فقعة ضوء: أيها الأعباء الكرام

نضال نعيسة
كاتب وإعلامي سوري ومقدم برامج سابق خارج سوريا(سوريا ممنوع من العمل)..
(Nedal Naisseh)

الحوار المتمدن-العدد: 7619 - 2023 / 5 / 22 - 18:07
المحور: كتابات ساخرة
    

(باللهجة العامية
بما أنكم صرتوا أعباء ع الشباب وفقدتم صفة المواطنين فصارت التسمية الجديدة والرسمية لكم اليوم بـ"العبء" وجمعها "أعباء" وذلك بعد المبادرة التاريخية لأحد وجوده الخارجية العباقرة المزمن في وظيفته، لذلك فلا تستبعدوا ولا تستغربوا ابدا بكرا بالجيش ضابط يقول لك بس تروح تخدم عسكرية لأنك فقير ومشحتف ومهرهر ومنتوف وما معك دورار تدفع بدل تعال لهون يا عبء..وقدّم نفسك فتقول له انا العبء رقم كذا من الدورة كذا سيدي النقيب.. أو معلم مدرسة يقول للتلميذ اطلع ع السبورة حل التمرين يا عبء فيقول له "العبء" (التلميذ)، انا استاذ؟ فيقول له: لا هالعبء اللي جنبك... أو بس بدك تروح تقدم شي طلب بدولة الرسالة الخالدة فتكتب بالاستدعاء انا العبء فلان بن فلان والدتي كذا تولد مضارب قريش القرن السابع الميلادي مكان الولادة يثرب... أو تكونوا قاعدين باجتماعي نقابي فيقول لكم نقيب الفنانين أو المحامين والأطباء والمعلمين أيها الزملاء الأعباء، او تخيل عضو قيادة قطرية بحزب قريش تبع الأمة الواحدة عم يخطب خطابا ناريا بمناسبة شي منعطف وكوع ومنزلق ومطب وخازوق تاريخي يقول في خطابه مخاطبا الجماهير المحتشدة في ساحة الغزاة المحتلين الأمويين (أسيادنا) أيها الأعباء الكرام، أو تكون ماشي بالطريق تشوف زميلك وتقول له مرحبا عبء كيفك؟ يقلك أهلااا عبوءة كيفك أنت وينك وين هالغيبة ولك عبء؟ أبقا منشوفك متل الأول؟ فبتقوم انت بترد عليه وبتقول له: والله يا عبء مشغول هالايام تعرفت على عبئة جديدة زميلتي بالشغل من الضيعة الفلانية من قضا الحفة مثلا، ويمكن أخطبها فلهيك مكركب شوي...أو أنك تشوف زميل دراستك بعد فترة طويلة وتكون تزوجت وهرهرت وتختخوا أسنانك وتزوجت وواضح الأسى والهم على وجهك وبيسألك كم عبء صار عندك؟ فتقول تلات أعباء وعبئة.. (تلات شباب وبنوتة)...أو مثلا يطلبك أبو حيدر الجوية ع الفرع ويقلك ولك عبء من وان بتعرفو للعبء كذا وليش عم يتصل معك؟ أبتعرف هاد معارض وضد الدولة ومتآمر؟ فأنت بتقول له والخضر أبعرفو بس هالعبء أجا لعنا ع الكافيتريا متل أي عبء تاني وأخد أركيلة وبعدين اتصل فيني مرة تانية وأجى وكان معه عبوءة ما بعرف مين هيه...أو بدك تحجز بمطعم ع التلفون فبيقوم العبء صاحب المطعم بيسألك كم عبء أنتو؟ أو وقت بتكون عم تقرا بكتاب الجغرافيا أنه بلغ عدد سكان القاووش والعصفورية 23 مليون عبئاً عبئاً ينطح عبئاً؟
وهيك والله أيها الأعباء الكرام...شو قولكين؟
أخوكم العبء أبو محمد اللاذقاني

#نضال_نعيسة (هاشتاغ)       Nedal_Naisseh#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل