من سلسلة حكاياتي مع العفاريت -حكي بالعامية المصرية-.. مقابلتي الأخيرة مع عفريت الفانوس

مختار سعد شحاته

الحوار المتمدن-العدد: 4270 - 2013 / 11 / 9 - 01:26
المحور: كتابات ساخرة
    

[.......]
بعدها وفي نهاية اليوم رفع عصايته السحرية في الهوا، وبحركات استعراضية طارت نجوم حلوة منها لونها موف وبينك وتوركواز، وبعد ما رفع راسه من على نقطة محددة في الأرض سألني، (اطلب يا ميخا آخر طلب لك، وبعده أتحرر من تعويذة الملك النبي سليمان اللي رماها عليه يوم ما رعت راسي وقلت له تعبت من الحفر يا سيدي سليمان في النيل، وإن كل الحفر ده هيجي يوم ويبقى زي عدمه)، ساعتها نطت في دماغي نهر النيل والأزمة بتاعة سد النهضة، وقلت دا عدل رباني، أيوه هو نهر النيل وحصته، وأكيد الفانوس ده ربنا كان عاينه ليه أنا، وتحت ضغط ضحكه العالي اللي بمناسبة مش زي عفريت إسماعيل يس بتاع "اطلب يا مصطفى يا ابن نفوسة"، والحمد لله تاني إني مش مصطفى وإن أمي مش نفوسة، لقيتني على سيرة الأم، بيجي في دماغي أغنية الفنانة عفاف راضي فقلت الحمد لله إنها مش عفاف شعيب ، لأحسن كان جوزها الظابط اللي في الجيش، ومش بيطيق رأفت أخوها، ودا بقى رأفت اللي عملوله مسلسل 3 أجزاء وفي رمضان واللي عمل مزيكته الفنان عمار الشريعي، شوفوا بقى ممكن يعمل فيه إيه، فحمدت ربنا تاني على ان الأغنية بتاعة الفنانة عفاف راضي، وقلت مفيش أحسن من إن الواحد يفضل راضي بالحال، وأدينا عايشين، ومع عايشين دي هوووووووووب جه في دماغي والأغنية شغالة برضه في دماغي، ومتسألنيش إزاي الأغنية جت في دماغي وكمان في نفس ذات اللحظة جت حاجة تانية، المهم اللي جه في دماغي حمدت ربنا إنه جه لوحده كده، من غير انتخابات ولا دياولوا لأحسن بجد كنت لو جيت أشيل الحاجة اللي جت في دماغي دي كانت حاجات تانية مش في دماغي ممكن تقول لي لا الحاجة دي أصلا جت دماغي بالشرعية، وانا اليومين دول من ساعة الكلمة دي ما ملت البلد، وأناحاسس إنها كل لما تتردد كل لما ألحد أكتر، والشارع يزيد في البعد عنها، تاني اتكررت الأغنية وكررت معاها "مصر هي أمي".. ساعتها افتكرت الواد "تيركس" صاحبي لما بيقول لي لما أعمل حاجة تبسطه "حبيب دين قلب أمي"، وإنه بيقول أن مصر برضه أمه، ورغم الارتباك اللي حصل لي لأني أول مرة أعرف ان "تيركس" صاحبي أخو الفنانة عفاف راضي وإنهم من أم واحدة، لكن قلت هو كده القلب له دين؟؟، وبسرعة ناداني تاني وقعد يضحك "بسرعة يا ميخا، قول طلبك الأخير يلا"، تاني رجع يضغط عليه، فبصيت ع الفانوس وقلت أنا أسأله على إزاي وهو بالحجم ده بيدخل الفانوس الصغير، وفجأة وعين حضرتك ما تشوف إلا النور، لقيت بص بصة شبه البتاع اللي بيعملوه في الفيس بوك لما يعملوا الأقواس والنقطتتين اللي فوق بعض، وقال لي "جرى إيه يا روح أمك، ما تغيروا بقى أم الخدعة القديمة دي".. يا خرابي دا طلع بيقرا الأفكار، يعني انا في مشكلة، لقيته بيرد "مش أحسن يا روح أمك ما أفتحشي كتاب في حياتي ولا أقرا غير الجرنان، وأقعد قدام شوية عرايس المولد بتوع التليفزيون".. تاني تاني تاني.. يا خرابي دا بيقرا أفكاري.. وساعتها حمدت ربنا إن المذيعة اللي فردة من حمالة صدرها أكبر من جمجمة رأسها".. ههههههههههههه "يا ابن المرة!! تصدق الموضوع ده شاغلني أنا كمان".. قال لي كده وهو ميت على روحه من الضحك،.. ساعتها لقيته حلو قووووي زي عروسة الواد الأجنبي صاحبي، وجت في دماغي الفكرة حالًا، أنا هاطلب طلبي.. "أنا عايز أعمل فرح كبير يا ريس".. شاور لي وهو لسه بيضحك وبيخبط على ركبته.. وكانت بالنسبة لي مفاجأة غن العفاريت لهم رُكب ولما بيموتوا على روحهم من الضحك بيخبطوا عليها.. "عارف فعلا دا حتى مفيش لا عفريته ولا جنيه صدرها أكبر من دماغها.. البنت دي منين".. قالها ورجع تاني يخبط على ركبه، سكت وخفت أضحك لأحسن العفاريت ساعات مش تعرف هما بجد بيضحكوا ولا بيعملوا لك خطة للإيقاع بيك.. قلت له انا عايز بقى آخر طلب تعمل لي فرح كبير نجوزا فيه أبو الثوار لأم المصريين، وترقص لهم ست البنات، ويكتب كتابهم الشيخ عماد عفت، والشهود يكونوا خالد سعيد ومينا دانيال، وكمان الفرح ده يتعزم فيه كل الناس في مصر، والعساكر تضرب "كنابل" بالزوفة، والطيايير تلف في السما ترسم قلوب، وكمان لازم يكون في أكل في الفرح ولازم تكون فتة واللي يطبخها الناس الطيبة بتاعة ربنا اللي كانوا بيطبخوا في رابعة والنهضة لان طبيخهم حلو وفتتهم تاكلها من هنا وتنام، وبالنسبة للحفلة بالليل أنا بقى عايز ها زي كده يا عفيت يا صاحبي زي "عرب آيدول".. فرقة هتغني تسلم الأيادي، والفريق التاني ممكن يغني "يا انكلابي أنا مش إرهابي".. بص لي ساعتها العفريت وكان مركز قووووووووووووووي وقال بس كده، ساعتها افتكرت كل الحاجات المهمة في حياتي وقلت له لاااااااا استنه لازم يكون في المعازيم اللي يطلعوا ينقطوا على المسرح "سامي عنان" بس يكون فوتوشوب، وكمان يكون في إيديه قواشيط الطاولة ويرشهم على البت الرقاصة اللي هبلت البلد اليومين دول،.. ساعتها لقيت العفريت اتقتل م العياط وقال لي أنت بتقول مين؟؟؟ يااااااااااااااااااااااااه هو لسه عايش الراجل الطيب ده؟!!! ياااااه انا بأحسبه روحه راحت في الاجتياح الروماني لمصر.. والله لأروقه فوتوشوب، وكوميكس، ومش بعيد أعمل له صفحة ولا جروب، وأكيد هأعمل له هاش على توتير.. حمد ربنا ان طلبي الأخير وحلم حياتي هيتحقق.. ولما قام الراجل علشان ينفذ لقيته سألني سؤال لولبي وغمز بعينه "ألا صحيح هو الدكتور الإعلامي أبو العكايش ممثلشي مع نجيب الريحاني قبل كده؟؟!!".. غمز بعينه تاني وقعد يضحك ويقول "أكبر فعلا من جمجمة راسها".. وغرق ف الضح تاني وهو بيتبخر وبيقول "فيرررررررررررررررررررريدم.. فيررررررررررررررررررريدم فرررررررررريدم".. حمدت ربنا إن محدش شافنا وصورنا لكان مفجر ثورة يونيو توفيق عكاشة حد صورنا سوا ورفع الصورة على الانترنت، ويقوم الدكتور تيفه جايبها وقايل إننا طابور تاسع وأن في مخطط مع العفاريت الزرق ضد مصر.

مختار سعد شحاته.
Bo Mima
روائي.
مصر_ الإسكندرية.

#مختار_سعد_شحاته (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات