هوجة 25 يناير حتي إشعار آخر

أيمن غالي

الحوار المتمدن-العدد: 6472 - 2020 / 1 / 24 - 10:12
المحور: كتابات ساخرة
    

إللي حصل في مصر في 25 يناير 2011؛ إتفقنا نوصفه بإيه إنشاء الله في معاجمنا وكُتبنا، والراجل الكوبارة بتاع التاريخ يكتبه إيه في كتوباته .. الراجل عمّال يكُح ويتِّف وينِّف من 2011 ولغاية النهاردة في 2020 ومش عارف يكتب إيه من إللي بيسمعه مننا وما زلنا مختلفين عليه .. قدَّروا شيخوخته وشيبته وهيبته ..
أنا ذات نفساويتي بأسميها هوجة يناير، وشرحه هوجة 30 يونيو 2013، وقبلها هوجة 23 يوليو 1952، وقبل إللي قبلها هوجة عرابي(1879-1882م) .. بس داخل في نخاشيشي حكاية ثورة 1919 وقبل منها بقرون ثورة البشموريين في زمن القذر الخليفة المأمون ..

نرجع بقي لكلام العلم ونشوفه بيقول إيه
العلم بيقول:
"إعتماد رواية أحادية هي تزوير للتاريخ" ..
يعني إيه الكلام ده ؟
يعني لو واحد زي حالاتي؛ كان تقريباً عايش في الشارع السكندري، وعاصر الأحداث من صباحية 25 يناير ولشهور بعدها؛ لغاية ما إتطَّشينا بالإستبن - محمد مرسي - وخَلَعَّانّا منه في 30 يونيو 2013، وحبشتكانات التفويض إللي كلنا عاصرناها ..
ولو حاولت أكتب إللي شوفته بأمانة وسجلته بكاميرتي .. علم التأريخ الحديث حا يقول لي: "أنت مِزوَّراتي" ..
مزوراتي إزاي ؟ ده أنا مصورَّاتي ومنظرَّاتي لكل إللي حصل !!
ييجي التاريخ ويقول لي:
هل تصاويرك كانت بتقنية 360 درجة وثلاثية الأبعاد وَلّا من زاوية واحدة وثنائية الأبعاد ؟
صورت كل الناس وكل الشوارع بطول مصر وعرضها ؟
تعرف كل واحد في الشارع دماغه كان فيها إيه ؟
عندك وثائق وزارات الداخلية والخارجية وأمن الدولة والرئاسة وتقارير السفارات العاملة في مصر وتقارير مخابرات الدول المعنية بالحونكيشة المصرية والمخاطبات الدولية للرئاسة والجمعيات الأهلية ..
رصدت تحركات الثورجية ؟
عندك خطط ومخططات الدول الغربية إللي كانت بِتلغوَّص في الأحداث ؟
عندك رصد لكل الفعاليات علي السوشيال ميديا للأحداث ؟
عندك كل التقارير الصحفية والإخبارية والإعلامية عن إللي حصل ؟
طبعاً أنا كأيمن غالي؛ ما عنديش إجابة لأي سؤال من دُول وبالتالي التاريخ حا يقول لي:
يبقي تحُط لسانك في بوءك وتبطَّل بَرطَمَة بَدْل ما نقطعهولك من لغاليغه ..
تخيلوا التاريخ بيهددني بقطع لساني من لغاليغه !!
بس أنا من حقي أتكلم وأقول رأيي وأنشر الصور إللي صورتها ..
هنا التاريخ حا يقول لي: طبعا من حقك كل ده، وأكتر من كده كمان؛ لكن عند التأريخ تقف بإحترام وتِتْوكِس وتسيب أهل العلم يكتبوا التاريخ؛ ما هو أنا مش شغال عند أهاليكم وكل واحد عاوز يرزَع إللي في دماغه ويرّجّع إللي في بطنه في كتاب التاريخ وإكتب يا عم التاريخ؛ راعوا شيخوختي الله يحرقكم ..
أنا كتاريخ - وبعد التطور الهايل في علم التأريخ - ما أقدرش أكتب غير إللي إتفقت عليه مدارس التأريخ الحديثة
واليوم إللي حا تتوفر فيه كل الوثائق إللي قلت عليها وتسجيل شهادات الشهود؛ تاخدها مدرسة تأريخ حديث زي المدرسة الانجلوساكسونية أو مدرسة المراجعة أو المدرسة الفرنسية أو غيرها من مدارس التأريخ الحديث، وإللي فيها آلاف العلماء والباحثين، ويدرسوا الوثائق دي علي مدار سنوات كافية ويخرجوا لنا بتوصيف وتعريف علمي للي حصل في 25 يناير في الشارع المصري ..

تصدقوا إن عم التاريخ ده عنده حق
وهنا حا يسألني سائلٌ: وإزاي حا نعرف حقيقة إللي حصل ؟
هنا حا أقول له:
اليوم إللي حا تعرف فيه حقيقة إللي حصل في هوجة يوليو 1952؛ تحسب بعدها من سبعين لـ سبعميت سنة وإحتمال وقتها تعرف حقيقة إللي حصل في 25 يناير 2011 ..

ولغاية ما يحصل المٌراد من حقنا كلنا نختلف زي ما العلماء إياهم بيقولوا إن إختلافهم رحمة ..
ولغاية ما نوصل لليوم ده؛ ضروري نعمل طلعة سنوية في ميادين مصر في كل 25 يناير يمر علينا، ونسميها طلعة - يناير - رحمة ونور، وناخد معانا قُرَص وسْريس وجُعضيض وجَلاوين ..
ونترحم علي أرواح إخواتنا وأولادنا إللي راحو، وعلي بلدنا وممتلكاتها إللي إتحرقت، وعلي أمننا وإقتصادنا إللي راحوا في ستين داهية ..

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل