جحا العراقي ..... هل أنا عراقي

جحا العراقي

الحوار المتمدن-العدد: 1660 - 2006 / 9 / 1 - 10:05
المحور: مواضيع وابحاث سياسية
    

أخوان أشونكم هاي شبيكم نسيتوني جحا يابه جحا ها عرفتوني .طبعا كلش تعذروني أخوان صارلي فترة هوايه مشا يفكم بس صدقوني بسبب الظروف أي مو الايميلات ولا المسجات الظروف إخوان .
اشكر كل أخواني وخواتي ألي راسلوني ليطمأنوا على صحتي وأخباري وأحب اكلهم هسه أنا كلش فرحان لان شفت الناس بدأت تكتب ومتخاف وهذا هو كان هدفي الأول والأخير اخلي الناس تبدي تفتح عيونها وتحجي وتظهر الحقيقة ....
وحسيت انه اكو أمل نرجع الشي ألي انكسر ونعيد بناء أنفسنا من بعد ما دمرنا الاحتلال والميليشيات الجايفة وأدخلنا بهاي الفتن .
طبعا وهنا أريد منكم إخواني أن توضحولي منو هو العراقي ومنو هو الغير عراقي لان آنا تخربطت علي الأمور إي ومداشوف زين ....

هل أنا عراقي عندما أقوم بتفخيخ السيارات وقتل الأبرياء وتفجير الجوامع والحسينيات والأسواق والمراكز المدنية إلي مالها أي علاقة .
هل أنا عراقي عندما أقوم بذبح أخويه العراقي وكص رأسه وذبه بالساقية .
هل أنا عراقي عندما أقوم باستعمال الدريل لزرف جسم أخويه العراقي وفقس عينه .
هل أنا عراقي عندما ادرس الآخرين طرق التفخيخ بالجامع .
هل أنا عراقي عندما أعذب واقتل الآخرين بالمساجد .
هل أنا عراقي من أدافع عن دول مجاورة مثل سوريا والسعودية وإيران وأفضلها على أبناء جلدتي العراقيين .
هل أنا عراقي عندما أكون عضو بالجمعية الوطنية واستلم راتب تسعة آلاف دولار شهريا وأنا كاعد كلشي ما أسوي والشعب ديغلي وانأ مسافر ايفادات وتارك الشعب ينذبح ويموت .
هل أنا عراقي عندما أكون عضو بالجمعية الوطنية واستلم رواتب الحماية مالتي البالغة خمسة ألاف دولار وأوزع بس ألفين دولار على الحماية واخلي الباقي بجيبي من أمدانا إلي رحنا انتخبنا هيج ناس مشايفة وجايفة .
هل أنا عراقي عندما أكون عضو بالجمعية الوطنية واستلم منحتين وحده بمائة ألف دولار والأخرى بعد شهرين بستين ألف دولار ( 160000$ مجموعهم ) وأنا كلشي ممسوي للشعب لعد شسوينا لكم إلي يقولي حجي جذب مستعد اجيبله نسخ من قوائم الصرف افتهمتوا بس شحجي مطايا واستلمت الحكم وإحنا صدقنا بيهم ما أحجي أكثر .. ولو أنا محضر لكم ملف كامل راح أطلعه الأيام القادمة خاص ياعضاء الجمعية الحرامية هما ورئيسهم السقاقي .
هل انأ عراقي من ادز مستشارين من قبل الحكومة العراقية للدول العربية والأوربية وأكلهم لا تستقبلوا العراقيين ألي يريدون يهاجرون أو يقيمون أو يطلبون لجوء عدكم لعد شختلف الوضع عن صدام القندرة طلعوا الحكومة الجديدة الفردة الأخرى من القندرة .
هل أنا عراقي من ألزم عراقيين مهاجرين بصورة غير شرعية لدول أوربية لطلب اللجوء والأمن بعد أن لم تحقق لهم حكومتهم العظروطية وأقوم بإرجاعهم إلى مطار السليمانية ليستلمهم سجن السليمانية تعذيب وقتل ومن ثم إرجاعهم إلى محافظاتهم بعد التعذيب لا صدك ماكو فرق عن صدام نفس الخيسة بس الماعون تغير .
هل أنا عراقي عندما اسقط التهم عن وزيرة كردية سابقة ألي كلف بناء سياج وزارتها أكثر من بناء قضاء( مدينة ) بكامله وانطته المقاولة لااحد أقربائها وهو طلعلها النسبة مالتها وكان عندها مكتب بأحد ضواحي بغداد تستلم المقاولات وتستلم نسبتها أول بأول مع العلم أن كل عطاء شركة يقدم لها يجب أن يحوي على قلادة أو تخم ذهب لها ... قنوعة هاي المرأة كلش قنوعة وأنا أتحدى أي احد يجذبني .
هل انأ عراقي عندما أبدا بإعطاء أسماء موظفين يعملون معي في نفس الدائرة أو الوزارة ينتمون لغير طائفة إلى الميليشيات الطائفية حتى تقوم بتصفيتهم .
هل أنا عراقي عندما أقوم باغتصاب مراكز الشباب والرعاية والطفولة ومراكز المعوقين ومقرات من دوائر الدولة واجعلها تتحول إلى مساجد وحسينيات .
هل أنا عراقي عندما اجعل الوزراء والرؤساء وجميع من في الحكومة يستلمون رواتب خيالية وهم لا يقومون بشي غير الصراخ أمام التلفزيون بالجلسة والضحك بينهم ومصافحة الواحد الأخر بعد الجلسة والشعب يحترق من وراءهم وراتب الموظف العادي لا يعادل واحد بالمائة من راتبهم .
هل أنا عراقي عندما اجعل أهم وزارتين تمثل اقتصاد البلد (النفط والمالية ) بيد أشخاص أصولهم إيرانية مو من قلة المثقفين والواعيين العرب بالمناطق الجنوبية ألي عدد الدكاترة والماجستير عدهم أكثر من عدد الطائفة الإيرانية إلي عايشه بالعراق .
هل أنا عراقي عندما اجعل جايجي ( بائع شاي ) يصبح مفتش عام في إحدى الوزارات وهو ممكمل متوسطة لانه تابع لا احد الميليشيات واجعل صاحب شهادة ماجستير يبيع الملابس ( جمبر ) على الأرض أي مهزلة هاي .
هل أنا عراقي من اجعل جحا وزير خارجية العراق يروح يقدم نفسه بإحدى الدول الأوربية على انه وزير خارجية كردستان لعد وين الوطنية شنو انكطعت ما بقت بس مولدة .
هل أنا عراقي عندما أقوم بتقديم منحة مئتين مليون دولار لااخوننا اللبنانيين واحنا العوائل المهجرة لااسباب طائفية من الشمال والوسط والجنوب مالكيه خيم أو بيوت تنام بيها وحضرة جحا العراقي رئيس الوزراء كاعد يتفرج ونايم ورجليه بالشمس .
هل أنا عراقي عندما اخلي جحا العراقي مدير شبكة الأعلام العراقية ألي هو تابع لااحد الميليشيات المسلحة أخليه بيده صندوق دعم شهداء جسر الأئمة والإعلان التجاري وهو يلغف براحته وفوق كل هذا ينطي إحداثيات لبعض الميليشيات عن طريق علاقته بالقوات العراقية والأمريكان بأنهم سوف يداهمون الليلة أو اليوم من قبل قوات عراقية أو أمريكية ولحد يجذبني أخوان تقدرون تسالون إلي يشتغلون بالبث الخارجي للعراقية هم أحسن مني .
هل أنا عراقي عندما أقوض صلاحية جهاز المخابرات العراقية واخلي القسم الخاص بإحدى الدول المجاورة ملغي وألغيه تماما واخلي منتسبين هذا الجهاز يخافون من كلشي حتى صلاحية ماعدهم لعمل أي شي من امدانا .
هل أنا عراقي عندما اقبل بتعويض الضارة إيران مئة مليار دولار واحنا نروح نبوس قنادر الدول الأوربية حتى تنزل ديونه شحجي .
هل أنا عراقي وافرح بقتل أخويه العراقي على أيدي الاحتلال .
هل أنا عراقي عندما أقوم بتقسيم البلد وتفتيته .


جاوبوني أخوان هسه أريد اعرف منو العراقي ومنو مو عراقي الأمل بيكم أخوان لان أنا غسلت أيدي من الحكومة ومن القوات المحتلة انتو الأمل أخوان .


حكمة الحلقة ( كل من يدافع عن وحدة العراق أرضا وشعبا بغض النظر عن قوميته أو ديانته هو عراقي )

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل