لغز جواي

حسين جهيد الحافظ

الحوار المتمدن-العدد: 2547 - 2009 / 2 / 4 - 08:09
المحور: الادب والفن
    

آب /1984
ما بين هيله وبين ليله
وما بين حنّونه وأم اِسمير
واِطشوت اللبن
اِسنينه يمشن هدر
بيهن يعد بس محن
الوحشه صارت هله
والغربه صارت وطن
وما بين صيحات الزغار
اِبغنج واِبحرگه سر وعلن
چوّاي يا چوّاي
يالشايل اِبخلگك زمن
حط الرحال اِستچن
يا كافي كثر أسئله
اِمنين اِنته اِمنين ؟
يا ياهو اِنته ؟ ومن ؟
واِشكثر بعيونك شجن ؟
چوّاي يا چوّاي
يا مدري يا نكتة وكت
اِبوكتك چبير الوكت
فرحة عمر
مرجوحه وضحكة زغر
زرگة اِعيونك لغز ما ينحزر
شايل معاني اِشكثر
حب وتصافي ووفه
شرطه وجواسيس وغدر
واِسنين عمرك تمر
حيه ودرج
ورغم العسر والعسر
رغم الألم والجفه
وحزن البيوت الطين
بيهه الأخو چان اِخو
وچانت العشره دين


ومهيوب حچيه أمر
من يحچي حجي حسين
الوادم خلية صدگ
ما تعرف الحيله
من علي جوده اِيگابله الطحّان
ومن عوده حسن والحچي ناصر
السيد طالب السرّاج
والبسطية وسيله
زنبور غرة گمر
وترنيمه ضحكة ضفر
اِشموع وچفافي مهر
واحد وطبعه الوفه
ما يوم صار اِثنين
حچي صاحي وعوده ناهي
حاتم الطائي الصبح
لا أكثر اِمعزبين
وتشبه صواني الخضر
مطعم شناوه اِصحين
ويا چاي كاظم علي
هيل ويعطر العجد
جاي العصر سنكين
والمله طالب وطن
اِبدمه الوطن شريان
ما عرف يوم الدغش
بس يعرف الاِحسان
دينه الوفه ومبدأه
بس خدمة الاِنسان
خيّاط بس بالاّسم
عالم ورع فنّان
چوّاي يا چوّاي
يالوكتك وكت
حته الحزن بيه فرح
وعاشور بيه العيد
ورغم الألم والألم
چان الغنه ترديد
وبيه السوالف صدك

عن حمده نحچي وحمد
عن سعده واِمسيعيد
والناس أهل من تستمع
چوّاي سولف ولو عن بعد
يالتدري حچيك نفع
يالبيك صار البخل لازمه
اِ بكل شي طبعك بخل
بس بالسوالف طمع
واِنته اِتعرفنه طبع
اِولايتنه بيرغ كرم
اِمن الجوع تنطي شبع
ومن ثدايه اِعيونهه العطشان يروه
يروه واِيخضر نبع
وتلهم الشاعر قصيده
وتمنح الكاتب مداد
وشارع الحبوبي بيهه
للهوه ايجيب الهوه
عگد الهوه سيف وقلم
بيهه والعضّاض واِچفوف الزلم
بيرغ جهاد
اِمن الصبه والبيت المدو
والنعيمه الحداد
خنياب يجري الصدگ
غير الصدׂگ ما راد
وادم طبعهه الوفه
ما تعرف الحيله
اِشما جار بيهم وكت
اِشما دارت اِعليهم محن
الجار عدهم جار
والوطن عدهم وطن
وحب البشر بالأصل
ديدان واِلهم طبع
چوّاي يا چوّاي
اِولاية أهلنه صدگ
اِولاية محبه ووفه
واِنته اِتعرفنه صدگ



لا تحچي بالعاطفه
اِولايتنه وعليك الله
اِولايتنه واو ..وفاء
اِويه الهاء يعني الوفه
الناصرية منهه ونعم
للدنيه طشت وفه
الناصرية أم الوفه

#حسين_جهيد_الحافظ (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل