محمد أبو قمر
الحوار المتمدن-العدد: 8502 - 2025 / 10 / 21 - 08:12
المحور:
مواضيع وابحاث سياسية
يوم الخميس إللي فات كنت ع القهوه ، وأنا بشرب الشاي لا حظت اتنين كبار في السن أوي بيلعبوا مع بعض طاوله في ركن لوحدهم ، بس إللي لفت نظري أوي إنهم شويه يلعبوا وشويه يزعقوا مع بعض ويشتموا بعض...إنت مبتهمش....والله إنت إللي إللي غبي....إنت حلوف كبير....دا إنت إللي علي كتافك دي زلعة مش ...والله إنت كلك علي بعضك كده أنبوبة بوتجاز فاضيه كمان.....طب إلعب إلعب كتك ستين نيله حمار.
أنا سمعت الكلام ده روحت قايم من مكاني وروحت إستأذنت منهم علشان اتفرج علي لعبهم ، سمحولي طبعا ، قعدت أسمع حوارهم مع بعض وهما بيلعبوا ، كانوا بيتكلموا عن القضية الفلسطينية ، عرفت اسم كل واحد فيهم طبعا ، الراجل أبو أتب واضح علي ضهره إسمه عم نعمان ، والتاني أبو حواجب كثيفه إسمه عم أحمد.
- فجأه زعق عم نعمان وهو بيرمي الزهر وبيقول : يا أحمد يا اخويا حل أي قضية في الدنيا هو تعريفها ، يعني معرفة أسبابها وتفاصيلها.
- عم أحمد رد وقال : يانعمان القضية واضحه ، الاسرائيليين مستعمرين فلسطين.
- نعمان قال : الاستعمار يا أحمد أنواع ، استعمار سياسي ، استعمار اقتصادي ، استعمار استيطاني والأنواع دي كلها بتبقي مؤقته وسرعان ما يمكن التخلص منها بوسائل متعددة زي استعمار بريطانيا لمصر أو للعراق ، أو للهند ، وزي استعمار أمركا لفيتنام ولأفغانستان ، وزي السيطرة الاقصادية لدول الغرب علي بلدان كتيره في الشرق الأوسط ونهب ثرواتها وزي إللي كان حاصل في جنوب افريقيا.
- رد عم أحمد وقال : شوفت بأه ، يعني اسرائيل دي استعمار استيطاني زي جنوب افريقيا
- عم نعمان قال : أنا مقولتش كده ، إللي حصل في فلسطين مش زي إللي حصل في جنوب افريقيا ، موضوع القضية الفلسطينية يختلف.
- عم أحمد رد متعجبا : مختلف في إيه بأه يافالح يا أبو أتب يا أبو دماغ ممششه؟.
- عم نعمان : اصبر علشان تفهم ياحمار ، إللي حاصل في فلسطين هو صراع علي ملكية الأرض ، فلسطين دي ممكن تشبهها بفدان أرض في بلدكم ، يعني زي مثلا اتنين ولاد عم بيتنازعوا علي ملكية الفدان ده ، وكل واحد منهم معاه سند موثق بملكية الفدان كله ، إنما في جنوب افريقيا مكنش مع البيض سند بملكية الأرض ، دول كانوا جايين مع جيش المستعمر البريطاني ، الاستعمار مشي وهما فضلوا في الأرض ، إنما الصهاينه حاجه تانيه خالص.
- عم أحمد كان عايز يرمي الزهر في وش عم نعمان وهو بيقوله : إنت بتخرف تقول إيه!! ، إيه إللي يثبت إن اليهود ولاد الكلب لهم شبر في فلسطين؟ ، دول شوية مقاطيع مشردين ولاد حرام كلهم ، منهم الاصفر والابيض والاسود لا لهم أصل ولافصل ، وقبل ما يجوا فلسطين كانوا بيدورا علي حته في أوغندا أو في أي خراره تانيه علشان يعيشوا فيها ، إنما لما في غيبه من الزمن وبسبب الانجليز الملاعين هاجروا لفلسطين وسموها أرض الميعاد ، ومن يومها وهما بيدوروا وبيحفروا علشان يلاقوا أي صله بينهم وبين الأرض دي مش لاقيين ، تيجي إنت تقولي إن معاهم سند موثق ، كتك خازوق موثق إنت وهما.
- عم نعمان رد بهدوء : هدي نفسك يا أحمد علشان تفهم ، العرب عندهم سند موثق من التاريخ ومن الدين الاسلامي ، واليهود بغض النظر عن زيف ادعاءاتهم لكن برضه عندهم سند من التاريخ ومن الدين اليهودي ، المهم إن إللي حاصل هو إن كل طرف متمسك بملكية الأرض كلها بناء علي المستندات إللي معاه أو إللي مش معاه ، زي بالظبط الفدان إللي بيتنازع علي ملكيته اتنين ولاد عم في بلدكم والاتنين بيزرعوا نفس الفدان ، بس في واحد قدر يجور علي جزء كبير من الفدان لأسباب كتيره مفيش داعي نتكلم فيها والتاني بيزرع في الجزء الباقي ، وكل طرف فيهم بيقول إن الفدان كله بتاعي.
- عم أحمد : تقصد إيه يعني يانعمان!! ، يعني الفلسطينيين يسيبولهم بقية الأرض ويمشوا؟!!
- عم نعمان : أنا مش ممكن أقول كده ، أنا مع الفلسطينيين ، دي أرضهم بحكم التاريخ ، وبحكم الاتصال الجغرافي مع المحيط العربي ، وبحكم كل الأحداث التاريخية في المنطقة دي من آلاف السنين ، لكن قصدي إن المشكلة اتعقدت ومع مرور السنين أنتجت حالات من الانحراف تعدت المشكلة ذاتها ، طلع من الطرفين منحرفين حولوا الصراع حوالين الأرض إلي صراع ديني يعني أطراف من هنا وأطراف من هناك أصبح موضوعهم القضاء علي الطرف التاني حسب ما يوجد في تراث كل منهما عن ضرورة القضاء علي الآخر ، يعني اتحولت القضية إلي صراع وجودي ، صراع ديني ، والصراع الديني يا أحمد ملوش نهاية ، مش هاينتهي إلا يوم القيامه.
- عم أحمد يعني قصدك مفيش حل للقضية يا أبو أتب؟.
- أنا قلتلك من البدايه إن كل مشكله في الدنيا لها حل بشرط يحصل تعريف صحيح وحقيقي للمشكله ، عارف يا احمد لو التعريف الصحيح للمشكله حصل كل مشاريع التسوية وكل الاقتراحات الخاصه بحلها الموجوده حاليا هاتختلف ، إللي حاصل دلوقتي ، يعني مشاريع الحل المعروضه دلوقتي بناء علي التعريف الغير صحيح للمشكله كلها مشاريع لتبريد سخونة المشكله ، كلها كلام للاستهلاك الوقتي ، مجرد أوهام ، كلها خداع للجانب المظلوم إللي هو الفلسطينيين ، بيقولوا حل الدولتين ، يعني دوله علي أجزاء متقطعه ومتهلهله ومحرومه من مستلزمات الحياه ومنزوعة السلاح كمان للفلسطينيين ، ودولة تانيه قوية وجباره وعنصرية ولها أطماع تتعدي فلسطين لإسرائيل علي أفضل أجزاء فلسطين ، ولو نجحوا كمان في تحقيق ده ، بعد يومين هاتقوم اسرائيل تتدغدغ دولة فلسطين الغلبانه بأي حجه.
- عم أحمد يرد بكل أسي : يادي المصيبه ، دا إنت عقدت المشكله وبكلامك ده يبقي مفيش حل خالص وهاتفضل المنطقه كده تعاني من المشكله دي للأبد.
- عم نعمان : أنا مش بعقد المشكله ، أنا بحاول أغير الاتجاه إللي المنطقه والعالم مشيوا فيه من سنة 48 لغاية دلوقتي وثبت فشله ، أنا بحاول اجتهد بفكرة تعريف صحيح للمشكله يمكن دا يساعد علي إيجاد حل من خارج الصندوق ، وقلتلك إن المشكله دي هي صراع علي ملكية الأرض إللي كل طرف معاه سند بملكيتها والاتنين عايشين فيها ، وكل شويه يتخانقوا ، والموضوع تطور من صراع علي ملكية الأرض إلي صراع ديني ملوش نهاية كل طرف يا أحمد اخترع لنفسه دين غير دينه الموجود في كتابه المقدس ، وبعدين عمل لدينه الجديد ده تراث يبيح له قتل الآخر بغض النظر عن الأرض ، وبناء علي الاختراعات دي طلع من كل طرف جماعات منحرفه متعطشه للدماء كل أهدافها قتل الآخر ومحوه من الوجود ، وأصبح في مشجعين وممولين للأطراف المنحرفه دي في العالم كله بما في ذلك المنطقه العربية ، صدقني في ناس مايهماش عدد الناس إللي بيموتوا إنما يهمهم أوي إن عمليات القتل تستمر وكأن إللي بيحصل ماتش كوره وهما بيشجعوا اللعبه الحلوه.
- عم أحمد رمي الظهر ولعب شيش ياك وهو بيقول : إلعب يانعمان ، إنت وجعتلي راسي الله يلعن اليوم إللي شوفتك فيه ، أنا مبعرفش أنام من مناظر الدم والقتل والخراب والجوع ، أنا متهيألي إن الاتنين ولاد العم إللي بيتصارعوا علي ملكية الفدان في بلدنا لازم يقعدوا مع بعض ويشوفوا هما الاتنين بدون تدخل من حد يحلوا مشكلتهم إزاي ، يمكن يتفقوا إنهم يزرعوا الفدان مع بعض ويمكن يتقاسموا فيه بالعدل ، ويمكن طرف منهم هو إللي يشرف علي زراعته سنه ، والسنه التانيه الطرف التاني هو إللي يشرف علي زراعته ، المهم يشوفوا لنفسهم طريقه يعيشوا بها من غير سفك للدم ومن غير خراب ومن غير جوع ، يعيشوا يعني بكرامه زي البني آدمين.
- انتهي ماتش الطاوله ، بس الكلام ما نتهاش وتواعد عم نعمان مع عم احمد إنهم بكره يلعبوا ماتش جديد مع حكايه جديده.
#محمد_أبو_قمر (هاشتاغ)
ترجم الموضوع
إلى لغات أخرى - Translate the topic into other
languages
الحوار المتمدن مشروع
تطوعي مستقل يسعى لنشر قيم الحرية، العدالة الاجتماعية، والمساواة في العالم
العربي. ولضمان استمراره واستقلاليته، يعتمد بشكل كامل على دعمكم.
ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في
استمرار هذا المنبر الحر والمستقل، ليبقى صوتًا قويًا للفكر اليساري والتقدمي،
انقر هنا للاطلاع على معلومات التحويل والمشاركة
في دعم هذا المشروع.
كيف تدعم-ين الحوار المتمدن واليسار والعلمانية
على الانترنت؟
|
ارسل هذا الموضوع الى صديق
|
حفظ - ورد
|
بحث
|
إضافة إلى المفضلة
|
للاتصال بالكاتب-ة
اليوتيوب
لينكدإن
تيلكرام
تمبلر
بلوكر
الموبايل
