نقاش ديموقراطي .. لأجل المرأة

لؤي عجيب

الحوار المتمدن-العدد: 2839 - 2009 / 11 / 25 - 20:04
المحور: الادب والفن
    

كان صديقي يلبس قبعة دائماً ، كي يرفعها إحتراماً للنساء...

- المرأة ببلادنا تُعامل متل أي شي لما تنتهي مدته .. ترميه برا البيت.
- لا يا رجال مو لهي الدرجة ...عم تبالغ كتير .. لكـ....
- لا… ما عم بالغ ، بس نحنا عم نعامل المرأة وكأنها خادمة وواجب عليها تنفذ الأوامر.
- خليني كفي كلامي الك ساعة ترغي وما عم تعطيني فرصة للحكي ... الدنيا أخد وعطا ... اسمع وأحكي يا رجال ....
- سلفاً بعرف شو رح تحكي ... حافظ كم كلمة من هي الجرائد المعتة عندنا وجاي تقراهم علي ... "المرأة عندنا أخدت حقوقها قبل أوروبا وأمريكا ". شو هي الحقوق يلي أخدتها ...
- ولك اسمع وما عاد تقاطعني .... خليني أحكي رأي ولو كان حكي جرائد بس ناقشني فيه ...
- أتحفنا...
- أنت برأيك المرأة لازم تعامل متل الرجل ... طيب .. كيف رح تحس المرأة الفرنسية إنها متل الرجل لما تاخد راتب أقل من الرجل بس كونها امرأة .... فيه إهانة أكبر من هيك للمرأة ...يعـ...
- والله بعرف بدك تحكي هيك ... بس فاتتك شغلة .. أنو المرأة هنيك تاخد راتب قد عشر رواتب رجال ببلدنا. هنيك يا حبيبي المرأة آخده كل حقوقها متلها متل الرجال ، يعني بعد سن البلوغ تستقر لحالها وتنقي الشب يلي بيعجبها وبتعيش معاه زوجة أو كيرل فريند .
- بس كتير فيه حالات طلاق عندهم لهيدا السبب ...
- صحيح ، الطلاق بعمره ما كان مشكلة. بتعرف شو بيصير بكندا إذا صار خلاف بين المرأة والرجال أو وصلت الأمور بينهم للطلاق ؟؟
- حكيتلي قبل ....
- بتصرف الحكومة عليها وعلى أولادها وبيعطوها جميع حقوقها وحتى أنهم بينقلوها لمكان جديد إذا كان زوجها عم يهددها انو يأذيها أو ياخد أولادو بالقوة .... بس عندنا شو بيعملوا معها إذا رح تتطلق ؟ ولك حتى مهرها إذا الرجال طلع ابن حرام بياخدو منها بعد ما بيأسها من الحياة .... ولك يازلمي .... المرأة عندنا ... تُغتصب بزواجها ... وتُغتصب بإنسانيتها .... وتُغتصب بكرامتها ... حتى المديح عنا هو تعنيف للمرأة وحط من قدرها.. وإذا فكرت تتطلق بتكتئب ... لأنه كل شي ضدها .... خلينا ساكتين وبلا فضايح أحسن ...
- لا تظلم الجميع ، يا عيني دينا أنصف المرأة من 1400 سنة ....
- لا تدخل من هيدا الباب الله يخليك . يا زلمي لحالك فكر بضميرك وبوجدانك شوف أمك وشوف أختك شوف المرأة بشكل عام ... يلي مو موظفة حياتها لسعادة زوجها وأولادها بس كونها امرأة صارت فرد غير فعال بالمجتمع ، ويلي موظفة متلها متل زوجها برا البيت ، وبالبيت طبخ ونفخ وشطف وجلي و.... ألف شغلة وشغلة عليها وبالنهاية هي بنص عقل.. اي والله حرام . وآخرتها فيه رجال بيتزوجوا على نسوانهم بعد كل هالشقى والتعتير .. ولك بدك أقرف من هيك تصرف من الرجل تجاه المرأة يلي وقفت معه بكل حياته ... ومتل ما بيقولوا أكلها لحم ورماها عضم ... وعطاها مكافأة نهاية خدمة .. ضرة .. شو هالتخلف يا ....
- على سيرة الزوجة التانية . من فترة كنت عم أقرا بالجريدة وشفت خبر ما رح تصدقه..
- شو هالخبر أتحفنا ..
- يا سيدي ببريطانيا عم يناقشوا قانون الزواج ورح يسمحوا بتعدد الزوجات ...
- تعدد الأزواج قصدك ... شفت هالخبر .
- نفسها شو الفرق ..
- الفرق كبير حبيبي . تعدد الزوجات بخص الرجال بس ، متل عندنا ببلادنا بس تعدد الأزواج يعني المرأة متل الرجل ممكن تجمع أكتر من زوج ببيتها. عرفت شو الفرق.
- بس والله مو منطق المرأة تتزوج أكتر من واحد .. لأنه ما رح يعرفوا نسب الأولاد .
- حبيبي صار فيه شي أسمه علم ... الحديث رح يطول وأولادي ومرتي شكلهم نعسوا خليني أمشي هلا وبكرا السهره عندي نكفي حكينا ، رح خلي المرا تجهز الأركيلة على جيتك ...
- بكرا بدك تعذرني . مرتي ما فيها تطلع من البيت .
- ليش معاقبها ..
- لا معاقب الأولاد .. اليوم تعّبوا أمهم وما سمعوا كلامها ، لهيك بكرا ممنوعين من الطلعة برا البيت.
- يعني بكرا أنت بالبيت .
- لا والله ، مرتي بتنطرهم بالبيت وأنا وعدت العزابية أسهر معاهم بكرا .... دبرها لمرتك وروح نسهر سوا .
- والله فكرة حلوة .. خلص بكرا بخلي مرتي تزور عند أهلها ونطلع نسهر مع الشباب والله اشتقنالهم إلنا زمان ما شفناهم .. وخلينا نغير جو المتزوجين.
- معاك حق ... شي بيملل وجهك بوجه مرتك كل الإسبوع ... بيطلعلنا يوم إجازة بالإسبوع .
- إذا الدولة عاطيتنا إجازة يومين بالإسبوع ... المرا لا زم تعطينا يوم على القليلة ....
- هاها ها ها .... طريق يا حريم ...
- .... .... ...
- .... .... ...

#لؤي_عجيب (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل