حوار مع بائعة متجولة

باسنت موسى

الحوار المتمدن-العدد: 2220 - 2008 / 3 / 14 - 09:05
المحور: مقابلات و حوارات
    

النساء المختلفات لسن هن فقط السيدات المتعلمات والحاصلات على مؤهلات عليا فقط وإنما من يقدمون بتفاعلهم مع تجاربهم الحياتية قيم التحدي والإيجابية وقدمنا في ذلك الإطار عدد من النساء المتميزات المعاصرات ولجأنا في أحيان أخرى للتاريخ وأخذنا منه نماذج تحاورنا معها وقدمنا عنها معلومات لزوارنا بطريقة بعيدة عن ملل سرد السير الذاتية واليوم نحن نتحاور مع سيدة بسيطة جداً لا تحمل مؤهلات عليا أو متوسطة أو أي مؤهل مدرسي لكنها تجسد ببساطتها عمق تجربتها الإنسانية وبخبرتها الحياتية تحمل أعلى الشهادات معنا ومعكم اليوم "الست أم محمود".

**عندك كام سنة وبقالك أد أيه بتبيعي خضار؟
عندي 48 سنة بقالي 17 سنة ببيع خضار بعد ما جوزي مات كان كهربائي أرزقي مش في شركة وما لوش معاش ولا أي حاجة فقلت أبيع خضار علشان أصرف ولادي .

** ولادك سنهم كام ومتعلمين ولا لا؟

ابني محمود الكبير مدرس ما شاء الله عليه وبنتي خريجة تجارة ومجوزة وعندها عيلين بس مبتشتغلش انتي عارفة مسؤولية العيال بقى كبيرة عليها بس أحلى حاجة أنهم مبيستعروش مني ومن شغلي لأن شغلي ده هو اللي جابلهم الأكل خلاهم بني آدميين وعلمهم .

** هما ها يستعروا منك ليه هو أنتي بتعملي حاجة غلط ؟

لا أنا ما بعملش حاجة غلط بس الناس اتعودت أننا البياعين مالناش لازمة عندهم المفروض أن الناس تحترم بعضها لما يشتغلوا مش لما يشتغلوا بس في المكاتب يبقوا حلوين ومحترمين وغير كده يبقوا وحشين ده الزبالين اللي كل الناس بتقول عليهم أنهم مالهمش لازمة بس لو ماجوش يومين الزبالين دول لأي عمارة يومين ثلاثة شوفوا إيه اللي ها يحصل .

** طيب لما بنتك أتجوزت نصحتيها بإيه؟

حاجات كثيرة قوي قوي أنها ما تقبلش الحاجات اللي تهين كرامتها من جوزها لأنها لما ها تقبل مرة الإهانة الجامدة من جوزها وتسكت عمره ما ها يحترمها بعد كده والمثل بيقول "اللي يقول لمراته يا عورة الناس تلعب بيها الكورة" قلتلها كمان ما تجيش في يوم تقوليلي متخانقة مع جوزي خناقاتك معاه حليها لوحدك معله أنا مليش دخل أصلها لما تحكيلي أنا ها شيل في نفسي من جوزها وأكرهه والمثل بيقول "يا داخل بين البصلة وقشرتها ما ينوبك إلا رحيتها".

** أنتي بتحبي الأمثال قوى كده كل شوية تقوليلي مثل ؟

تضحك وتقول أصل اللي زى الناس يعنى اللي ما بيعرفوش غير يدوبك يقرأوا بالعافية ما يعرفوش يقولوا كلام مترتب الأمثال بتسهلها علينا أكثر بتجيب الخلاصة يعني .

** هو أنتي بتعرفي تقري؟

أه شوية كده على أد مخي وفهمه ما أنا كنت زمان رحت "محو الأمية " وأتعلمت شوية علشان أقرا الحساب وأسماء الشوارع ومحطات المترو لما أروح في أي مكان .

** كويس حاجة حلوة برضه تنفعك بقولك إيه هي ليه الناس بقت ماشية بتتخانق مع بعضها ؟

ما فيش حب الناس بتكره حتى نفسها أنا طول النهار وأنا قاعدة أبيع في الشارع أسمع خناقات وشتايم وكل حاجة وكأننا خلاص ما عندناش حاجة نعملها غير الخناق والشتيمة لو نطول بالنا شوية ونحب بعض ونضحك شوية كان زماننا حلوين وهاديين .

** بس الناس كلها محجبين وحلوين مش يبقوا متدينين وحلوين ؟

هو اللي يعرف ربنا ومتدين بس المحجب واللي لابس جلابية لا دي هدوم أن راحت ولا جات المهم القلب لازم قلب الواحد يبقى مع ربنا ولسانه يبقى حلو مع الناس لما يبقى كده أقول عليه ده واحد يعرف ربنا غير كده يبقى على رأى المثل "من بره هلا هلا ومن جوه يعلم الله" .

** طب مالناس بتروح الجوامع والكنايس ويخرجوا منها برضه بيتخانقوا وبيكرهوا بعض؟

الناس ساعات تروح الجامع أو الكنيسة منظرة يعني أو عشان يجمعوا حسنات لكن عشان يكلموا ربنا ويقولوا سامحنا متلاقيش علشان كده يخرجوا ويعملوا إلى هما عايزينه ولا كأنهم دخلوا مكان ليه حرمته برضه .

** كمان تعرفي أن المسيحيين والمسلمين دلوقت بيكرهوا بعض؟

أه عارفة ده علشان الناس اللي بجلالبيب ودأنهم طويلة كتروا وساعات بلاقيهم ييجوا جنب المحل المسيحي ويفتحوا ويقولوا للعيال ما تشتريش من المسيحي الكافر والكلام بتاعهم اللي مالوش معنى ده ربنا يسامحهم ويهديهم.

** طيب أنتي تعرفي حاجة اسمها حقوق المرأة؟

آه اللي بييجوا في التليفزيون دول أنا نفسي أقولهم حاجة هو الست اللي تبقى مديرة أو حاجة مهمة مش لازم برضه تكون قادرة أنها تقول لجوزها أنا عايزة ألبس الحجاب أو لا.

** أيوة لازم الست تختار اللي تلبسه بس هو ده حقوق المرأة عندك؟
أنا قصدي أن زي ما بتوع المرأة يقولوا أنها لازم تبقى مديرة لازم يقولوا كمان أن من حقها تلبس اللي عايزاه من غير ما جوزها يجبرها على حاجة .

#باسنت_موسى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل