عبلة

عبدالله مهتدي

الحوار المتمدن-العدد: 6677 - 2020 / 9 / 15 - 02:29
المحور: الادب والفن
    

كان يا مكان
حتى كان اللي كان
كانت عبلة وكان عنتر
منهم خلاقت الدنيا
كانت عبلة زينة الضحكة مسﻛدة السمية
وكان عنتر على العاود يتمخطر
يزرع في أرض لقبيلة
قمح وشعيرة
يوكل وياكل
من غلة لبحيرة
عنتر الهمة والشان
عنتر الجود والعناية
الوقفة جبل
والكف صح من وقفة النخل
والقلب رطب من الطوب
قصح من لحجر
والساعد مفتول من قبضة الصخر
وكانت عبلة
السالف من الارض لسما
العيون الكحلة
والمشية خف من النسمة
تغني معا ضحكتها طيور الما
عبلة اللي تخبل في لسان عنتر عليها لكلام
وجف لقلم
عبلة اللي ما ستر جرحها كفن
ولا شيع دموعها علام
وكان......
.حتى صبح الفرح في عين عنتر
دمعة على الدمعة
يﻛدي بحال الشمعة
وكان....
.حتى كان بين كل قبيلة وقبيلة
دم وخصام
يشعل نار لفتيلة
وكان.....
حتى كان بين كل دار او دار
عسكر وحدادة
نواح وعدادة
وبنادم اللي كان
ملي كانت الدنيا دنيا
ماشيا بالنية
تشيك بريش لغراب
تمسخ بيادق وضباع
ونبت على كل شجرة بياع
وكان ....
حتى الارض اللي كانت شياع
حازها الدراع
وكان حتى كان صباح
ما شير بيه صياح
ما فيقوه فرارج لقبيلة
ولا سبقو نباح
عنتر خرج ما ولى
ما خط من دواية لمداد
ما خلى حرف من كتاب
ما زمم عتاب
عنتر غاب
تﻛولو ملح أو داب
وكان ....
حتى تقسمت لقبيلة
دواور وزناقي
حفاري وسواقي
معامل وحلاقي
وصبح لكل ودن ساقي
ولكل واشي طراح
والارض اللي عليها عبلة حبات
توسدت حجرها
شربت ماها وكلات ثمرها
حلبت بقرها
وسقات بدمها شجرها
ديك الارض
بين عشية وصباح
رجعت مبيوعة
وصبح الباطل سيف دباح
وكل كبير في لقبيلة
يفهم حتى يفهم
ويزم
وكان ....
حتى تفرقة اللمة
والحق اللي كان هنا
صبح تما
وتباع الحب نعناع وشيبة
في سوق الحبة
والصح تبخر حرمل وشبة
لكل لسان لجام
ولكل فم حجام
والكلمة اللي دارت من بنادم
شي حاجة في الدنيا
ولات دفوع وهدية
تتسمى بألف سمية
ولات حروزة يتشايرو بيها لقرودة
بين حيطان القبة
وصار النضال سبة
وتقسمت لقبيلة
قبيلة عنتر وعبلة
عرب وفاسة
ريافة وسواسة
واللي سرق الجاه
دا معاه الرياسة
وكان ...
حتى كانت حكاية عنتر وعبلة
مطرزة بالدم
ما بغات أتردم
بحال لكتاب اللي ما كتبو مكتاب
بحال الجرح اللي ما بغا يتسد ولا يبرا
بحال الحق اللي سدو عليه الباب
لاحو سوارتو فوق سور عالي
في الثلث الخالي
بحال الحاكم اللي ساب
بحال الطالب اللي كان حيلة وسباب
بحال عنتر اللي تبخر بين السحاب ضباب
وخلا عبلة دايعة في الطرقان
تفتش بحال لهبيلة
عبلة مولات الخلخال
والخدود الحمرا
عبلة ملح الﻛمرا
زينة الضحكة وميمون السعد
عبلة اللي مازال تﻛدي بحال الجمرا
مازال تغزل
من صوف لحكاية حروف الهضرا

#عبدالله_مهتدي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل