امثال مصرية (2)

مجدى زكريا

الحوار المتمدن-العدد: 4374 - 2014 / 2 / 23 - 12:59
المحور: قراءات في عالم الكتب و المطبوعات
    

+ اللهم طولك ياروح على هذا اللوح. + الام تعشش والاب يطفش. + ايد على ايد تكيد. + المشى احسن من الحماره العرجة. + اكل الفلاح تفاح , قال الفجل احسن.
+ طول ماهو على الحصيرة , مايشوف طويلة ولا قصيرة. + منين تجيب الريحة الحلوة يا مشؤوم , وامك البصل وابوك الثوم. + ذهب الفلاح الى المدينة فاشتهى العسل والطحينة.
+ الضمانة اولها شهامة , واخرها غرامة. + بصلة المحب خروف. + صاحب القرش صياد. + لولا اختلاف النظر , لكان التاجر جبر. + عنده بضاعة والناس جواعة.
+ ضيع سوقك , ولا تضيع فلوسك. + مايمدح السوق الا من ربح. + اللى عجبك رخصه هترمى نصه. + ماياكل التاجر الا التاجر. + ماتشتريش من اتنين ولا تبعش لتلاته.
+ فتحوها الفيران ووقعوا فيها الثيران. + من عاشر غير نده , دق الهم على قلبه. + افتكرلك ايه يا بصلة , وكل عضة بدمعة. + صباح الخير يا جارى , انت فى حالك وانا فى حالى.
+ اللى لا يطعمك ولا يسقيك , لا يميتك ولا يحييك. + من فاتك فوته وارتاح من قهره , وان كنت عطشان ماتفوتش على نهره. + اللى يحبه ربه , يجيبله حبيبه جنبه.
+ اللى يضحك فى الاّخر , يضحك للاّخر. + اللى يحب انسان يكثر من ذكره. + ان عشقت اعشق قمر , وان سرقت اسرق جمل.
+ ان حبيت دارى , وان كرهت دارى. + انسى الهموم , انسك يدوم. + اول الحب هزل , واخرته جد. + اللى له حبيب , فى المنام يشوفه. + ست وجارتين على قلى بيضتين.
+ ضربت معاه لخمه , جاب الخضار ونسى اللحمه. + بره وجوه فرشتلك , وانت مايل وايه يعدلك. + ياوحشه كونى نغشه (دمك خفيف). + كل الجمال تتعارك , الا جملنا اللى بارك.
+ ياداخل بين المسك والريحه , ماينوبك الا الفضيحة. + مالقيوش العيش ياكلوه , جابوا عبد يلطشوه. + عضة اسد ولانظرة حسد. + وفرى على نفسك يا حماتى , مالى الا مراتى.
+ الديون تتسد والعدو ينسد. + الشاطرة تقضى حاجتها , والخايبة تنده جارتها. + توب الضرة مر , ومن لبسه , اتقل حياه. + العاقلة والمجنونة , عند الراجل بالونه.
+ جت الدودة تقلد الثعبان , اتمطعت قامت اتقطعت.+ اكل وراحة , يزيد الصبية ملاحة. + ان خف العليل , من حظ الطبيب. + اكبر منك بسنة , يعرف عنك بدهر.
+ اغسلى وشك تفوقى , ونضفى بيتك تروقى. + اسأل مجرب ولا تسأل طبيب. + اللى ياكل وينام , يشوف الويل فى المنام. + ارقد دافى , تقوم متعافى. + اكل العيش زى ضرب السيف.
+ فاتت عجينتها فى الماجور , وراحت تضرب فى الطنبور. + من عرف حقيقة حاله , انشغل باله. + الزغاريد بالمحبة , والنقوط بالفرض. + اللى ما يعملش حساب , مايساويش التراب.
+ الكلام بلا تفكير , كالصيد بلا تصويب. + اللى ماتكفيه الاشارة , ماتكفيه العبارة. + اللى تتغير محبتها تتغير مخدتها. + الابرة ماتسعش خطين , والقلب مايسعش اتنين.
+ اللى يسعدها زمانها , تجيب بناتها قبل صبيانها. + قبل ماتحبل حضرت الكمون , وقبل ماتولد سمته مأمون. + مانبنا من غربتنا الا عوجة ضبتنا. + زى مرزوق يحب العلو , حتى على خازوق.
+ كتر النخس يعلم الحمار الرفس. + زى كلام الغربان , اوله كاك وآخره كاك. + زى الابرة , تكسى الناس وهى عريانة. + الست والجارية على صحن بسارية (صغار السمك).
+ اقرع ونزهى. + الميه تكدب الغطاس. + دبور وزن على خراب عشه. + الفلوس مع التيوس. + البقره لما تقع تكتر سكاكينها. + + اتمسكن حتى تمكن.
+ دخول الحمام , مش زى خروجه. + اسمع كلامك اصدقك , اشوف امورك استعجب. + لا تصاحب الاقرع ولا تاخد منه نصيحة. + الحظ لما يواتى , يخلى الاعمى ساعاتى
+ فى الوش مرايه , وفى القفا سلايه (شوكة كبيرة). + الحاجة اللى ماتهمك , وصى عليها جوز امك. + بارك الله فى المرأة الغريبة والزرعة القريبة. + اللى يتجوز امى , اقوله ياعمى.
+ اللى تقول عليه موسى يطلع فرعون. + يامصبر الوحش على الجحش. + صاحب الجاموسة يحسد صاحب المعزة. + حبيبك يبلع لك الزلط و وعدوك يتمنالك الغلط.
+ خنفسة شافت ولادها عالحيط و قالت يامحلا ولادى زى اللولى فى خيط. + اللى على راسه بطحة يحسس عليها. + ياما تحت السواهى دواهى. + على كد لحافك مد رجليك.
+ تحت العمة قرد. + يا مأمنة للرجال , يامأمنة للمية فى الغربال. + اللى ماعندوش , مايلزموش. + القرد فى عين امه غزال. + يقولوا تور , يقولوا احلبوه.
+ المتعوس متعوس ولو حطوا على راسه فانوس. + ضرط الامام , خريوا المصلين. + لاقينى ولا تغدينى. + امشى فى جنازة ولا تمشى فى جنازة. + اللى ياكل وحده يزور.
+ قليل البخت يلاقى العضم فى الكرشه. + اللى اتلدع من الشوربة ينفخ فى الزبادى. + قيراط حظ ولا فدان شطارة. + داخل بيت عدوك ليه , قال حبيبى فيه.
+ اللى يربط رقبتة بحبل , كل الناس تجره.
امثال فكاهية
+ فاقد الشئ , يدور عليه. + اقلب القدرة على فمها , يدلق مافيها. + تأتى الرياح , محملة بالاتربة. + ياخبر النهاردة بفلوس , بكره ينزل عليه تخفيض.
+ اللى معاه قرش محيره , يشترى حمام ويحمره. + جت الحزينة تفرح , شغلت شريط حكيم وقعدت ترقص. + قال يامحششين يكفيكم شر الكمين. + اللى ياكل وحده , يشبع.
+ رب صدفة , خير من الف ليلة وليلة. + اطبخى ياجارية , الانبوبة فاضية ياسيدى. + لو حبيبك عسل , ماتخلطوش بطحينة. + اللى اتلسع من الشوربة يتصل بالمطافى.
+ ورجعت ريمه , من عند خالتها فى مارينا. + ياداخل بين البصلة وقشرتها , اتعطر الاول. + اصوم اصوم , وافطر على مدفع رمضان. + المضطر , يركب التاكسى.
+ ضربوا الاعور على عينه , قالهم كسرتوا النضارة. + اللى مايشوفش من الغربال , يكشف نظر. + من خرج من داره , ماينساش ياخد المفتاح معاه.
+ اللى يخاف من العفريت , يعمل عبيط. + المركب اللى فيها ريسين , يلعبوا طاولة. + اللى مايعرفش , يقول , ايه اللى بيحصل هنا. + اكل العيش , يحب الطعمية.
+ العين عليها , عدسات. + قالوا للحرامى احلف , قالهم وحياة قلبى وافراحه. + الباب اللى يجيلك منه الريح , شيله وحط مكانه حيط. + حبيبك يبلع لك الزلط , بشوية كولا دايت.
+ العيار اللى مايصبش , يبقى انطلق من طبنجة حلوان عيار 9 مللى. + اصبر على الجار السو يا يرحل , يا تجيله ازالة من الحى. + اصرف مافى الجيب , يخرب البيت.
+ ياواخد القرد على حاله , بكره يروح القرد وتقعد انت بداله. + قالوا يا قاعدين , والله ما انتو قاعدين. + العروسة للعريس , والجرى لاصحاب الاقساط.

#مجدى_زكريا (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل