الأُسطى إسلام … عظمةُ امرأة مصرية

فاطمة ناعوت

الحوار المتمدن-العدد: 7214 - 2022 / 4 / 10 - 12:37
المحور: المجتمع المدني
    

صادفتني هذه الحكاية الجميلة على صفحة فيس بوك دون توقيع أو توثيق. وسواءً كانت حقيقةً أم من نسج خيال كاتبها؛ أحببتُ أن أقصَّها عليكم لما فيها من عظمة وإلهام لشباب اليوم. وأكتبها لكم كما وردت بالدارجة المصرية الجميلة، مع بعض الصياغة والاختصار لطولها، الذي لا يحتمله المقال.
ذهبتُ إلى بيت فتاة أحلامي لأخطبها، فسألني والدها عن والديّ، ولماذا لم يأتيا معي، فأخبرته بأنهما في رحمة الله. “ربنا يرحمهم. طيب ماعندكش إخوات؟" "عندي أخويا "إسلام" أكبر مني. لو حصل نصيب يا عمي ووافقتم مبدئيًّا، المرة الجاية بإذن الله نيجي سوا.” “طيب يا أستاذ أحمد، أنت بتقول إنك معيد في كلية الهندسة، وميكانيكي. قصدك بتدرّس في الجامعة هندسة ميكانيكا؟” “لا يا عمي، أنا ميكانيكي في ورشة عربيات. أنا و"إسلام" أخويا ورثنا ورشة ميكانيكا من أبونا الله يرحمه، وشغالين فيها سوا من وأنا عندي 7 سنين. وهافضل شغال فيها إلى جوار عملي الأكاديمي في الجامعة.” تغيرت ملامحُ والد العروس وسألني: “ومش بتتكسف يا بني لو طالب من طُلابك جه يصلح سيارته عندك؟" “لا. مش باتكسف!” "طيب عندك شقة؟" "أيوه يا عمي الحمد لله البيت بتاعنا شقتين، والعروسة تختار اللي تعجبها.” “أكيد وارثين الشقق من الحاج الله يرحمه." "لا يا عمي، والدي ووالدتي ماتوا الله يرحمهم في حادثة من 20 سنة. والشقتين دول جبناهم قُريب مِن تعبنا. "إسلام" كان عنده 13 سنة، وأنا 7 سنين لما أبويا وأمي توفوا. يومها إسلام أخدني في حضنه، وقالي: دلوقت مالناش غير ربنا. والصنعة اللي علمهالنا أبونا عشان مانمدش إيدنا لحد. وفتحنا الورشة. في الأول الناس كانت بتجيلنا من باب العطف علشان عيال أيتام. بس شُغل الأسطي إسلام عمل لنا صيت في كل مكان؛ وبدأت الورشة تكبر وزباينها تكتر وجبنا صنايعية كمان. ومع الوقت اشتري أخويا حتة أرض وبنا شقتين واحدة بإسمي وواحدة بإسمه. إسلام أصرّ إني أكمل تعليمي وضحى علشاني بتعليمه. كان طول السنين دي بيشتغل في الورشة ويرجع البيت يعمل أكل ويغسل هدومي، لحد ما أكرمني ربنا وجبت 97٪ في ثانوية عامة، ودخلت كلية هندسة. ومن فرحته يومها أخدني ورحنا سددنا ديون 5 غارمات وخرجناهم من السجن. دخلت الكلية ورجعت تاني الورشة. بس قبل الامتحانات بشهر ونص، كان أخويا يطردني علشان أذاكر. وكنت باتفوق كل سنة عشان أشوف نظرة الرضا والفخر في عيون أخويا إسلام لغاية ما بقيت معيد. وعمري ما هنسي فضله عليا.” "الله! شوقتني يابني أشوف أخوك العظيم ده. هاستناكم الخميس الجاي بإذن الله.” "اتفقنا يا عمي.”
وجاء يوم الخميس وأمام باب العروس قال لي إسلام: “عِشت وشوفتك عريس يا باشمهندس. مش مكسوف مني يا واد؟" "أنا أتباهى بجزمتك قدام الخلق كُلها.” ومسكت إيد إسلام بوستها. فُتح الباب ودخلنا، وقال لنا والد العروس بدهشة: “أومال الأسطي إسلام ماجاش معاكم ليه زي ما اتفقنا؟!” تلاقت عيوننا وابتسمنا وقال إسلام: “أهلا يا عمي. أنا الأسطى إسلام.” انتفض الرجل في ذهول وقال: “الأسطى إسلام الأسطوري ده، طلع بنت مش ولد؟ القمر اللي قاعد قدامي ده أسطى في ورشة؟!" قالت إسلام ضاحكة: “أيوا يا عمي. أنا لابسة فستان دلوقت، بس في الورشة لو شوفتني بالأوفرول، هاتقول إني ب100 راجل. والحقيقة يا عمي أنا اللي قولت لأحمد يقولك كده عشان لو إترفض، مفيش داعي ندخل في تفاصيل زي دي.” "وضحيتي بعُمرك اللي فات كُله علشان اخوكي؟" "وأضحي عشانه بالباقي من عمري كمان. إحنا كدا يا عمي وقت الصعاب بنكون رجالة. بس بيني وبين أخويا بأكون أخته وأمه. ماكنش ينفع اتعامِل بشخصية بنت في ورشة، وإلا كنت هابقى لقمة سهلة. في الورشة أنا الأسطى إسلام الراجل، مش البنت اللي لابسة فستان وجاية تطلب إيد بنتك لأخوها.” ترقرقت الدموع في عيون الرجل قائلا: "أنا موافق يابنتي. وبادي أخوكي أغلى حاجة في حياتي وكُلي شرف إنكم تكونوا جزء من أسرتنا.” نظرت لي "إسلام" والفرح يملأ عينيها الجميلتين وقالت: “مبروك يا بشمهندس.” قلتُ لها: “تعرفي إنك بالفستان أجمل بنت في الدنيا؟" قالت إسلام: "حد يقول للأسطي بتاعه كدا؟! خصم أسبوع من مُرتبك علشان بتعاكسني.”
***
تحية للأسطى إسلام وشقيقها، ولوالد العروس المستنير، ولكل من يشبههم في هذا العالم الذي لا يقوم إلا بالرائعين فيه، من أمثالهم.


***

#فاطمة_ناعوت (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل