مجّدي ما يحب مجّدي

أياد السماوي

الحوار المتمدن-العدد: 4385 - 2014 / 3 / 6 - 19:42
المحور: مواضيع وابحاث سياسية
    

مجّدي ما يحب مجّدي
بعض الأحيان من تسمع تصريحات بعض المسؤولين أو بعض السياسيين , ما تدري تضحك على هذه التصريحات المخربطة والسخيفة والي ما تنم عن أي وعي سياسي أو حس وطني مخلص , ما أدري تبجي على حظ العراقيين المساكين الي جابلهم وكتهم هاي النيمونات الي ما عدها لا غيرة ولا غرغرة , هسه هذولة الي طلعوّا روسهم صار يومين وصار يتناخون ويتباجون على الدستور الي يريد نوري المالكي يتجاوزه , زين انتوا ما تستحون على رواحتكم ؟ , وين جنتوا عن هذا الدستور من ضربه كاكه حمه عرض الحايط وراح وقّع عقود النفط وي شركات النفط العالمية من غير علم وموافقة الحكومة الاتحادية ؟ , وبعد وين جنتوا عن هذا الدستور من باك النفط كاكه حمه صار سنتين ويبيعه وما ينطي عانة حمرة للحكومة الاتحادية , وجماله محد يعرف فلوس هذا النفط وين تنزل او وين تروح ؟ , وبعد وين جان هذا حرصكم يا سيبنديه من عطلت رئاسة مجلس النوّاب اعمال هذا المجلس وحوّلته إلى مكان للصراعات السياسية والطائفية والقومية ؟ , هسه صار الدستور عدكم مقدّس ولازم نوري المالكي ما يتصرّف خلافه وما يتجاوز على صلاحيات هذا المجلس ؟ , زين يا سيبنديه شيسوي المالكي بهاي الحالة ؟ يخلي الناس بلا رواتب وتتعطّل كل اعمال الدولة ؟ , لو انتوا ما يهموكم الناس إذا استلموا رواتب أو ما ستلموا ؟ , لو همكم بس اشلون تسقطون نوري المالكي ؟ , مو الأولى اتسئلون حفيد محمد النجيفي انت بيا قانون تحجب وتمنع مشاريع القوانين الي تبعثها الحكومة وما تعرضها على مجلس النوّاب ؟ .
بعض المرات اسأل نفسي واكول شنو سبب هذا العداء والتناحر بين الأحزاب الشيعية الي تخليهم متناحرين بهذا الشكل المخزي ؟ , هل مثلا توجد بينهم خلافات فكرية أو آيديولوجية أو عقائدية تخليهم متعادين بهذا الشكل ؟ , الحقيقة كلما ردت أوصل لسبب واحد مقنع ما كدرت اوصل , إلا لسبب واحد هو ( مجّدي ما يحب مجّدي ) , وإلا شنسمي تصرفات هاي الاحزاب الي تدّعي أنها إسلامية والي هي ما إلها أي علاقة بالأسلام ؟ , وراح أذكر الكم مثال عن سلوك شخصيتين سياسية شيعية , واحد مؤمن وداعية والآخر كافر وملحد مثل ما يكولون للناس , الأول هو ابراهيم الجعفري ( كلكم تعرفوه ابو الشفافية ) والثاني هو حميد مجيد موسى ( هم كلكم تعرفوه ابو خدود الموردة ) , ونشوف حضورهم بجلسات الدورة السابقة للبرلمان السابق , وكم مرّة غاب ابراهيم الجعفري وكم مرّة غاب حميد مجيد موسى عن حضور جلسات المجلس السابق ؟ , وبيني وبينكم انا مرّات اكول هذا حميد مجيد موسى ما يصخن ما ينّشل ؟ والله صارت حسرة بنفسي اشوفة مرة وحدة غايب وما حاضر بالمجلس , وعند النتيجة يطلع حميد مجيد كافر وملحد وابراهيم الجعفري مؤمن وداعية , بله بربكم وبدينكم هذه عدالة ؟ , هسه اليوم الجماعة سيد عمار وسيد بهاء شاكين ارواحتهم على الدستور الي يريد نوري المالكي يتجاوزه , هسه لو ضامين روسهم وما حاجين والله هوايه اشرف الهم , ويخلون همه رئاسة المجلس ترد على اتهامات رئيس الوزراء , يعني مو المفروض انتو أبناء مذهب واحد وعقيدة وحدة تكونون أيد وحدة وتراعون مصلحة شعبكم ؟ وينها مصلحة شعبكم الي راعيتوها وتجاوزتوا بيها على مصالحكم الشخصية ومصالح احزابكم ؟ وتكولون على الشيوعيين كفره وملحدين , دصيروا بنزاهة الشيوعيين وبحرصهم على مصالح شعبهم , حتى نصدّك بيكم , والله هذا الي تسوه وي شعبكم مخجل ومعيب , ولكم شراح يكتب التاريخ عنكم يا مصّخمين ؟ .
أياد السماوي / الدنمارك

#أياد_السماوي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل