جحا العراقي مدير للمخابرات العراقية

جحا العراقي

الحوار المتمدن-العدد: 1478 - 2006 / 3 / 3 - 11:01
المحور: كتابات ساخرة
    

جحا العراقي اصبح مدير للمخابرات العراقية بقرار رسمي من القوات الامريكية يعني من خوالنا الامريكان وكان مهيا لهذا المنصب لان جان الاخ بايعها وهو ملزك اصله كردي على عربي على تركماني على سني على شيعي عمي والله راضي كل الاطراف بلون الطيف العراقي .
وكان من تقعد وياه وتحجي ويظهر بلقاءات صحفية تلكاءه مثقف ومودب بشكل مو طبيعي بس هو بالحقيقة لسانه زفر اكثر من اللازم ( لان ياكل دهن هواية وزيت فلسانه زفر وخاصة هو يحب السمك) .
طبعا اخونا جحا فعلا مسقط وماكو هيج ابو نسوان درجة اولى وبايعها للستار ولسانه ينكط فشار ( فشار يعني شاميه بس بالامريكي ) عمي اذا تكعد وياه وتحجي والله تتونس لان حجية كله مال واحد سقاقي مضبوط ( سقاقي يعني سواقي للماء ) وصدك امريكا عرفت شلون تختار هيج مدير مخابرات عراقي (مو هيه الي ربته ).
طبعا استلم جحا المخابرات العراقية وعين جماعة كادر رئيسي بالمخابرات العراقية هدف الكادر الاساسي هو الاغتيالات وطبعا عين من جميع الاطراف سني يقول له عليك ان تقتل شيعي وشيعي يقول له عليك ان تقتل سني وكردي يقول له تقتل تركماني وتركماني يقول له تقتل كردي ومسلم يقول له تقتل مسيحي والعكس صحيح وكل هذا من اجل ان يرتب نفسه لمستقبل مهم في العراق الجديد طبعا وهاي مو اوامره حتى مانظلمه ولكن اوامر خوالنا الامريكان اما الشخصيات المراد اغتيالها وقتلها فهي شخصيات دينينة وعلمية وتخصصية وحزبية وتنظيمية واساتذة جامعات من اجل البلبلة وخلق الفتن وابقاء حال العراق على ماهو عليه الان حتى يبقى خمط الامريكان للنفط للستار وحتى يبقى ثمن شراءجميع النفط العراقي 17 دولار للبرميل الواحد من قبل خوالنا الامريكان حسب مصدر موثوق بوزارة النفط العراقية والاخوان ملهينا بالدين ومشاكل طائفية وحزبية وفيدرالية وضراط وهما جاي يخمطون براحتهم صدك فهيمين .
طبعا قدم ميزات جحا للكادر الاول في المخابرات للي يقوم بهذه العمليات القذرة ومن هذه الميزات هي .......

1. سيارة بيجو نوع 306 يدفع الف دينار يوميا قسطها وتصبح ملك صرف لضابط المخابرات الذي يعمل فيها تكسي (سيارة اجرة ) ليقوم بسماع الاخبار عن طريق الناس التي توجره ( عبرية ) ويقدم تقرير اسبوعي بهذه الاخبار .
2. راتب يتجاوز ال500 دولار شهريا ماعدا المخصصات والايفادات .
3. مكافاءة على كل عملية اغتيال لشخصية مهمة وعلمية .
4. قطعة ارض سكنية وبالعافيه عليه .

وهذا اخوان اعلان مدفوع الثمن من قبل جحا فلااحد يورطني وياه ترى هو طك خوش طكه وانطك .
طبعا جحا نفذ كل ماطلبه منه خواله الامريكان وبعدين خواله طكواله طابع ابو العشرة وقاموا بعد ان انتهاء صلاحيته ودوره ( ايكس باير ) وضعوه تحت الاقامة الجبرية لماذا لااعرف لحد الان بس والله الا اعرف شراح يصير بجحا وانا متابع اخباره يومية وهو بصحة جيدة واستلم القيادة من جحا الكبير استلم جحا اخر صغير السن يطلق عليه عدي العراق الجديد (وهو ابن عم رئيس اكبر حزب ديني في العراق) بعد ان دخل دورة بامريكا شهرين ماعرف شنو التنازلات الي قدمها جحا الصغير وخاصة انه هو من اصحاب العمائم والتنازلات صاير بفلس هاي الايام بس والله للاسف اصبح للعمامه ماكو قيمة من وراء امثال جحا رغم انه اني لااعترف لابعمامه بيضاء ولاسوداء لان الاثنين كلاوجيه درجة اولى .
عمي بالعافية عليك جحا الصغير وخاصة وانت تدير اكبر جهاز مخابرات مسوول فقط عن الاغتيالات والقتل للمثقفين والافراد العراقيين بعمليات قذرة والله اهنيك من كل قلبي ويشرفني ان اقول لك انه انا رغم كل سرية عملكم وصلت لهذه المعلومات بسهولة وممكن توصل اي معلومة بالمخابرات العراقية الى اي شخص عراقي بسهولة تعرفون شنو السبب لان للاسف الشديد انتوا مجاي تعملون بوطنية واخلاص لان هدفكم فقط الخمط وانجاح المخطط الامريكي للعراق والف هلا لامريكا .......

#جحا_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات