جهاد علاونه
الحوار المتمدن-العدد: 2924 - 2010 / 2 / 21 - 19:48
المحور:
كتابات ساخرة
شو في ليش كل هذي الدوشه؟
-بقولوا حادث سياره.
الشرطه : يا إخوان دعوا رجال الأمن يقوموا بواجبهم .
- طيب ليش واقفين عندكوا ؟شو دخلكوا ؟
-بدنا نتفرج ونشوف شو في , ونعرف كيف وقع الحادث!.
-شو حضراتكوا خبراء في حوادث الطرق ؟ خلص كل واحد يروح يشوف شغله وفي جهات مختصه هي المسئوله عن مثل هيك أمور .
- اسع بنروح , بس بدنا نعرف , هذي السياره من وين كانت طالعه ! في ناس بحكوا إنها أتت من هذا الاتجاه , بس هذا الاتجاه ممنوع ومش معقول إنه السايق أجا من هذا الاتجاه الممنوع .
وينبري من بين الناس خبير متفنن يخرج رأسه من بين الناس وكأنه فئرٌ أطل من جحر ٍ صغير , ليقول :
-لا ممنوع ولا كل الناس ابتيجي من هذا الاتجاه , وأعتقد إنه السايق كاين سكران , والظاهر إنه من شدة الضربه إنه طلع عن الاتجاه الصحيح مش بسبب السرعه وإنما بسبب شربه وتناوله لمشروبات روحيه أو حبوب نفسيه عصبيه , والله أعلم .
ويتصدى لرأيه متطفلٌ مثله ليقول له :
ما إنت قلت الله أعلم , يعني حرام اتهام الناس بالباطل , هو يمكن السايق كاين نعسان إشويه أو ماخذ غفوه على الكرسي , وهذا ظاهر من الكرسي اتللي راجع للخلف إكثير في السياره , تعالوا معي وشوفوا بتلاقوا رأيي هو الصح.
ويحاول متطفل جديد أن يثبت خبرته في قيادة السيارات ليقول :
هذا النوع من السيارات خفيف جداً مش مثل المرسيدس , هو هذا النوع هامل والهيكل (البودي) تاعه زي الكرتون هامل ما بنفعش وبتحملش أي ضربه , شوفوا مجرد ضربه بسيطه على الهيئه الأماميه للسياره وصلت حتى (للتابلو) أي أنا مره ضربت في سيارتي المرسيدس موديل 1978م والله ما أجاني أي إشي .
ويتقدم متطفل آخر وسط الدائرة التي تشكلت حول السيارة ليخطب في الناس قائلاً:
يا جماعة الخير هذ ما فيه كبير وصغير وقوي وضعيف , هذا كله من لُطف رب العالمين فينا , الله قدر وما شاء فعل , والله لو تعمل 100 حادث والله كاتبلك اتعيش إنك غير اتعيش , وإذا مكتوبلك في أي شيء قسمه ونصيب إنك غير تاخذه , لا تقول حديد قوي وحديد مش قوي حرام عليك , لكل شيء أجل ولكل أجلٍ كتاب , والله غالبٌ على أمره .
الشرطه : شكراً لجهود بس احكي للناس يرجعوا للخلف عشان نعرف انقوم في واجبنا .
ويخرج من بين الناس متطفل آخر يريد أن يضع رأسه في السياره فيمد رأسه وكأنها سيارة أبوه وهو يقول :
ساعدوني يا شباب أفتح السياره , السياره فيها موبايل برن.
- لا حول ولا قوة إلا بالله يا رجل شو دخلك بالموبايل ؟
-كيف بدي أرد عليه .
-وبشو صفتك حتى اترد عليه ؟
- فاعل خير.
-
وهذا رأي خبير من الدرجة الخاصة:
لا هاظا مش حادث , هاظا واحد نزل من السياره وضرب وحده اكفوف على وجهها .
-بقولوا خطيبته .
-لالا مرته(امرأته) .
- شو صرتوا داخلين بيناتهم وعارفين شو بقرب للبنت ؟
- لا احنا على حسب ما سمعنا ابنحكي.
-لا مرته (امرأته) ولا خطيبته هذا حادث سير ومبين قدامنا , من وين جبتوا سولافة مرته وخطيبته ؟ شو انتوا كاينين راكبين معاهم ؟.
وهذا رأي لمتطفل خبير توقعات أكثر منهم كلهم :
انتوا ابتعطوا أراء قويه جداً وكأنكم راكبين معهم , يعني اللي راكبين مع صاحب السياره صدقوني إنهم ما بعرفوا سبب الحادث شو هو , فكيف انتوا وانتوا بالدار قاعدين بتحللوا وبتستنتجوا على كيفكوا !
-والله فعلاً هذا أبو حطه وعقال على راسه بسولف سوالف وكأنه هو اللي كاين سايق السياره.
الشرطه : احنا شايفين انه كلكوا خبراء, معناته ليش احنا هون موجودين , يا اخوان في عندنا خبراء بعرفوا كل شيء وبالتفصيل الدقيق , فخلونا نعرف نشتغل.
-يعني هو انت ناسي حالك , من خلال ابريكات السياره صرت تحكي إنها السياره كانت مسرعه والسايق سكران.
- لالا بس الناس بقولوا .
-الله يلعن أبو الناس ما أكذبهم .
وفجأه يظهر خبير آخر رافعاً دشداشته للأعلى ممسكاً بها في فمه والظاهر أنه خرج من المرحاض مسرعاً للشارع حين سمع بوجود الحادث , فيبدأ بالقول :
- الله يلعن أبوه على أبو اللي أعطاه الرخصه.
- بتلاقيه ما خذ الرخصه بالواسطه .
الشرطه : يا شباب شو هذا التطفل كل واحد يروح على شغله .
ومن ثم يظهر محلل متطفل آخر أكثر خبرة من الجميع:
- لا مش حادث سياره .
-لعاد شو؟
-بقولوا هو وقع على الأرض من حاله.
-من حاله؟
- آه من حاله .
-كانت السياره طالعه من هذا الاتجاه .
- لا من هذاك الاتجاه .
-إنت كنت موجود وقت وقوع الحادث؟.
- أنا لالا بس في واحد قبل إشوي كان هون , هو أول واحد شاف الحادث.
- كلكوا ابتعطوا اقتراحات على الفاضي وبس الواحد يسألكوا عنها بتقولوا الناس قالوا .
- لا لا اتردش على حدى أنا أول واحد وصل لهون وشاف الحادث, الحق على سايق (الفكترا).
وهذا رأي خبير متطفل عالمي:
- لا يا عمي لا اتخبصوش , سايق الفكترا ما عليهوش حق , الحق على سايق (الأوبل ريكورد).
- فعلاً الطريق كانت للفكترا .
-طيب بس هذا المدعوس على الأرض , مين اللي دعسه.
- هذا مش مدعوس , هذا نزل من السيارة ورمى حاله على الارض وكان شبه فاقد للوعي وخايف .
-شو دخل الفكترا أصلاً هذي السياره مش أوبل فكترا .
- طيب ابعدوا عنه خلي الزلمه يشم اشوية هوى.
بعدين بيجي واحد من بعيد يحلل بالوضع بدون ما يكون موجود أصلاً وقت الحادث:
-سيارة (الكيا سيفيا) كانت طالعه من هذا الاتجاه , والبكم (البكب) كان جاي من هذاك الاتجاه , والاثنين انعطفوا على اليمين بسرعه زائده فضربوا في بعضهم البعض.
-يعني هذا اقتراحك ؟ انت كنت هون وقت الحادث؟
-لا.
-لعاد أسكت لويش بتسولف.
بعدين بيجي واحد ثاني وبقول :
-الباص أصلاً معاه معلمات مدرسه , وكان إمشغل المسجل على أعلى صوته وطاير , ما سمعش صوت الزامور, وظله ماشي , انعطف على اليسار وتفاجأ بطلاب مدارس إثنين بدهم يقطعوا على الصايد الثاني , ما دريش شو بده يساوي فراح على اليسار .
-طيب وين هو الباص أللي انت بتسولف عنه .
-الباص هظاك هو صاف هناك , هو ما صارش معاه اشي هو هرب من (الكيا سيفيا).
- يا زلمه انت بتخبص هذا الباص صارله واقف هون بيجي 7 أيام خربان ما بمشيش.
-هلأ ! هلا لعاد وين راح الباص؟
- شو وين راح الباص هظاك هو واقف اهناك .
ويخرج صوت خفيف من بين الجمهور الواقف ويقول :
الله يرضى عليكوا هذا الباص لي أنا وما إلهوش دخل في الموضوع , أنا زيي زيكوا واقف بتفرج وبس .
ويتدخل رجل قصير القامه ليقول : طالما ما إلكوش علاقه كلكوا بالموضوع لويش لعاد ما تتركوا الشارع وتروحوا على أشغالكوا وأعمالكوا , خلينا يا جماعة الخير نعرف نشتغل احنا والشرطه .
الشرطه : يا إخوان فضولنا الساحه إشويه خلينا نعرف انقوم بالواجب .
-انت كنت هون وقت الباص ما كان هون ؟
-لا.
-لعاد أسكت لا اتسولفش.
-طيب هاظا الزلمه بعده على الأرض.
-اسع بتشيله سيارة الاسعاف .
-طيب وين سايق الفكترا ؟
-مش موجود .
- فل ما معهوش رخصه .
الشرطه : يا جماعه خلينا نعرف نشتغل ارجعوا بس للخلف قليلاً واللي ما الهوش شغل يروح من هون , صارلنا ساعه بنحكي معكوا نفس الكلام.
-يم صار فال ما معهوش رخصه ؟انت كنت هون بس هرب؟
- لا.
-لعاد أسكت لا اتسولفش.
-سايق الفكترا راح يجيب ونش يشيل السياره .
- الحق على الفكترا , الطريق مش ليه أصلاً وهو كان ساحب على الأخير.
-كانت سرعته عاديه .
بعدين بنبري للناس واحد بعتقد نفسه خبير عالمي وبقول :
كيف عاديه طلوا على اعجال السياره أي لبريكات طولهن 3 أمتار .
-أف هذا معناته ساحب .
-لا ساحب ولا إشي أنا بقيت قاعد على باب الدكانه , هو بس من ضرب إبريك زحقت معه السياره وبعدين انحرفت على الاتجاه الآخر.
ومن ثم يظهر متطفل آخر ويقول :
لويش انخض في المي(الماء) وهي مي(ماء) أصلاً هذا السايق أنا بعرفه , دائماً بشوفه بمر من هذي الطريق وطاير على سرعة 100 , ودائماً بقول بكره غير يعمل ليه حادث إكويس ومرتب وابن عالم وناس.
وبرد عليه خبير آخر متطفل أكثر منهم جميعاً خبرة:
انت غلطان , هذيك السياره صح نفس الموديل بس لونها أزرق غامق , وهذي أبيض سماوي .
- شو هو في لون اسمه أبيض سماوي .
-طبعاً في أخضر بحري , وفي أبيض عسلي, وفي أحمر أورنج.
الشرطه : يا سلام على رأيك !! انت رهيب ..يا شباب خلينا نعرف نشتغل شغلنا .
-طيب هذول شو دخلهن في موضوع السياره ؟.
-ما هو السايق أصلاً كانت لون السياره اللي أمامه أخضر برتقالي .
-إيه شو أخضر برتقالي , يا عمي روح على شغلك الله يستر على حريماتك (ولاياك).
-هذا واحد أهبل دايماً واقف على جنب الطريق .؟
-حتى الهبايل صاروا يحللوا في الأوضاع !!.
-يا جماعه الله والعليم زي ما بقولوا السايق كانت معاه وحده قحبه بالسياره وكان مادد إيده على صدرها , فعشان هيك عمل الحادث وهو غير منتبه.
-انت شفت القحبه معه؟
- لا بس بحكوا الشباب هيك.
- يا زلمه انت عندك بنات حرام عليك ترمي الناس بالباطل.
ويظهر خبير جديد أو محلل جديد:
-انت شفت مثلي؟ أنا أول واحد وصل على مكان الحادث, لا انحرفت السياره ولا شي , هو في الأصل كان مخالف قواعد المرور .
-هو الحق مش عليه الحق على الحكومه , الشارع فتحة الكيرف تاعته 8 أمتار وصاحب المحلات التجاريه ليه واسطه بالبلديه وقلل الكيرف من 8 إلى 3 أمتار , يعني المحلات التجاريه فايته في الشارع ما يقرب من 5 أمتار .
-طيب كيف سمحوله البلديه ؟
الشرطه : يا شباب خلينا نعرف انشوف شغلنا بعدين معاكوا اللي ما الهوش شغل يروح من هون , سريعاً.
-هذي البلد طعه قايمه وكلها فوضه .
-بقولوا رئيس البلديه نسيبه .
-لا نسيبه ولا ما يحزنون , الزلمه دفع مصاري .
-رشوه؟
- لا مخالفات 4,25 قرش عن كل متر , والبلديه أصلاً بشجعوا على ارتكاب المخالفات على شان يوخذوا من المخالفين مصاري , ارتكاب المخالفات القانونية بدر دخل كبير على أجهزة البيرقراط الفاسد.
-هلا شو هو كاينه البلد سايبه ؟.
- طبعاً سايبه .
وفجأة يظهر رأي خبير طرق متطفل :
- يا جماعة الخير ليش هيك , شو دخل الكيرف , الشارع أصلاً من زمان موقع مهم للحوادث من يوم الله ما خلقني وأنا أشوف في هذا الشارع حوادث كثيره .
-طيب شو السبب ؟.
-السبب الشارع مش عريض .
- لا الشارع عريض , شو هو كاين مطار دولي ؟ السبب السرعه الزائده.
-فعلاً ما حدى بلتزم بالسرعه المحدده.
وهذا رأي متطفل لأول مره تسمعه الناس:
-بقولوا في ولد كاينه أمه , قايديته بيدها فنط الولد قدام السياره , وتفاجأ فيه السائق , فضرب بالبنكيت .
-انت شايف هيك ؟
- لا هيك اسمعت .
وهذا رأي شاهد عيان شاهد سماع صوت فقط لا غير:
-لا لا اتردش على حدى , أنا كنت واقف على ظهر السطح وبس اسمعت لبريكات انزلت على طول وكنت أول واحد بصل للموقع .
الشرطه: يا جماعه انتوا ليش متجمعين هون , خلي المصاب يوخذ نفس, وهذي سيارة الاسعاف حضرت لنقل المصاب.
- أنا كنت ماشي وراه تقريباً ب 200 متر ولولا ما هديت كان ضربته على اليمين .
-شو معناتك كاين ساحب .
-لالا صدق بقيت ماشي على مهلي , بس هو كاين ساحب .
-شو بدنا فيه .
-مالنا ومال الناس .
-خلي كل واحد يروح على داره .
-يا جماعة الخير حكي القرايا ما بيجي على حكي السرايا , هذا لا هو حادث ولا إشي هذا واحد نزل معه السكر في الدم وحس في غيبوبه عن الوعي فنزل من السياره وألله ستره .
-من وينلك هذي السوالف , شو انت كاين معه ؟.
-لا كنت معه ولا اشي بس هيك الناس بحكوا .
-لا اتردوش عليه والله ما هو داري عن حاله.
#جهاد_علاونه (هاشتاغ)
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
