تراشق كلامي بين الزيت البلدية والزيت الرومية باللهجة المغربية/مسرح

فريدة عدنان
كاتبة وشاعرة
(Farida Adnane)

الحوار المتمدن-العدد: 7288 - 2022 / 6 / 23 - 00:44
المحور: الادب والفن
    

هذا معيار بين الزيت البلدية او اختها الرومية منين دخل خبيث الشيطان بيناتهوم .كتباتو فريدة عدنان وقت العشية.
الزيت الرومية:اليوم أسيادي عندي لقاء مع الزيت البلدية زينها دايزو الكلام همة او شان صداقها غالي .او أنا ياسيادي منها غيرانة قهراتني بالتاويل او الرزانة .قلت علاش مانديرش بحالها أو حتى أنا تولي عندي مكانة أو مايخذني غير مول الهامة والشكارة عمرانة.
ولكن نسر ليكوم مسألة أنا اليوم غادي نوريها وجهها فالمراية أو نخليها قدامكوم شفاية.
الزيت البلدية: السلام كيسبق الكلام أو سلامي ليكوم أسيادي حملتو فصنية مرصعة بالجوهر او أطباق الزيت البلدية،أتاي بالياسمين قطفتو من البادية .أرضي أو أرض أجدادي ،أصلي أو بيه نفتاخر هادشي ورثو من والدي
الزيت الرومية:هههه هاذي أنت قالو زمان عرايس لالة قمر واحدة عورة أو اخرى ناقصة نظر.يشويني فالي مدحوك لونك لون الخز مايسر عين مايفاجي خاطر.
شوفوا أسيادي لوني لون الذهب كيشبه طلوع القمر أو الشمس إلى ضوات فالسماء تلمع
الزيت البلدية:أنا يا سيادي ما نحتاج نشكر راسي ،تاريخي طويل يتكلم فمكاني .أصلي شريف مايسمح ليا نعاير ولا نشاطي.
زيني تغناو بيه يامانضة مزلكة فالخيط مايعرف قيمتي غير مول الذوق الرفيع.
لا تلوموا قولي يا الحاضرين قالوا زمان إلي دق الباب يلقى الجواب
سمعي يا هاد الصفراء الصفريطة يا وجه الميت فالقبور ،لونك لون المرار أصفر يشبه طاس الغسيل فالحمام.أنت مجمع الضر والسموم أو طيابك زفر مافيه مذاق
الزيت الرومية:حدك تما أنا حبيبة الكبير أو الصغير .ها انت سولي شكون ما تياكلش من يدي الفريت
الزيت البلدية:ههههه كلشي عاق أو فاق باركة من النفاق،شرك باين أو سمك قاتل.أنا حاشا نكون بحالك تنداوي العليل أو نزين الوجه القديم .الي دارني فدارو مايجوع ولا الزمان عليه يدور.
الزيت الرومية:اليوم تقادو الريوس أو سومتي ولات عالية فالسوق مايقد عليا غير مول الجيب المنفوخ.
بالفلوس وليت تاج فوق الريوس.
الزيت البلدية:باركة من الغلط يا هاذ الحية .كلامك مردود أو الناس ماشي عبيد فوسية.
أنا يا سيادي ماتهمني فلوس ولا سومة ،أنا مانضر مانبغي الضرورة.
ربي باركني فكتابو أو علا شاني أو زاد فمقامي.أو هذا سر من أسراري.
أو اليوم أسيادي ليكوم كامل الحرية اختارو مابيني أوبين هاد الصفراء المخلية.

#فريدة_عدنان (هاشتاغ)       Farida__Adnane#          

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل