مجرد كلااام.. نص بالعامية المصرية.

مختار سعد شحاته

الحوار المتمدن-العدد: 4170 - 2013 / 7 / 31 - 16:40
المحور: الادب والفن
    

مجرد كلام...

اخترع ف حالات كتيرة علشان تصدق..
جرب تصاحب م الحروف حبة كلام...
وتزوّقه ...
بس اوعى تنسي:
- إن القسا فعل إنساني بحت زي كل فعل بتعمله.....
مجرد كلام وخلاص...
كان نفسي يبقى قصيدة بتوصفك أو بتفسر في تفاصيلك.....
صحبتك لما فات يوم ميعادكو الأولاني قالت:
"راحت عليّا نومه"!-
والنوم فعل إنساني بصحيح،
وحلمتْ أحلام البنفسج الطموح يلمس بياض حتة من دراع البنت
وبطنها الناعمة طرح العرجونات المستوية....
وبدأتْ تتعلم ف تراتيل كل آيه بتقول احلموا...
والتمرد اللي كان برضه فعل إنساني بحت فجأة أصبح متهم إنه خسيس....
معرفشي ليه؟!
وليل الشتا ف بلدكم المنسية م التأريخ علمك تأويل المعاني
واختصار لغة الحروف جوه شنطة كات هدية في يوم ميلادك اللي جه متأخر السنة دي ألف عام....
كأن رسمة للبيوت في اسكتش رسم مش أليف وبيخاصم ملامحك ع الورق....
ويسربك قبل إعلان الهزيمة بألف ذكرى،
تفتكر ممكن يكون إفتراضك يوم حقيقة ويرفضك؟؟!!
أو يتخيلك مجنون كبير بيبعتر الألوان ما بين حروف متشعلقة بمشابك خشب ؟
لفّ الحكاوي ع الودان يفرق كتير عن لفها بين القلوب...
علشان تلاقي مطرحك بين ندّابات الفرح والتمر والزيتون في سورة التين وتقويمك الإنساني ف أحلى الصور....
مكتوب ما بين غزل البنات والكباين الصفرا على الكورنيش بلون غطسة محار تشبه "دارين" اللي كانت تعرفك من مليون وجع فاتوا ولا كملوش الجرح للآخر..
إنك خلاص...
لازم تراجع تواريخ تذاكرك قبل السفر،
وبالرضا تحدد ف محطة نزول متسربعة
و ممنوع عليها كشف أسباب الهموم اللي بانت طول رحلتك
وتعِد كام رزمة ورق تتحمل الحبر الجديد....
احتمال خجل الخريف لما يتراجع؛
يسيب لك كام علامة ع الليل الطويل من وحدتك بعد الصيف الجرىء،
ولأن استغاثتك المشروخة والملفوفة ف علب القطيفة بالسوليفان ممكن تشاور من بعيد وتقول:
- دا حالك....
خلّي بالك تفضحك الخطط الهزيلة
وتقرر تترجم كام رسالة
هتخدعك فيها نفس الحروف اللي كانت حبيبتك سيبهالك بين سطورها المحبوسين عند الحرس ف مدخل النادي الكبير....
ولأن إسكندرية ساعات جريئة،
وياما بتدوّب ف الشوارع سكر نبات يسكرك في نهاية الكورنيش....
جرب تداري انشغالك بعد الحصى وكل رملة بتشبهك هناك فى قرب النيل المسافر رحلتك وتملي بيجي متأخر ف آخر الليل...
من النهارده...
اتعلم تعمل دواير بدخان السيجارة الدايبة ف عود كبريت ولا بيولعش غير مرة..
واجمع أدلة اتهامك....
وسلم نصك المسروق لواحد تاني ميستهلوش.

Bo mima
مصر- الإسكندرية

#مختار_سعد_شحاته (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل