في إنتظار بن منظور السوداني

أيمن غالي

الحوار المتمدن-العدد: 6185 - 2019 / 3 / 27 - 14:46
المحور: كتابات ساخرة
    

من كام سنة كنت مشارك في قافلة طبية للجالية السودانية في إسكندرية، وقلت أكيد كلهم من جنوب السودان هربانين من الزول إياه، وكان علي حد علمي وقتها إن لغة جنوب السودان هي الدينكا؛ فقلت أدخل علي الإنترنت وأشوف لي كلمتين دينكاوي أعمل بيهم شغل مع الزباين ..
ودخلت وإطَّشِيت بمعلومات عجيبة ما كنتش متخيلها .. السودان فيها أكتر من 80 لغة، وكل لغة بلهجاتها ..
وخلال فعاليات القافلة فوجئنا إنه ما فيش حد من الموجودين يعرف لغة الباقيين وكانت حوسة ..
وبعدها قابلت أم وأولادها من چوبا وسألتها: إنتم دينكاوية ؟
قالت لي: إحنا من قبيلة شولو ولغتنا شولو، وكل قبيلة في الجنوب لها لغتها الخاصة بيها وإن الجنوب فيه 36 قبيلة بـ 36 لغة مختلفة ..

نرجع بقي لإبن منظور السوداني
تخيلوا بقي لو عندنا إبن منظور سوداني شبه بن منظور المصري ؟
ناس حا تقول الأول مين بن منظور المصري وبعدين نبقي نشوف أخوه السوداني ؟
حا أقول لكم ..
بن منظور المصري ده لغوي مصري عروبي؛ في يوم شاف إن اللغة العربية بعافية شوية، ومحتاجة شوية ترميمات ومَرَمَْات؛ فعمل المَرَمَّة الكبيرة، وأخد مفردات الكلام المصري (القبطي) وعمل منه إيشي جذور وفروع وتصريف وحبشتكانات عربية؛ أثري بيها اللغة الوليدة ..
وطبعا كام واحد قبل بن منظور عملوا نفس الحونكيشة، وجمعوا كلام السريان بلهجاتهم (شرقي، غربي، نبطي، فلسطيني، كنعاني، حيثي، ..) والفرس بلهجاتهم والأكديين والفينيقيين والمندائيين والأحباش والسبئي المعيني وغيرها بلهجاتهم من الشخروميت لغة إللي كانت في شبه جزيرة العرب وشمالها وجنوبها وشرقها وغربها وحتي إللي تحت الأرض، وما سابوش ولا حتي أصوات البقر والمعيز والجمال وباقي العيلة وسجلوها إستحوذوا عليها ..
ويبقي عنده كلمة من غير نقط، ويجرب يحط النقطة مرة من فوق ومرة من تحت ومرة نقطتين ومرة تلات نقط ويطلع لك طابور من المفردات إللي مالهاش معني، وإفتي يا معلم وضيف للمعاجم ..
وإدعك يا ريس وإضرب في الخلاط وهوب بقي عندنا عشرتاشر مليون جدر، وشمعتلاف فشليون كلمة، وشفعوميت فنكوش ..
علشان كده تلاقي للكلمة الواحدة عشرتاشر مرادف، وللأسد شخروميت إسم، وللسيف شعروميت إسم، وللجمل سفعوميت إسم وهكذا ..

نرجع بقي للزول بن منظور السوداني
لو قولنا لإبن منظور السوداني؛ إعمل لنا لغة سودانية موحدة علي طريقة بن منظور المصري وأصحابه، وسيبويه وأصحابه، ونقول لهم أهو عندكم أكتر من 80 لغة بتوعوتنا وعشرتاشر ألف لهجة وفرجونا همتكم .. يا تري ممكن يطَّلَع لنا لغة شكلها إيه، وحا يبقي فيها كام جدر وكام كلمة .. وكام وكام وكام ؟

المشكلة الكبيرة بقي لما واحد زي حالاتي قبل ما يتعلم ويعرف ويفهم ويقرا في تاريخ اللغات ونشأتها ونشأة اللغة العربية ومكان نشأتها، ويشوف التشابه الكبير بين اللغة العربية وباقي لغات المنطقة؛ يرد عليه واحد من داخل المطبخ وعارف وفاهم الليلة كانت ماشية إزاي - زي بن منظور نفسه - ويقول لك: أصل اللغة العربية هي أصل كل لغات العالم وكل اللغات أخدت منها ..
ويطلع علينا واحد زي د. علي فهمي خشيم ويعمل كتاب من شخروميت صفحة؛ يِلّف ويدور فيه؛ علشان يثبت ويقول لنا إن اللغة القبطية لهجة من اللغة العربية .. شوفتوا تدليس وصفاقة أكتر من كده ؟!!
عرفتوا بقوا العروبيين ضحكوا علينا إزاي وإنهم لَبِسُّونا السلطانية ؟

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
في رحيل جليل شهباز، عضو هيئة إدارة الحوار المتمدن	في رحيل شاكر الناصري، أحد مؤسسي الحوار المتمدن

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل