ،



وهايقلب أوراق الجورنال ،

ويراجع أسعار البورصه اليوم ،

ويطفى سيجارته ،

ويحط النضاره على الكوميدينو ..

وهاينام

........




(( حمدى عبد العزيز ))
---------------
30 أغسطس 2002

#حمدى_عبد_العزيز (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل