جحا معارض سابق بالمعارضة العراقية قبل سقوط بغداد

جحا العراقي

الحوار المتمدن-العدد: 1471 - 2006 / 2 / 24 - 10:56
المحور: كتابات ساخرة
    

بوي والله طركاعة جحا جان جالس بارض المنفى وينتقد النظام والفساد الاداري ووضعية البلد والاسعار الغالية الي تثقل من هموم المواطن العراقي وجان مستلم النظام الساقط ( ساقط لان سقط بايدي الاحتلال ولانه ساقط خلقيا واخلاقيا ) حاصل فاصل وكل يوم ينتقد الفساد الاداري والرشوة والحصة القليلة والنفط واالغاز الي جان ب500 دينار وسعر النفط جان اللتر ب100 دينار والبانزين ب20 دينار هاي اسعار السوق السوداء قبل سقوط بغداد وجان يقول بس استلم الحكم الا اساعد المواطن العراقي واخليه يغرق بالفلوس والخيرات والتوظيف (يغرق يعني يغرق من القهر والضيم اكثر ) واهم شي المواطن العراقي اهم من اقاربي واصدقائي وحزبي لان القائد الفلتة ابو هدلة بس فايد عشيرته ورفاقه بالحزب وباقي الشعب ظالمهم حتى دواء ماكو ولا حتى شويه رحمة والفساد واصل اكثر من 40% في دوائر الدولة هاي قبل السقوط واكمل مقولته جحا وانشاءلله اخوان من استلم الا اخلي العراق جنة واوحد العراق واخلي نموذج لدول العالم الاسلامي والعربي وراح تشوفون شلون راح اسوي البلد فلته واخليه يصير من عجائب الدنيا الثمانية بعد ادخال العراق وي العجائب السبعة ويصير العجيبة الثامنة .
وطبعا كان ينهي خطابه بضرورة التوحد بالكلمة والجهاد ضد جلاوزة النظام الصدامي ( جلاوزة كلمة فرنسية تعني ولد الخايبة والجايفه) .
كان جحا من الاشخاص الذين يتكلمون كثيرا مثل القائد الفلته وحجيه مثل حجي القائد الظروطة بس حجيه كل هندي وكلشي ماتفتهم وكلمات كلها (منحني جدول بياني سوف وسين ومرحلة وافاق وراح تشوفون واحنا بعون الله ) من هاي الكلاوات الي جان يضحك بيها على فكر العراقي البسيط وجان كل هاي والشعب مصدكة ( الشعب منطقة ببغداد قريبة من الراشدية ) . عيني واستلمها حاصل فاصل الشغلة كله نضال واحنا وبس راح تشوفون شراح نسوي طبعا بالبداية جانت امريكا تمثل الشيطان الاكبر لحزب جحا المعارض بس بعدين صارت الصديق الاكبر لان جحا عرف اللعبة السياسية بشكل حلو واللعبة تتلخص باس كم حذاء على جوراب امريكي وفض السالفة واستعمل نفس تاريخ نضال قائد الامة العربية نفسه بالضبط ذاك باس كم بوتين امريكي وهذا باس قندرة الامريكان ماكو اختلاف بس الفلم الامريكي تغير بيه بطل الفلم عمي والله بالعافية عليك جحا انت عرفت شلون تستلمها واندليت الدرب والله احييك جحا من كل قلبي .
واستلم جحا العراقي رئاسة الوزراء بعد ان عرف ان الشيطان الاكبر ليس امريكا لا ولكنه صدام وبعد ان غير مبادى حزبه مو هي الاحزاب الدينية يومية تغير موجة الراديو مالتها لان ماكو شي ثابت عدهم .
استلم رفيقنا جحا رئاسة الوزراء ولزك كل جماعته واعضاء حزبه واقاربه لزكهم وحشكهم بالدولة من اصغر مطي لااكبر فهيم وبالعافية نفس خطوات القائد ابو الحميرين وبدا ينهض بالاقتصاد العراقي الى القمة بحيث ارتفعت نسب نهوض الاقتصاد العراقي من نسبة فساد اداري قبل السقوط 40% الى نسبة فساد 99% بعد السقوط وبقيادة الحكيمة وبالعافية عليه وبدا الخمط بعد ان كان بالعراقي بالنظام السابق الى خمط بالدولار بالنظام الحالي وكلها مستفادة والشعب المظلوم الوحيد الي يدفع الثمن.
اما المنجزات العظيمة لقائدنا الفلتة جحا تتلخص .
1 . وصل سعر البانزين من عشرين دينار قبل السقوط الى مئتين وخمسين دينار بعد السقوط والرقم اخذ بالارتفاع الى الف وخمسمائة دينار هو وعد الشعب بالخير ومااخلف وعده (ترى مااخلف وعده مو للعراقيين لا جماعة مو تفتهمون غلط هو مااخلف وعده للامريكان افتهتموا).
2. وصل سعر النفط 100 دينار قبل السقوط وهاي كله اسعار سوق سوداء وليست الرسمية اما بعد استلام جحا منصب رئيس الوزراء خمسمائة دينار للتر الواحد .
3 . سعر دبة الغاز قبل السقوط 500 دينار والان دبة الغاز ب12000 دينار .
4 . دواء كان متوفر قبل السقوط بالمستشفيات الحكومية هسه حتى المخدر لازم تشتري من الصيدلية .
5 .سعر الحاجات الضرورية ارتفع بعد السقوط من خمسة الى عشرة اضعاف اسعارها قبل السقوط .
7 .مستوى الخدمات الصحية والخدمية والمجاري والمصانع الحكومية انخفض الى نسبة 20 % وخسر العراق 80% من هذه الخدمات من عبقرية وافكار جحا الفذة لان الكلام حلو بس الفعل والتطبيق غير شكل .
8 . موقف جحا من تقسيم العراق موقف جاد وكلامه بالوحده كان فقط مزحة بوقت المعارضة .
9 .تهريب الاثار والنفط وادخال الارهابيين والخمط والمافيا والاختطاف صار بفلس حتى بالمحافظات التي لم تطله ايدي الارهاب وكله بسبب تسيب وسوء ادارة القائد جحا الفلتة .
واخيرا هذه هي منجزات جحا العراقي الي يتحجج بالارهاب والفساد والسرقة وهو اول عمود من هذه الاعمدة لان الارهاب ماموجود بثمانية محافظات جنوبية صرف عليها عشرين مليار دولار لااعمارها بعلم جحا وموافقته واثبتت الارقام الاخيرة انه العشرين مليار دولار بهذه المحافظات سرقت في جيب مسوؤلين الي احضرهم جحا ولم يستخدم منها غير عشرين مليون دولار فقط للاعماروانشاءلله الوثائق موجودة ومنتظر بس يكون قضاءنا بالمستقبل قوي واشوفك جحا بقفص الاتهام انت وحزبك الديني الوردة .
بقى اريد ان انبه الناس الي راحت انتخبت قائمة جحا العراقي بالانتخابات العراقية الاخيرة والي حاول جحا ان يحصل دعم من المرجعية الي طردته من الباب باخر لقاء وياها وهددته باسقاطه وهو جالس على كرسيه ببغداد لذلك حاول تمويه جميع الحقائق حتى يحصل على دعم المرجعية ويعاد انتخاب جحا مرة اخرى لمنصب رئاسة الوزراء...
هل من المعقول ان المرجعية راضية على كل تصرفات جحا العراقي وتؤيدها طبعا اصدقائي من وكلاء المرجعية اكدوا لي شخصيا ان القائمة التي دعمتها المرجعية بشكل سري هي قائمة الكفاءات (835 ) بقيادة الدكتور علي الدباغ هذا الرجل الذي احترمه رغم اني اختلف معه في الكثير من الامور ومن ضمنها موافقته واعداده على الدستور الذي اعد لتقسيم العراق رغم ذلك وقف حاجز ضد هيمنة الاحزاب الدينية وتدمير فكر المستقلين ولااني اتوقع انه شريف فاني احيييه من منبر كتاباتي اما القائمة التي حاولت دعمها المرجعية رغم انني لااعترف لابالمرجعيات الدينية الشيعية ولاالسنية ولكني احب ان اوضح الحقائق حتى لاتوخذ الامور بشكل اخر وتفهم بشكل اخر فقد تم دعم قائمة الكفاءات وللاسف الناس تمشي مع من صوته اعلى ومسموع ومع من يعرف كيف يلعب الاسلوب القذر بالسياسة ولاتمشي الناس مع من هو شريف ويحاول ان يبقي العراق مستقل وليس تحت هيمنة احزاب دينية تابعة للاحذية المحتل .
نسيت ان اقول انه لجحا العراقي احد من اقاربه الشرفاء الذي كنت اعرفه شخصيا وكان موقع سكنه وعمله في الكرادة لقد اغتيل بسبب انه قريب جحا العراقي بعبوءة ناسفة زرعت في محله وكان نظيفا لم يقبل اي منصب يعرض عليه من جحا وكان يساعد الفقراء شهريا وبشكل سري عن طريق حصص مواد غذائية فرحمة الله عليه وتحية مني اليه وهو في قبره الان كان اشتراكيا رغم انه متدين وصاحب دم خفيف انه فعلا عراقي شريف ونظيف لم توسخه سمعة قريبه جحا وتصرفاته .
حكمه الحلقة ( كل سياسي عراقي يتكلم كثيرا اعرف انه سوف يعمل بعكس ماتكلم به بعد استلامه لاي منصب سيادي )

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل