الضحية رقم2

جهاد علاونه

الحوار المتمدن-العدد: 2906 - 2010 / 2 / 3 - 19:02
المحور: ملف مفتوح: مناهضة ومنع قتل النساء بذريعة جرائم الشرف
    

الخبرة مدرسة بس مش كل الناس بتتعلم من هذه المدرسه , ومش كل الناس تحصيلها واحد , ومش كل المدارس مجالس , بس أكيد إنها المجالس مدارس الكل بتعلم منها , والحياة مدرسة جيدة ولكن مصروفاتها باهظة وكثيرةفهي لا تتطلب أقلاماً ودفاتر وقرطاسية , بل دماء وشباب وأعمار تضيع , وحتى نتعلم من دروسنا نكون قد دفعنا نصف أعمارنا ثمناً للتعلم لأننا نفضل دائماً أن ندخل التجربة بأنفسنا ونرفض نصائح الآخرين , وقد تعلمتُ مما شاهدته في حياتي أن الإشاعة أو الكذبة التي يكذبها الناس على أنفسهم يكونون هم على الأغلب أول من يصدق تلك الأكاذيب , لقد أطلق أصحاب الضحية رقم 2 كثيراً من الإشاعات وكل الناس لم تصدق تلك الإشاعات والغريب في الموضوع أنهم هم أول من صدقها , والإشاعة تنعكس فوائدها أو سلبياتها أو إيجابياتها بشكل مباشر على المروجين لها أو على مطلقيها أو على أصحاب المصدر لها .

الضحية رقم 2 كانت جريمة مزدوجة ومخطط لها مع سبق الإصرار والترصد وبدأت تلك الجريمة بخلاف على تركة أم الفتاتين ( سميحه ولطيفه) وكانت تركتها تتجاوز ال نصف مليون دولار تقريباً ولدى البناة رغبة باستلام مخصصاتهن من الثروة , وعرض الإخوة الأشقاء مبلغاً بسيطاً على سميحه ولطيفه , ولكنهن اخترنا اللجوء للمحكمة من أجل تصفية باقي التركة بالتساوي , وبنت سميحة أحلامها بأن تتزوج عشيقها وتدفع منها ثمن كل شيء لأنه لا يقدر على شيء , في الوقت الذي اتهمه أشقاء البنات بتحريضهن على مقاسمة الإخوة الأشقاء والذين سيصبحون أعداء فعلاً بفعل تدخل الغرباء وكالوا لعشيقها اتهامات بأنه أولاً محرض وطماع ويريد الحصول على تركة العائلة وإنه لا يعشق سميحة وإنه غريب أو جسم غريب داخل الجسد الواحد , ونصحوا سميحه بقولهم:
-على إيش بده يوخذك ؟ لا جمال ولا شباب , حتى عمرك صار قريب ال 35 سنه وكمان إشوي ما بتقدريش على الخلفه , هو بده يسرق أفلوسك وخلص, لا اتخلي واحد غريب يدخل بيناتنا .

-غريب شو هذا بس كان بده يتزوجني وما كان معه افلوس وكنت اموافقين عليه وتقولوا عنه ابن عالم وناس وما بنلقى مثله, والفقر مش عيب وبعدين مع الزمن كل شيء بتساوى.

-طيب بس هسع في تركه , يعني بس توخذيها بصير بده يشاركنا فيها , ليش؟ هذا هو أبوه حرم خواته من الورثه عشان اتظلها لأولاده .

-لا بده يشاركك ولا إشي , التركه من حقي وأنا اللي بدي آخذها مش هو.

-طيب بكره بتمتع فيها وبستمتع.

-طيب جوزي بتمتع معي في مالي زي ما نسوانكوا بتمتعن معكم في مالكم, قولوا لي : مش نسوانكم غريبات ؟ إحكوا مش غريبات ؟ يعني مع ذلك بقاسمنكم الورثه.

عندها غضب جميعهم وقالوا بصوت عالي : انت وحده هامله ولازم تنضبي من الشوارع , شو بتروحي اتساوي في دار أم كامل؟

ومن جهتها رفعت هي أيضاً صوتها وقالت وهي تكشف عن شعر رأسها وفتحت باب الدار وقالت:
-اسع أم كامل صارت غريبه ؟ طول عمر أم كامل وأمي الله يرحمها يقعدن مع بعضهن البعض على درج الدار وبالذات على هذي (الطوبه) اللي لو إنها بتحكي لحكت عن أمي قديش قعدت عليها وحكت وسولفت عن الرايح واللي جاي , طول عمر ام كامل وهي بتحبكوا زي أولادها اتقوا الله.

-لا والله انك عارفه عن إيش بنسولف , روح وجيان من هون وطالع ما فيش وهذا الباب تبع الدار ممنوعات من الطلوع منه إنت وأختك , والله عال شرفنا صار بالطين .
-شو شرف , شو كاينه أنا بشرمط ؟ أنا شرموطه؟ روحوا شوفوا حالكوا وسهراتكوا عند اللي تسوى واللي ما تسوى في إربد وعمان والزرقا , وطلعاتكوا على الشام , انتوا ليش ما فيش حدى يحاسبكوا ؟ اللي بيته من قزاز(زجاج) ما برجمش الناس بالحجاره.
-اسمعي وله انت وهي , احنا زلم وما بهمنا إشي .
-على عيني وراسي أهلاً وسهلاً يا زُلم, بس شو خصكوا بي ؟
-شو خصنا ؟ !! غحنا إخوانكن واحنا اللي بنحافظ عليكن .
-اسع بدكوا اتحافظوا علينا ولاّ على الورثه, يا ريتها ماتت ولا تركت لا لينا ولا ليكوا إشي .

وخرج الإخوة ووجوههم سوداء وحمراء وقرروا الإجتماع في منزل أكبر واحد فيهم والتئموا مع بعضهم البعض في مشهد عاطفي كبير لم يسبق له مثيل وبدأ أصغرهم بالكلام:
-أنا صحيح أصغر واحد فيكوا بس لا زم نعمل إشي.
-لالالا انت الخير والبركه قول شو ممكن أنساوي ؟
-أنا بقول نحجر عليهن .

فرد الأخ الثالث ونظر للرابع وإليهم جميعاً وعددهم 6 ست إخوة وقال:

-الحجِر بضبطش , في فلان رفع حَجِر على أخوه علماً أنه في مستشفى للأمراض العقلية ومع ذلك قرر الطبيب عدم الحجِر عليه .
- لعاد شو الحل ؟
-قال الخامس:
-سمعتنا صارت بالطين .
-سمعة شو , هذه اشاعه واحنا اللي أطلقناها شو بدنا انصدقها ؟

-وليش ما انصدقها ؟ ولماذا لا نصدق إشاعاتنا .

-فعلاً ريحتهن طلعت , وأنا شفت في عيني أم كامل ومعاها الحبيب وهي جاريته ومعاه أمه عشان يسهر عندهن .

-يمكن يكونوا رايحين يطلبوا سميحه طلب رسمي للزواج.

-كيف طلب رسمي , من مين؟

-شو ما فيش ليهن أهل ؟

-آه صحيح من مين؟

قال مزدرياً الموضوع وهو يلف غطاء على رأسه:

-من أم كامل-والله هذول البنات لا حيا ولا دخان جلّه, لا بستحن ولا , واللي ما
بتستحي من أباها لا فيها ولا في ارباها .

-انا والله ما بديش أقول امبارح واحد كان يحكي وانا ماشي على عيني ويمعني بكلام فارغ .

-احنا حكينا للناس وجهات نظرنا , في الموضوع , وقلنا إنهن معقدات على شان رافضين موضوع الجيزه من أصله

-يعني احنا بدنا انظل انخض بالمي(الماء) وهو مي من المفروض أنا نضع حد لكل هذا الكلام , الناس ما ليهاش سوالف غير احنا , وصار اللي يسوى واللي ما يسزى يسألني شو صار معاكوا ومع خواتكوا .

-والله كلامك ابراس ماله .

-يا شباب بصفتي أخوكم الكبير أنا بقول إنا خلص لازم نقطع العرق وانسيح دمه .
-كيف يا ابو صالح؟

-يعني البنت اتعقدت على شان احنا ما قبلناش جيزتها , وعشان هيك رمت حالها في البير.

-آه كل الناس سمعوها وهي اتقول والله غير أرمي حالي في البير.
-يا حرام.
-ومتى بدها ترمي حالها في البير .

-اليوم بطلع الصبح بتكون في البير , وأختها ما قدرتش اتعيش بدونها فرمت حالها وراها .
-والله قديش بدنا نشتاق ليهن .

#جهاد_علاونه (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل