عُمُرْ و عِبَر/الجزء الثاني

عبد الرضا حمد جاسم

الحوار المتمدن-العدد: 3763 - 2012 / 6 / 19 - 21:50
المحور: سيرة ذاتية
    

الْعُمُرْ....
مجموعة أعمال و أقوال أو صور
تْعَلْمْ البشر
هواية عِبَرْ
من هل العِبَرْ
1.(كلشي اليمر بالعمر يحتاج يتحلل ويتفَّسر)
2.(احذر...أبد لا تغْتَرْ
لن كلشي إلي أله أول إله أخِرْ
ومثل ماوصلت الك توصل للأخر)
3.( الوكت ما دايم الأحد
الوكت دولاب يفتر)
4.(النهر يبقى نهر... شما جره بيه الماي
والماي لو بيه شح أو نشف
يكَولون جان هنا نهر)
5.(شما طال مجره النهر
حتماً مصبه بالبحر
وما نبع لو ينبع نهر من بحر)
6.(شما با لعمر مركب بحر
مرساه حتماً علبر)
7.( شما طار طير وعله
لازم يْحُطْ... لو يعشعش علشجر
لو علأرض ينزل يَنَّكَرْ)
ـ(ألي تِهَّدَمْ بالعمر لو خُلْصَتْ النية يَّنْعُمُرْ)
8.(الْكِســـَرْ ... يوم حتماً يَّنْكِسِرْ
شما ضِحْكَتْ الْقوَه علية... وتْجَّبْرْ
ان كان هو بشر
لو كان قاسي طُبَرْ)

9.(الصار يابس...كلش سهل ينكسر
والصار مايع لين يَّنْعُصُرْ
مايه يروح بكتر
والبثل ماله ويه الزبل ينشمر)
10.(كلشي لو زودت بيه النفخ
عن حدهَ حتماً ينفجر)
11.(وكل صَلِبْ لو زادت عليه النار
يَحْومِرْ أو يمكن يُنْصِهِرْ)
12.(كلشي التِزَّيدْ عليه الضغط ينكمش لو ينحصر)
13.(كل فعل يقابله رد فعل
يعتمد علتحمل والقوه والصبر)
14.( الخشب لو لاحته النار يحتركَ
أولو طَّوَلْ عله النار يصبح خفت
ما ينفع يزيحونه كتر)
15.(الماي... مهم....و قوي مْنْ يفيض
ويطّفون بيه النار
بس لو لاحته النار يتبخر)
16.(ألي غُصَبْ يَنْغُصُبْ)
17.( والعَّيْشْ الوادم بالقهر
يوم و يْضوك شكثر صعب القهر)
17.(كلشي انكسر يَنْجِبِرْ
بس الشرف بلور من ينكسر
يطّشر أو ينّثر)
18.(النخل...شما لاحه ضرر
يمرض... يموت
بس ما حمل مالح تمر
ولا صار تمرهَ مُرْ)
19.(إن غَيَّمَتْ وأبْرَقَتْ.....حتماً وراها مطر...ينهمر)
20.(والعالي متعالي عله خالي...الهوه يوم واله يذر)
21.(الْرِدي شكَد ما تْصَّوَرْ كُبَرْ... بالرذيلة يندفن ينطمر)
22.(العمر ما بيه لَغِز يبقى لغز....ساعه واله ينحزر)
23.(الشمس...شما رادت تغطيها غرابيل الحقد والغدر
حتماً.....توزع نورها علنجوم وعلكَمَرْ
ويوصل ضواها للأرض
وبالصبح هو يْبَّشِرْ)
والنتيجة
العمر....رحله
أول محطه الرحم وأخر محطه الكَبر
يبدي بكَماط...وينتهي بخامه بيضه لعَّوراتْ البشر تستر
وهسه......يلي سْئَلِتْ عن العُمُرْ
للعمر أنْتَ قَدِرْ
وكلمن يَكَّلَكْ ها كثر
كَله غلط
لن البشر متعودة... ما تحسب أيام الرَحَمْ للعمر
كَال...هذا ألي كَلته علَّه العمر
شكَد عليك من المصايب جر
كَتله العمر....
خطوات موزونه تنمشي بكل حيطه وحذر
وهو حبل من الراسين يَنْجَرْ
وشما جَرَه بالعمر
عله هَلْحَبِلْ يَنّشِرْ
والعمر...مو ماي جربه.... نكطه نكطه يَّنَكَط
وبالهوه يتبخر
و لو تنزرف... بلايه حساب َخرْ
لا...الْعُمُرْ لَحْظَه لَحْظَه علبشر يَتْسَّجَلْ او يتأشَرْ
والبعض ويا للعجب والقهر
تْعَلِمَتْ من الزغر...عدهه العمر
مَرَهَ(امرأه) وسيارة وقصر
ختامها...
الرِحْلَه طَوَّلِتْ أشْعُرْ
أستسمحك تِعْذرْ
وكلش أعتذر
وهسه عليك أختار ...لا تحتار
قَّدِرْ أو فَسِرْ
شلون ينحسب العمر
وهلرحله من الصفر للصفر
شكَد بيها مِنْ الحلو والمُرْ مَرْ
وعليك او علغير..شكَد ترْكَتْ أثر
اصفن واستفيد او فكر
و منها استفيد...وأنفع او لتضر

#عبد_الرضا_حمد_جاسم (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل