وجهات نظر 3

لؤي عجيب

الحوار المتمدن-العدد: 2914 - 2010 / 2 / 11 - 09:25
المحور: الادب والفن
    

3
- هي إلنا ناطرين أكتر من ساعة ونص بالبرد وما حدا من الأخوة الموظفين شرف ....
- شو هي أول مرة تنطر بدائرة حكومية ... هيك كل الموظفين عندنا ...
- انشالله بعد كل هالنطرة .. ناخد المصاري ...
- مصاري شو ...؟؟؟
- المصاري ... ليش نحنا شو عم نساوي هون .. مو مشان ناخد مصاري التدفئة ....
- بدك تاخد المصاري من هون ..؟؟؟
- لكن من وين ... شو ناقص مسخرتك انا كمان ..
- يا فهمان ... من هون .. و بعد طلوع الروح .. تاخد شيك ..
- شيك ..؟؟؟
- وبعدين تاخد هالشيك وتروح على البنك ... وتنلطع هنيك ... حتى يجي دورك ويعطوك المصاري
- وليش كل هالدويخة ... ليش ما حضراتهم يسحبوا المصاري من البنك ويوزعوها علينا .. وهيك بريحونا ومنريحهم ...
- لك الفكرة حلوة ... بس ماني واثق من التنفيذ ..
- ولك حاجة مسخرة .. ما بكفي متنا من البرد لسا ناقصين حضرتك تاخدنا شمال ويمين ...
- بس مشان الشيكات ما عم امزح ...
- خلص .. هلا نسألهم ومنشوف صدقك ... هي شرفوا صحابنا ... صباح الخير ..
- شمسكم عالية اليوم ...
- إلنا ناطرينكم ساعتين .... وحضراتكم هلا حتى شرفتوا .... عنجد يلي استحوا ماتوا ...
- كلامك مردود عليك ...
- لا ... خلينا نشوف شو رح تساوي ...
- ولا شي بس بخليك تنطر ساعتين تانيين ....
- ولك فشرت ولك ...
- روح عمي روح ... شو بدي أحكي مع واحد قد جدي ...
- العمى .. بعمرك شفت متل هالقلة الذوق ....
- خلص يازلمي .. انت كمان استلمته من لما نزل من السرفيس ... خليه ياخد نفس ...
- ياخد نفس ... ونحنا ملطوعين من الصبح هون ... ولسا عم يهدد .. ابن ...
- خلص عيب ... ضبضب الموضوع ...
- قال قد جده ... زلمي كبير .... يعرف يحترم هالزلمي الكبير يلي قد جده ...
- خلص يا رجل .. اجعل العقل منك ... خلص لفها ... الزلمي ما عاد رد عليك ....
- ليش بيسترجي ....
- ايه علينا .. لا حول ولاقوة إلا بالله .... سمي بالرحمن يارجل ... ولا تعكرلنا صباحنا .. خلينا نفهم منهم شو القصة ... .... ... ... ...
- شو شايف لسا مافتحوا الشباك ....
- أنت ليش بصلتك محروقه يا زلمي ... ... ... ...
- افتحوا الشباك العمى ضربكم .. متنا من البرد ... حكونا .. قلولنا اذا رح نستلم المصاري اليوم ... او نرجع على بيوتنا ...
- هدي حالك ... هلا بيفتحوا الشباك ونشوف شو القصة ...
- اول شي رح يعمله ... فنجان القهوة ... وبعدين السيكارة بجنب الصوبيا ... ونحنا هون ناطرين متل الكلاب ... وما فارق معاه شي ...
- شكله عندك خبره بالمواضيع .... هيك كنت تعمل لما كنت بوظيفتك ..؟؟؟ هاهاهاهاها ...
- انا كنت أعمل هيك ... ولك أنا في حياتي ما نطرت واحد .. إلا يلي بقلل ذوق وبيقعد بصرخ وبيعيط على الفاضي .... هاد ايه .. كنت نطره لآخر الدوام ...
- هاهاهاها ... هي تاريك مو سهل .... هي فتح الشباك صاحبك ...
- بكير .... خلصت القهوة ...انشالله سم الهاري ...
- اخرس وخلينا نعرف نحكي هالكلمتين .... العمى شو قليل الذوق ....
- ولك انا قليل الذوق ... ولك انت ما بتعرف مع مين عم تحكي ...
- مع مين عم احكي يعني .... مع واحد ختيار مهرهر على حفة قبره .... روح عمي روح ... روح موت غير هون الله يرضى عليك ....
- ولك اخرس ... العمى شوانك ابن حرام ....
- ولك روح قبل ما ابتلي فيك ... يلعن .....
- شوف هالكلب ... سكر الشباك كمان ... يلعنك واحد واطي ....
- يا زلمي خليه يحكي هالكلمتين ويخلصنا ... وانت وكم واحد طلعتولنا متل الـ .....
- يعني شو رح يحكي رح يقلعنا على بيوتنا ... مشان يجيب صحابه ويوزعلهم أول شي ....
- خلص يا زلمي .. بكفي ... هي رح ننطر شوي كرمال حضرتك ... مشان الله ما عاد تصرخ عليه .. اتركه يحكي هالكلمتين ويخلصنا ....
- وهو شو فارق عليه .. قاعد عم يتدفى ...
- ايه خلص ... خلينا نخلص ونروح نتدفى ببيوتنا ... مشان الملايكة اتركه بحاله للزلمي ... ... ...
- هي شرف ...
- ولا كلمة ...
- بس..
- اسكت .. خلينا نسمع ....
- يا شباب ... اسمعوني منيح الله يخليكم ... نحنا متلنا متلكم بتجينا التعليمات منفذها وبس ... مبارح عملنا اجتماع وعلى اساس نروح نستلم الشيكات ....
- شيكات ... يعني ما فيه مصاري من هون ...
- ما قلتلك .. اسكت ...
- وحضرتك ليش ما بتوزع المصاري ...و بلا هاللف والدوران ...
- يا عيني أنا ما طالع بإيدي شي ... هيك القرار وهيك الأوامر .... اسمعوني يا جماعة وخلونا نشوف شو الحل ....
- يعني فيك توزع مصاري بلا الشيكات ....
- ولك يا حبيبي شايفني بنك أنا ... أنا رح يوصلني شيكات ... شيكات وبس ... وانتوا رح تصرفوها من البنك ....
- رح يوصلك ... يعني ما وصلك لسا ...؟؟؟
- اسمعوني الله يخليكم ... نحنا على اساس نبدأ التوزيع من اليوم الصبح ... وطلعنا على المركز وما استلمنا شي ... ما بعرف اذا رح نستلم شي اليوم اما لا ... لهيك أنا بشوف إنكم تروحوا اليوم على ببيوتكم وترجعوا بكرا الصبح ... أحسن ما تبقوا واقفين هيك بالبرد ...
- بدك تصرفنا من هون مشان يفضالك الجو ... وتوزع على كيفك ... لاوالله ما حزرت ... رح نبقى هون ... قاعدين على قلبك ....
- اسمعوني يا جماعة ... يلي حابب يروح على بيته ويرتاح يروح ويرجع بكرا ... ويلي حابب ينطر ... هو حر ... يعمل متل ما بده.... بس الشيكات ما رح تطير ... كل واحد منكم رح يستلم نصيبه لهيك وبرأي الشخصي أنكم تروحوا وترتاحوا ببيوتكم ....و لبكرا الصبح فرج ورحمة .... يلا السلام عليكم ....
- وين .. وين ..
- يا حبيب ...
- يا معلم ...
- حاكينا كلمة ..
- يا مذوق ...
- شو ... رح تنطر هون ولا ترجع البيت ....
- شو شايفني بنص عقل حتى ارجع البيت ... رح ضل قاعد على قلبه... حتى شوف شو رح يساوي هالإبن الحرام ....
- حرام عليك يا زلمي ... ليش شو طالع بإيده هو ....
- اهه .. قال شو طالع بإيده ... روح حبيبي روح على بيتك وقعد مع النسوان ... روح ...
- رايح ... اتدفى واشرب كاسة شاي ومتل ما حكى ... الشيكات ما رح تطير ... سلام ....
- سلام .... قال ارجع على البيت قال .... ... .... .... .... ....
... .... .... .... ...
- كم الساعة معك عمي ....
- الساعة وحده ونص ... الك زمان ناطر ؟؟؟؟
- من السبعة ناطر هون .. انا وكم واحد من الشايفهم .... العمى والله حلهم يستحوا على دمهم ...
- ما حدا أخد شي ...
- دخل كم واحد لعندهم ... بتلاقيهم صحابهم أو قرايبينهم ... وطلعوا .... أكيد بكون عطوهم المصاري ....
- قصدك الشيكات ....
- كمان أنت مصدق هي اللعبة .... عمي يلي بيعرفوه أو بيدفعلهم .. بياخد مصاري ... ويلي ما بيعرفوه .. بينطروه ويبهدلوه وكمان بيسبوا عليه .... وآخر شي بيعطوه شيك مشان يروح ينطر بالبنك كمان ... ولاد حرام .... تعلمني عليهم ....
- معقول هالحكي ..؟؟؟؟
- عمي أنا عاجنهم وخابزهم وبعرف كل صغيرة وكبيرة ... هي شرف صاحبك ... شكله بدو يهرب ... لا تخلوه يمشي ...
- وين يامعلم
- وين يا حبيب ..
- النا ساعتين
- النا من الصبح ناطرين والله حرام عليكم ...
- عيب يلي عم يصير ...
- وين رجعت .. ولك طلاع برا حاكينا .... يا معلم ...
- شو هاد ... عم يرشونا بالميه الكلاب ...
- ولك ما حاجة ... متنا من البرد ونحنا ناطرين لسا عم ترشونا بالميه ...
- ولك خافوا الله ....
- اهربوا هلا تجي الشرطة ...
- فعلا انكم قليلين الذوق ....
- الله ينتقم منكم ... يا همج ...
- اهربوا .... الشرطة .....

#لؤي_عجيب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات