احساس اسمه الحب

لؤي عجيب

الحوار المتمدن-العدد: 2904 - 2010 / 2 / 1 - 12:29
المحور: الادب والفن
    

- هاي ... هه هه ... .. مرحبا .. هه هه... كيفك ...
- أهلين .. هاهاها ... هاهاها ... أهلين .. أهلين ... تمام ... مشتقلك كتير .. كتير ...
- سبع سنين ... سبع سنين يا عاطل ... ما نشوفك .... ولا نسمع صوتك الا كم مرة .. هي أطول مدة تغيبها عنا ...
- سبع سنين و عشر شهور ...
- وعم تتفاخر كمان .. سبع سنين وعشر شهور...
- هاهاهاها .. لا .. بالعكس عم لوم حالي ... قديش كنت غبي ... اني تركت هالجمال كل هالسنين ...
- شكراً ... الحقيقة ... انك خجلتني .. هه هه هه هه ...
- هاهاها .. شرفي ... قعدي ....
- الك زمان ناطر .. ؟؟؟
- نص ساعة بالضبط ...
- آسفة تأخرت عليك ..
- قلقت شوية ... أو بالأحرى خفت ما تجي .
- ليش ما أجي ؟؟؟
- تأخرت بغير عادتك ... خفت تكوني نسيتيني ... او سرقك الزمان مني .. أو أني صرت متل أي شي من طيات الماضي .. نشمسه كل صيف ... و نرميه لما يعفن ...
- هه هه هه هه هه هه ... معقول هيدا الحكي ... انت بالبال على طول .. انشغلت شوية .. على كل أسفة للتأخير .. بدي شوف غلاوتي عندك .. هه هه هه ....
- أنت بالبال دائماً ..وغالية ... بغلاوة روحي .......
- يلا شيلنا من هالغزل الخيالي ... وخلينا بالواقع شوية ... احكيلي كيف شعورك بعد ما حصلت على الجنسية الفرنسية وحققت حلمك ؟؟؟؟
- حلمي .. كل عمره قريب مني ... بس أنا كنت عم أبعد عنه ؟؟؟
- شو قلبت من ابن بطوطة ... لأفلاطون ... على مهلك علي شوية ... شكلك مليان حكي .. يلا اطلبلنا قهوة وخلينا نبدأ الثرثرة ...
- هاهاهاهاها ... لساتك لذيذة متل ما كنت ... وسط ؟؟؟
- اي قهوة وسط ... ايه احكيلي ...
- من وين رح ابدأ ...
- كيف وصلت فرنسا وكيف أخدت الجنسية ... احكيلي عن كل شي ....
- احكيلك عن كل شي .... عندي كتير .. كتير حكي ...
- يلا كلي آذان صاغية ....
- حلوة البلد .... .... ....
- دق .. دق ... وين سرحت .... شو بك ... يلي يشوفك يفكرك طالع من سجن ... مو راجع من بلد .. كان حلمك .. لوتدخلها بس زيارة ... شو صار ...
- وانا فعلا طالع من سجن ....
- شو.. شو عم تحكي أنت ...
- اهه .. همم ... مو قصدي أني كنت مسجون ... بقصد أني .. كنت سجين ..أنانيتي ..وأوهامي...
- لا ... لا ... ما عم صدق يلي عم اسمعه ... عنجد حالتك حالة ... يا رجل .. وين التفاؤل .. المغامرة .. انت تركت الجامعه واشتغلت على باخرة ... كرمال تحقق احلامك وتشبع روحك بالمغامرة .. تتذكر .؟؟؟
- صحيح .. بس مو هي يلي بدي ياه ....
- هه هه هه هه هه .... شو الدنيا الك لحالك .. اترك شوية لغيرك ... يلي عملته انت خلال هالفترة ... ناس افنوا عمرهم وما أنجزوا ربع يلي انجزته انت ... ولا .. هيك الإنسان بيضل يحلم .. وبس يوصل لحلمه بيزهد فيه .... .... شو ... .... رح تبقى ساكت هيك ...
- رح احكيلك كل شي .... بس بدي تسمعيني ... واذا بدك حاكميني .. وانا راضي بأي حكم علي .... وما رح أزعل ...
- رح اسمع بدون محاكمه ... بتبقى عزيز وغالي ..
- بيهمني رأيك .. بالحكي يلي رح تسمعيه ... بس بتمنى تتفهمي ... يلي كنت عم مر فيه
- عم تخليني اقلق ...
- لا ... لا .. ما فيه شي ... بس مسألة ...
- يلا أحكي ...انا هون وعم اسمع .. ورح قلك رأي بتجرد ...
- تتذكري الحفلة يلي عملتوها مشاني قبل ما أطلع على الباخرة ..
- هه هه هه ... وقتها زعلنا عليك كتير ... وانتقدتك بقسوة ..
- هي أكتر شي ضل ببالي ...
- انتقادي ...؟؟؟؟
- لا ... خوفك وقلقك علي .... كنت مزعوجة لأني تاركون... ... الحفلة عاشت معي كل الفترة الأخيرة بفرنسا ... كنت محظوظ ومحاط بالحب والرفقة والأصدقاء يلي ما بيتعوضوا .. بس شي اسمه... نرجسية ... خلاني اركض ورا أوهامي .... تركت دراستي ... واشتغلت سنين على الباخرة ... بس حتى أثبت اني غير الناس ....
- بس أخدت الجنسية يلي بتحلم فيها .... وبعدهم أصدقائك بحبوك .. وبيحسدوك على وضعك وحياتك ....
- صحيح ... لأنهم ما شافوا .. غير هيدا الإنسان يلي حقق كل شي كان عم يحكيه ...
- طيب مو شي حلو الشخص يحقق أحلامه ...
- طبعاً .... بس قديش صعبه لما يكتشف انه كان عم يمشي ورا أوهام مو أحلام ...
- ما عم افهم عليك أبداً ... أنت ... بنظر الجميع كنت مميز وحتى محسود بحب وانت معنا ... وانت مسافر ...
- هيدي الأوهام يلي كنت راكض وراها ...
- كمان ما عم افهم ....
- انا يا عزيزتي ... اكتشفت اني ضعيف جداً ... ومغرور كتير ...
- ما عندي شك بغرورك ...هه هه هه هه هه ... بس ضعيف ما بتوقع .. يلا اضحك يازلمي حرك الجو .. والله شوية تانية رح تبكيني ...
- هي أنت ... لذيذة كتير ...
- بس أنت متغير علي ... كتير ... احكيلي شو فيه ...
- بتسامحيني اذا حكيتلك ...
- طبعاً ليش الأصدقاء موجودين ....
- تعرفي كيف وصلت فرنسا ....
- انا ما بيهمني الموضوع ... بس اذا هالشي بريحك تحكيه .. انا عم اسمع ...
- اول مرة نزلنا فيها بفرنسا دخلوا الشباب على البار ... هنيك .. وانا صرت اتعرف على المكان .... ولما طلعوا الباخرة كانوا جايبين معهم بنات .. بدون علم حدا من المسؤولين ... صار فيه شرب ... وفيه بنت .. كانت حلوة نوعا ما ... بس ... مو من البنات يلي بحبهم ..
- ايه .. وبعدين ....
- طولنا هنيك .. وتعرفت عليها أكتر ... واتفقنا اننا نتزوج .... بس كرمال الجنسية ...
- الموضوع زاعجك كتير ...
- ما زعجك انت ..
- انا مزعوجة على ازعاجك ... مو هي يلي بدك ياه ... الجنسية بأي طريقة .... وهي طريقة بيستخدموها الشباب ...
- انا مو هيك ...
- كيف مو هيك ما عم افهم عليك...
- انا عندي احلام غير هيك ... بس ليش مشت الأمور بالطريقة ....
- ممكن متل ما حكيت غرورك ... خلاك مغمض .. ومو منتبه منيح ...
- بس هلا فتحت عيوني وشفت الواقع أكتر ... شفت الناس يلي تحبني وما بتنساني ... وعرفت مين بحب ... وبتمنى ما كون تأخرت كتير ....
- الواقع ... صرنا عم نحكي بالواقع ....
- انا اكتشفت اني بحبك كتير ... وحسيت بحبك وانا بفرنسا ... كنت مشغول بأنانيتي ... وطيشي ... بدي منك تسامحيني ... حتى لو ما سامحتيني ... ما رح ازعل منك ولا لومك ... بس .. بتمنى تعطيني فرصة ..... شو ...
- بتوقع ...انك تأخرت كتير بإكتشافك ...
- شو يعني ...
- يعني .. انت صديق وغالي ... علي انا .. وزوجي ....
- انت ... تزوجتي ... مين ... بعرفه ....
- ايه ... صاحب وصديق النا .... كان حاسس بلهفتي عليك ... وبنفس الوقت بيعرف أنك ما عم تفكر فيني .. أبداً ...
- طيب اذا ما عندك مشاعر تجاهه ليش تزوجتيه ...
- مين حكى ما عندي مشاعر تجاهه .. انا بحبه كتير ... و كتير مبسوطين مع بعض.... لما سافرت ... حسيت بالكآبه ... وقتها بكيت كتير ... ومضي وقت طويل ما رحت الجامعه ... اجا هو ووقف معاي ... حتى طلعت من المحنة ... وفعلاً طلع شخص يعتمد عليه تماما ...
- انا ... كتير ... انا ... تصرفت بحماقة مع الجميع ... بس معك انت ... ما رح سامح حالي ابداً ...
- انت صديق وغالي علينا .... وما بدي تزعل ... ولا تلوم نفسك على ماضي ما فيك تعمل فيه شي ... ماضي وانتهى بحلاه ومره ... نحنا بعدنا أصدقاء ...
- شوفي مين أجى .... ها ها ها ها ... معقول ... أنت ..و ... هيدا ...هو ..
- ايه ... صديقي ... وحبيبي ... وزوجي ... وصديقك كمان ....
- هلا بالفرنسي ... منور البلد .... هاهاها ..
- هلا بأعز صديق .... هاهاها .. منورة فيكون ...
- والله الك وحشة ... وينك يارجل .. لا تلفون .. ولا أخبار عنك .. قول فيه ناس تحبك وتشتقلك ... ...
- حقكون علي .. والله أنا مقصر ... بس أنتوا بالبال دائماً ....
- ولا يهمك ... شوفتك بخير أهم شي عنا ...
- تسلم ... شو هي الأخبار يلي عم اسمعها .. مبروك .. ألف ألف مبروك ... بس عندي عتب عليكون ... ليش ما خبرتوني ..
- يا رجل ... ليش كنا نسمع عنك شي .. ولا نعرفلك طريق ...
- حتى لما كنت تحكي معي .. كنا نحكي كلمتين ويفصل الخط ...هه هه هه ..
- الحق علي .... عنجد لابقين لبعض ... وما فيه أغلى منكون على قلبي ....
- شرف معانا ...
- وين ...
- يلا هلا بتعرف ... طيب خبروني شوفيه ...
- الشلة كلها بانتظار الفرنسي ... هه هه هه هه هه هه
- يالله ... عنجد شو اشتقتلكون ... يلا ..
- والله منور ... عم تشبشب زيادة ....
- تسلم يا اعز الناس ... بس ما رح أرضى ما أعملكم عرس تاني مرة ...
- خلص ولا تزعل ... هي العرس على حسابك ....
- ليش لسا ما تزوجتوا فعلياً ...
- بكرا العرس ... وعم نجهز للحفلة مع الشله .. والأقارب ... وهي آخدينك معانا تشارك.. هه هه ..
- بس .. الرجال عند كلمته حساب العرس عليك ...
- انا قلت تاني مرة .. هي لسا أول مرة ... ها ها ها ها ها ها ...
- هاهاهاهاها .. ما رح فيك تنفد هالمرة ماسكينك ....
- أنا اليوم راجع فرنسا ... هاها..هاها ...
- أمشي .... يلا ...


أحلامي الصغيرة .. كأسراب السنونو ...
تمضي دون محطات دائمة ...
ستغدو وحيدة ...
دون قلب دافئ تسكن اليه ...

#لؤي_عجيب (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات