دفيني أبعباتج

حامد كعيد الجبوري

الحوار المتمدن-العدد: 2964 - 2010 / 4 / 3 - 23:51
المحور: الادب والفن
    

يا نسمة فجر والدنيه كيظ الكيظ
يامكسر الفي أتفيض بالحنه
يامجمَن ترافه وبيرغ الخطار
مُضيفج للحبايب هاونه ورنَه
يالمة عكدنه وجمعة الخلان
تعداج الردَه ويخاف يتدنه
يتنور المحله وكرصَة الطيبه
وجاغج ما بُرد خطار يتمنه
يادمعة قهر مرسومَه ع الخدين
ينواعي الحزينه الجلِد بجنه
يامنعمه الحُضنـج أترف أمن الريش
لامر أعله بالي ولا حجو عنه
تمنيت الشفاف أتصير بالرجلين
أبوس أتراب بيتج وأكتحل منه
***
دفيني أبعباتج يل عباتج بيت
أحس بيها الحَنان وخوفي أمننه


لفيني أبعباتج يل عباتج طيب
روايح من مسج قداح أشمنه
عمري أشما كُبر يم حُضنج أزغيرون
يكاروك الصبُر بالصبر هِِزَنه
ياخُلك النبايه وياحزن مهموم
ضَمت كل دمعها العين شربنه
ياكُلّج هظيمه والهظيمه أتخاف
لوركصَت طفل وأيدين شُبكنه
يمحراب العباده وياكتاب الله
توضت من فرحنه أفروض صلَنه
يافحم الكراجي ومنقلَة كانون
يابيت التراب أدموع أرشَنه
ياثوب القضيلَه أمكبَع أبهيبه
غذاهه ع الصبر بالعفه أغمسنه
ياموسعه الدارج عامر أبطرواج
ياشمعة عُـمر الدروب ضوّنه
ينافلة الصلاة وياصيام الشوك
من وَحشة درب وسنينه ضيعَنه


يانذر الأيمه وخبزة العباس
يفرحة ويهليه أعكود أطشَنه
يشموع الخضر وبليلة الجمعه
(يشط الحله) فوك الروج لعبَنه
لو كشفت صدرها للسمه تدعي
الملايك تستحي ووجوه دارنه
لو كشفت صدرها للسمه تدعي
أقسم للعرش لبجاهه بجنه
أمي كوثر وكوثر نبع صافي
وتحت أجدامها البيبان للجنه
***

#حامد_كعيد_الجبوري (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل