تبرعاتكم وتبرعاتكن المالية تحفظ استقلال الحوار المتمدن، فشاركونا في دعم استمرارية هذا الفضاء اليساري الحر

(القبض على مخمورين)

صوت الانتفاضة

الحوار المتمدن-العدد: 8110 - 2024 / 9 / 24 - 16:21
المحور: كتابات ساخرة

اليوم ابونؤاس حيل حلو، دجلة بيها بعد شوية مي، والخضار همزين ما حشوه كله وسووه مجمع سكني لو مول، والليل مالته بنهاية أيلول هواي طيب، فشتگول لو نروح نگعد على الشط شويه، نشم هوا نقي وناخذنا حسبة عشر بطاله بيرة حلوات نمزمز بيهن، ونسمع وحيده خليل تغني "انا وخلي تسامرنا وحچينا... نزهه والبدر شاهد علينا".

هكذا بدا حديثه الهاتفي مع صديقه، الذي تشوق جدا للذهاب وقضاء بعض الأوقات الممتعة، والخروج من البيت.

قارب الوقت منتصف الليل، كانت اخر قننتي بيرة قد فتحاها، بدت عليهم علامات الانتشاء، خصوصا وان "العذيب يتنسم... عبير الورد نشتم".

-شوف راح تصير الساعه وحده، فخلي شويه نتمشى منا لباب الشرچي، لان الجو حلو والحركة خفت.

وهما يسيران الى منطقة الباب الشرقي واذا بدورية شرطة تستوقفهم.

-شنو، الجماعة مبين سكرانيين ومتونسين.

- شربنا چم بطل بيره من الضوجة.

- زين لعد اصعدوا ويه جماعتكم

- على شنو سيادة الضابط، احنا ما مسوين شي غلط.

- تسكرون وتغنون وما مسوين شي غلط، احنا بلد إسلامي ولك، بلد الائمة والانبياء والاولياء.

صعدوا سيارة البيك اب الحمل، وجودو الكثير من الشباب السكارى.

جلسوا في احدى ممرات المركز، والتحسرات تملأ قلبيهما، فهما خجلان من هذا الوضع. أراد احدهم ان يخفف عن الاخر فقال مازحا:

-هسه لو ما خاذين بكلام وحيده خليل هم احسن "انا وخلي سهرنا بليل گمره... تنادمنا وطربنا بغير خمره".

-ولك هاي الاغنية اجت بزمن شويه بي خير، ما چان ا گو رجال دين ولا حكم ديني يقهر الناس ويسلبهم حريتهم وحياتهم، ما تشوف الشاعر يگول "تنادمنا وطربنا بغير خمره". وبعدين شوف الناس شگد نقيه، عشاگ اثنين يگعدون على الشط ويتنادمون، هسه اول ما يشوفون وحده گاعده على الشط، يگولون عليها هاي فد وحده....

-بس تعرف هم زين شرطة الامر بالمعروف والنهي عن المنكر الإسلامية هي اللي لزمتنا... شويه اسهل، لو باقين على لجنة الامر بالمعروف والنهي عن المنكر مال جيش المهدي 2004 وانت صاعد "جيل الطيبين مال الميليشيات"، لا چان هسه احنا متعلگين فلقه، ومخيرينا بين "هنگلانة الزهرة، بوري العباس، توثية الحسن، لو صوندة السيد"، هسه اشوا، بعد شويه الضابط يدز الحوشي مالته يلم من عدنا الفلوس وناخذ كل واحد راشدي ونروح.

-صدگ الحكم الديني طايح حظه، يعني ينهبك ويكتلك ولازم انت تقبل.

خرجوا من مركز الشرطة بعد عدة ساعات من التوقيف، عندها قال احدهم مازحا:

-مره ثانية من نجي نسمع وحيده خليل هجع .... "بسكوت اون بسكوت دده ما ورج احد..... فاضحني دمع العين يمه يسچب على الخد ".

طارق فتحي

#صوت_الانتفاضة (هاشتاغ)

ترجم الموضوع إلى لغات أخرى - Translate the topic into other languages

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.

كيف تدعم-ين الحوار المتمدن واليسار والعلمانية على الانترنت؟

تابعونا على: الفيسبوك التويتر اليوتيوب RSS الانستغرام لينكدإن تيلكرام بنترست تمبلر بلوكر فليبورد الموبايل