من ذكرى ايام الدراسة

حامد الزبيدي

الحوار المتمدن-العدد: 4233 - 2013 / 10 / 2 - 06:39
المحور: سيرة ذاتية
    

لا تروني هاشا باشا ... فاني صلد جلد ... انا ابن الكرخ ... قنادر على راسكم ..... اليوم العب بيكم طوبة , اليوم اخلي الميشتري يتفرج عليكم يا كدش ...والله احسن واحد بيكم ....ميصير بياع لبلبي ..... لك انتو هم حاسبين نفسكم طلاب ... قشامر .....ولما كان صفنا قريب من الادارة ....سمع المدير صراخ استاذ موسى (مدرس مادة الكيمياء) للصف السادس الاعدادي ...فهرع هو والمعاون ....خير استاذ .....ماكو شي ......؟؟؟؟؟
التفت استاذ موسى الى المدير واجابه ....هاي وين لاكي هيج طلاب ولد شوارع ...اني طالع وراح اطلب نقل من هاي المدرسة ...ابدا ...ما ابقى بيها .....
المدير : استاذ شنو اللي صار ...كلي واني اعرف تكليفي وياهم
المعاون :استاذ موسى ...هدي نفسك وتعال ويايه للادارة وهسة السيد المدير ياخذلك حقك ونص ...
المدير خير استاذ موسى هاي شبيه عينك: اشو مزورقة
استاذ موسى : طبعا اذا حضرتك جايبلي وين ماكو واحد هتلي بهاي المدرسة ...
المدير : ارجوك استاذ مو هيجي الحجي كدام الطلاب ... طلابي مو هتلية
استاذ موسى : البارحة جنت مراقب في الساحة ...بالدرس الاخير .. شفت اثنين ديتسلقون سياج المدرسة من جهة التانكي ..... واحد عبر والثاني جلبت برجله... دفرني وفلت من ايدية.....واجت الدفرة على عيني .......
المدير :وهويكاد ينفجر من الضحك ......شفته استاذ ...تعرفه ....كلي منو ...هسة افصلهه ...
استاذ موسى : طبعا اعرفهه وهو موجود حاليا بالصف ...بس ما اكول اسمه : ولازم الصف كله يتعاقب .:التفتنا الى المعاون .... فهو قد انسحب الى الوراء واتكأ على الجدار وهومستغرق في الضحك ....ويحاول جاهدا ان يكتم ضحكته ...
وهنا انسحب استاذ موسى غاضبا وترك المدير في حيرة من امره ....
خاطبنا المدير : قائلا ....اللي ضرب استاذ موسى على عينه ....يقف والا .....ولم يكمل كلامه واستغرق بالضحك .....
ورغم تكرار السؤال لعدة مرات لم يجب احدا من الطلاب عل تساؤل المدير ....واخيرا
نهضت ...وقلت له اني استاذ .....
المدير : لك هم انت تعال اشو تعال .....
هاي اشلون وياك .... لك مو انت شاطر ....
فخرجت من الصف وذهبت بمعية المدير والمعاون الى غرفة المدير .... وانا ارتجف ...لا ادري ماذا جال في عقلي وازدحمت الافكار واسودت الدنيا بعيني ....خلي كلشي ايسون بس لا يفصلوني .... اردد مع نفسي ......
فلما دخلنا غرفة المدير واصبحت في وسطها ....حيث كان استاذ موسى جالسا بهدوء وهو يدخن سيكارته ...... جلس المدير وتناول العصى من المعاون الذي سلمها له بخفة تعلو وجهه الطفولي ابتسامة ملئت كل وجهه وافسدت ملامحه الدقيقة .....
المدير : استاذ موسى هذاالطالب اللي اعتدى على حضرتك هو اعترف على نفسه .....وهسة راح اكسر هاي الخيزرانة على راسه ....وهنا قفزت لاقف قريبا جدا من استاذ موسى ....استاذ والله بعد ما اسويهه ....والله عبالي واحد من الصف دايتشاقة ....والله العظيم ....وهنا سالني المدير .....ليش انهزمت من الدرس الاخير ......
فاجبته استاذ : عدنا دين واني مثل ميكول استاذ تحسين (مدرس درس الدين)... دين سز ...وكل مرة يطلعني من الصف .... وحتى نلحك على طلعة اعدادية الكا ظمية للبنات ....
وي وي اجابني المدير .... وهو يكاد ينفجرمن خليط من الضحك والغضب ..... فوكاهه تعترف .....صرخ في وجهي .....
استاذ انتو معلمتونه على الجذب ....حتى نكذب ..... هنا وقف استاذ موسى مبتسما ....قال لي ....انت لومو شاطر وصادق والله ميكفيني فصلك ....عن اذنك
التفت الى السيد المدير ..... يله روح للصف ... زمال .... بعد لا تسويهه .... يلا
فخرجت مسرعا غير مصدق ..... وانا اهرول لابشر اصدقائي .... واسمع من خلفي قهقهات السيد المدير واستاذ موسى الرائع ...الذي لم انساه ابدا .......... اعفيت من العقوبة لاني شاطر ولاني صادق .... وظل هذا الدرس ملازما لي طوال حياتي ...... لكن وللامانة ... ثاني يوم بعد ما اخبرت ابي بالحادثة ...... حضر للمدرسة واعتذر عن تصرفي للاستاذ موسى وقدم له نظارة سوداء غالية جدا هدية له ....على الاقل لاخفاء اثار الدفرة .......

#حامد_الزبيدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل