السكوت أمن الذهب

حامد كعيد الجبوري

الحوار المتمدن-العدد: 2967 - 2010 / 4 / 6 - 02:09
المحور: الادب والفن
    

أسكت وأكتم أسرارك
وأخذهن صوغتك للموت
أبسلامه من تصل لهناك
سولف للكَـبُر بسكوت
عرفنه للكبور آذان
تسمع كل دبيب وصوت
أحذر تمشي فوك أموات
وأسحك ع البشر مبخوت
أشجم ميت صنع تاريخ
وجم يونس أبطن الحوت
أذا أفحول الزلم تنقاد
من أرعن عفن سربو،،،
يجفل نايم أبكبره
وعايش ميت أمن أيفوت
أحياء إبكبور أنعيش
ويصرخ ميت أبتابوت

















أسكت ...

كل حجي ممنوع
بعدك إزغير ومتوّزن الكلام
أشعرفك أنت صح من الغلط
وهاي جرة أذن ترجيه تصير
لهلك وجيرانك أستوعب وأستمع
وأسمعت كلشي ...
وعن كلشي أسكتت ...
وامي فطمتني أعله حب الكاع
والناس وصبرها
وآنه ساكت....
ومره رجعني اللعب تعبان لمي
وشميت الورود التـنزرع بالكون ...
فاحت من عبايتها
وحيل ضمتـني الصدرها...
ونيمتـني
أفراش رجليها الحرير
ومدت الراسي أصابعها الحنينه
أبرحمه شعري أتمسده
وكامت أتلوليلي إبنواعيها الحزينه

وصوت .....
دافي تنشده
وصبن أدموعي أبحجرها...
ودثرتـني
وبدت تحجيلي على الحوته الجبيره
تسمَن ويطوَل عُمرها....
أتعيش عالحرشه الزغـيره
وظلن أسواليف أمي
حرز ملفوف أبضفيره
وكبرت أبروحي الوصيه....
وانه ساكت..
أتهجروا شبان ديرتنه وأهلنه...
وذبحوا أزلام المزامط
واليدافع عن مصيره وينعدم
يتهم ،والتهمه سافح
واللي يذبح للألوف ويغزي للبلدان ..
فاتح
واليدكَه الجوع للعُهده يمد أيده الفلس
تنكطعله اليمنه سارق

واليبوك الوطن كله...
أنشيله عالأعناق..
ونكرمه أبمجد ونتبعَه أبيارق
شب نار الحروب أبحطب والجار
وشتت كل مضيف الأهل والجار
وينه الينصف المظلوم والجار
وضـمـيـمـتـنه خلت منها الحميه

أحجول مرتي أنباكت ، وترجية أختي
وفكها باب البرج لطيوري الأحبهن
وفتح باب كُبتنه المظلمه..
بيها يحبسني أويّ أخوتي
ونام وّي جيراني وأمي
وفرع الكل المحارم
ونهب كل خيرات أهلنه..
وفرهدونه....
وحيل فرحتنه الحواسم
(ركضوا عالصنم جي بيه صفر ينباع
ومن طاح العلم محد ركض شاله) 1
وآنه ساكت...

كالو تنفرج كلما تشد ، وتضيج
وكضَينه العمر ، نغزِل بالهوه ونحيج
صُمنه الكيظ كُله ، ونفطر أعله الريج
(أن جان هاذي مثل ذيج
خوش مركه وخوش ديج) 2
أنسيت أفطنكم مثل ..
قرتنه المدارس
نفذ ، ثم ناقش..
نفذ ثم ناقش
وجيت أناقش ..
ياصاحب بخت ويشيل عني أهموم
على هاي الأحزاب أتلملت لملوم
أشوكلشي أبهواهه أمخطط ومرسوم
لو مجلس برلمان أمجتف ومحكوم
يختل من تشد حك ماتفل أيكوم
نعامه وتظم الراس
وعليها الذيابه أتحوم
خُراعة الخضرة ، ولبسوها أهدوم
لو هذا الوطن يوم أنولد معدوم

ليش ينحز من وريده ...
وطافو أبراسه على البلدان ، فرجه
ردت واحد ينتغرلَه
(جون) 3 أسود عبد ، من دمه كتب
لوّه جيد الزمن بيده ، وأروع الأمثال...
للثاير ضرب
ولا حصل نصراني وأمه...
وباع دنياته(وهب) 4
ولارهم حماي غيره..
أيشيله عرك الغيظ دك راسه وضرب
أيذبحه من ظهره (الشمر)..
... يهديه (اليزيد)
هذا راس الوطن ينزف فوك رمحه....
هذا لو راس....
(الحسين)
***

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل