بوست الفيس المعنون : اكتب 10 أسماء 10 كُتب أثرت في حياتك

مختار سعد شحاته

الحوار المتمدن-العدد: 4303 - 2013 / 12 / 12 - 17:17
المحور: الادب والفن
    

اسمحوا لي في البداية يكون كلامي بالعامية، دا بس تأسيس للاختلاف، اختلافي مع البوست في الفيس بوك والذي ابتدا في الانتشار بسرعة غير اعتيادية، وهأبدأ بسؤالي:

هي الناس بتقرا علشان تقول هي قرأت إيه؟؟، ولا بتقرأ علشان لازم نقرا، ومينفعش منقراش؟؟!!.. بجد مع كل الاحترام لكل قراءاتكم يا أصدقائي الأعزاء وبوستاتكم.. بس أنا لا يهمني أنتم قرأتهم إيه.. أنا يهمني أنتم اتغيرتوا وبتتغيروا قد إيه!!! فمن فضلكم أنا بأحترم بوستاتكم ومنشناتكم بس أنا مش عايز أعرف أنتم قريتوا إيه، ولا يهمني إن حد يعرف أنا قريت أو بأقرا إيه.. لكن يهمني أنتم في النهاية بعد قراءة البوست ده شايفين الكتب دي اللي قلتوا عليه غيرتكم قد إيه؟؟ ويا ترى هل قبلتوا اختلافي معاكم في البوست الفشيخ اللي لافف الفيس رايح جاي، ولا "تشيفنتم" وأنويتكم سيطرت؟ أهو.. شوف أهو أنت جواك عايز تشتم!! مش هتشتم.. يعني قبلت اختلافي؟؟ ولا برضه حسيت بإن في جواك كلمة لازم تخبطني بيها؟ لسه بعد اللي حسيته وانت بتقرا المقال ده مصمم إنك قريت كتب وغيرت حياتك؟؟ متأكد إن الكتب غيرتك؟

أرجع تاني وألاقيني بأقول لنفسي: بس دا الأهم من الأسامي بتاعة الكتب موقف الناس بعد قراية كلامي ده... وبصراحة أنا شايف ده إدانة مش مصدر فخر.. واحدة واحدة بس قبل ما تنفعل وتتهم، الكتب دي أفكار لغيرك، وفعلا غيرت في ناس كتير، بس غيرت إزاي؟؟ بنفسها، لوحدها؟؟ ولا الناس طبقت أفكارها وانفعلت بيها في سلوكها وحياتها؟؟.. يعني أنتم وتكوينكم كله أفكار غيركم.. يعني حفّاظ.. طيب إيه؟؟؟ حضراتكم مش ناويين يعني تفكروا بنفسكم ويبقى لكم كتبكم الخاصة اللي برضه ممكن تغير في حياة الناس للأحسن؟؟ مش شرط كتب عظيمة ممكن كتاب واحد بسيط، أو ورقة مكتوبة واحدة، ممكن تكون قرار بتخده في شغلك، أو حياتك كلها تتغير بسبب حاجة انت قررت تكتبها.. شخصيا انا عارف ناس ناجحة جدا في حياتها كان سبب نجاحها جرة قلم على ورقة وقدمت استقالتها من شغل كان هو سبب إزعاج حياتها، بعدها الناس دي ورغم معارضضة المحيطين تحولوا لأشخاص ناجحة جدا والكل بيحسدها..

اكتبوا عشر قواعد للكتابة والقراءة بدل عشر كتب بتاعة ناس تانية، ودا مع كل الاحترام للكتب وللناس اللي كتبت وللناس اللي قرأت... ومحدش يقول لي إن الكتب هتدل على صاحبها لأن كتير من "المنشنات والبوستات" في الفيس بوك فيها كتب سماوية زي القرآن والعهد الجديد والقديم.. وتقريبا ولا واحد خد باله إنها بتقول لنا اقروا وفكروا وإبدعوا أنتم كمان وتأملوا مش قولوا للناس الكتب اللي قرأتها، ومش معناه إني ضدد كتابات الناس لأسماء الكتب، بس يا ريت يكتب لنا بصدق كمان موقف سلوكي حياتي شخصي استخدم فيه أفكار كل كتاب من العشرة.. ولا الموضوع هيكون زي ما قلت أن ناس بتقول أحنا قرينا كذا وكذا وكذا من عظام الكتب، ومع ذلك هيرفضوا اختلافي معاهم بمقالي ده.. تفتكروا يا أصحابي الأعزاء، هل أنا لما قبلت صداقاتكم، كان يهمني أنت قريت إيه؟؟ ولا بتقرأ لمين؟؟ انا كان يهمني انت فكرك إيه؟؟ سلوكك إيه؟؟

صدقني ممكن كتب كتير تغير، وممكن كلمة واحدة تغير، وممكن ملايين القراءات تغير بس للأسوأ، من فضلك وأنت بتكتب اسم كل كتاب قريته، واسم صاحبه، اكتب لنا السلوك الإنساني والقيمة الإنسانية اللي حرصت عليها والتزمت بيها في سرك وعلانيتك بعد قراية الكتاب، وإلا يا صاحبي فأنت محتاج تعيد القراية، بس المرة دي مش للكتب، انت محتاج القراية للي جواك، لسلوكك، وسؤال نفسك، هي دي قناعاتي اللي الكتب غيرتها فعلا ولا دي قناعات ناس تانية لها ظروف تانية وحالة إنسانية تانية، ممكن صحيح نستفيد منها ونتفاعل معاها بالإيجاب مش بمجرد القراية وسردها..


لسه برضه مضايق؟؟ مكملتش قراية المقال؟ وحسيت إنه استفز؟، شفتني جاهل ومش فاهم المغزى من البوست على الفيس بوك؟ طيب لسه مصمم إن الكتب دي فعلا أثرت في حياتك؟؟ طيب على فكرة أنا موجود في حياتك وليه حق في الكلام والشعور والغضب والعصبية زيك تمام، ورغم كده مش عايز أقول لحد انا قريت إيه ولا بأقرأ إيه، لأن شايف الأهم انا هاتعامل معاك بإيه وعلى إيه بعد كل الكتب اللي قريتها وحسيت إني كنت إيجابي مع أفكارها.
هاكتب أنا كمان بوست على الفيس بوك بس دا نصه "اكتب أسماء 10 صحاب اتفشخوا شبهي من البوست بتاع أسماء10 كتب!!"

مختار سعد شحاته.
Bo Mima
روائي.
مصر/ الإسكندرية.

#مختار_سعد_شحاته (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل