تدشين الحنفية والفشخرة البعثية

نضال نعيسة
كاتب وإعلامي سوري ومقدم برامج سابق خارج سوريا(سوريا ممنوع من العمل)..
(Nedal Naisseh)

الحوار المتمدن-العدد: 7685 - 2023 / 7 / 27 - 23:15
المحور: كتابات ساخرة
    

(باللهجة المحلية معليش)
بتتذكروا أيام المناسبات القومية والمنعطفات التاريخية وحفلات تدشين الحنفية، وقت نكون نحن، صغار ويا قلبي وا حبة عيني علينا، عم نتفرج ع شي مسلسل حلو، متل صح النوم أو حمّام الهنا ومقالب غوار، فبيقوموا هيك بلا أحم ولا دستور بيقطعوا عنك البث، وبيطلعلك مذيع متل هدون جماعة العراضة الشامية متجهم الوجه ليقول لك والآن ننتقل بكم إلى ساحة الدايخين ويحطوا لك خبر وفيلم عن مسؤول بعثي مهرج خريج روسيا الشيوعية وحاصل على شهادة تالت ابتدائي راسب ويعيد بتقدير شرف وبيصوروه هو وعم ينط من سيارة المرسيدس متل القرد وموكب شي الف سيارة وراه وينزل علينا متل القضا المستعجل واسم الله، ويكون لابس كرافيه مخططة وطقم اسود وأبيض كمان مخطط وفي مخطة ع بوزه وجيقم حاله وقرفان ومستعجل هو وعم يصفق ومعه شي ألف رفيق نصير حزبي وطفل طليعي لاممهم من المدارس ومن المعامل ويركض صوب لوحة عليها شوية تعاويذ وطلاسم بعثية وعلم البعث وشعار الرسالة الخالدة وبعدين ووسط هتاف الكومبارس الجماهيري بيوصل لعند بنت صبية هيك حلوة وأمورة وفقيرة جايبينها بباص المبيت أو سيارة زيل من الإسكان أو الريجي وباين التعتير والفقر ع وجهها وحاملة صينية قش فيها مقص وناطرة سيادته ليوصل لعندها وسط تصفيق الجماهير وهتافها بحياة الحزب القائد والحكومة العدية ورموز الأمة الأموية الكبار وبعدين بيلقطو للمقص هيك بحركة بهلوانية مفتعلة وواضحة وهون ذروة الحبكة الـPlot يعني بالإنكلش باللغة الاصطلاحية الشكسبيرية الـ Climax ولا تقرفوا وقمة الأكشن والفعل الدرامي البعثي المبتذل الرخيص والتمثيلية الهزلية وبيقوم بيقص الشريط الحريري إيذانا بانطلاق مشروع الحنفية الرائد العملاق الذي سيقضي به على الصهيونية والاستعمار والإمبريالية والكومبرادور والليبرالية الحديثة ويتحدى به شعوب الأرض أن يأتوا بمثله وكله تمهيدا لاستعادة الأندلس وتحرير القدس والأقصى ومن ثم فتح روما وبعدها ووسط هتاف وزلغوطات وفرح الموجودين ينتهز المناسبة الجليلة ويقوم بعدها بفقع الموجودين من الرفاق والرفيقات والمخبرين والمخبرات والطليعيين والطليعيات الصغار بموعظة وخطبة صميدعية عن الجنان القومية الموعودة والواحات العروبية والفضائل البعثية ومكرمات القيادات الأموية على الشعوب الترللية وقيادتها نحو الهاوية الحتمية ومن ثم يعود وينط متل القرد ع سيارة سيارة المرسيدس ويقفل عائدا لمعاقل القيادة القطرية ليمارس حملاته التضليلية ضد الشعوب المعمية وسط هتاف الجماهير الأبية بحياة الحزب القائد وعقد الدبكات الوطنية وترديد الشعارات الوطنية وإطلاق التهديدات الخلبية ضد الإمبريالية والصهيونية ومواعدتها بالمنازلات الدونكيشوتية الملحمية...
المهم بتتذكروها لهديك الحنفية والهمروجة البعثية؟ لليوم ما أجت فيها المية وما اشتغلت، ومعظم الرفاق والرفيقات اللي كانوا موجودين بتلك المناسبة التاريخية ما عندهم لا مي ولا كهرباء وميتين من الجوع والعطش وعايشين من قلة الموت...

#نضال_نعيسة (هاشتاغ)       Nedal_Naisseh#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل