الحِلفَان الوزارى

أيمن غالى

الحوار المتمدن-العدد: 5906 - 2018 / 6 / 17 - 10:43
المحور: كتابات ساخرة
    

الوزارة المصرية الجديدة حلفِت اليمين من كام ساعة فاتوا, و كان عندى أراء كتيرة على حِلفانات مناسبة للمرحلة اللى بتمر بيها البلاد و تناسب بيئتنا و شعبنا, يعنى مثلا ما ينفعش نحلف براس الملك أو الملكة و إحنا ما عندناش لا ملك و لا ملكة, و على شاكلتها حلفانات كتيرة لا تناسبنا و لا تناسب ثقافتنا و لا مجتمعنا و بيئيتنا, و دى بعض الإقتراحات:
- رغيف عيش من بتاع التَومين و شوية ملح سياحات, و يحلفوا " و العيش و الملح " ..
- و هناك رأى إننا نوفر شوية الملح, و الزبون يمسك الرغيف و يحطه على عينيه و يقول " و النعمة دى على عينىّ " ..
- و فيه فكرة إننا نجيب نُص كوباية مايَّة, و الوزير يطرطَش بيها يمين و شمال و يقول " إنشالله دمى يطرطَش زى المايَّة دى " و أهو بالمرة يجيب شوية طراوة فى يومين الحر دُول ..
- و ممكن للزبون إنه يعكُش إيد الريس و يقول له " و شَبْكِة العشرة دُول ", و دى بقى ميزيتها إن الريِّس حا يساهم بخمس صوابع إيديه مع خمس صوابع الحلفجى ..
- و الفكرة الألاجة بقى إننا نجيب سوجارة و نولَّعها للزبون و يشد له نفس عميق غميق و يطلعه من مناخيره و يحط السوجارة فى وش الريس و يقول له " إنشالله عضمى يتحرق زى السوجارة دى " ..
- و أفتكر واحد صاحبى كانوا إختاروه فى وزارة و هو رايح يحلف قال للريس وقتها " و الله عيب لما تقول لى أحلف .. أنت مش مصدقنى يا جدع ؟ " ..
- و أعرف واحد راح يحلف قال " إنشالله أتشّل لو قَلِّيت معاك يا كبير " و بالرغم إنه كان راجل واطى و كرشه كبير و إنه عمل بلاوى كتيرة, لكنه لا إتشَّل و لا حاجة لإنه لما حلف نيته ما كانتش خالصة ..
- و واحد راح يحلف قال إيه قال " وحياة عيالى " و هو مش متجوز أصلاً, و بسببه نزل قرار جمهورى بالتقصى عن كل واحد حا يحلف بحياة عيالة و شرط إنه يجيب عيالة معاه ..
- و واحد تانى أونطجى قال إيه حلف و قال " و حياة أمى ", فالريس قال له: حياة أمك إيه ياض ؟ أنت حا تشتغلنى, إنت نسيت إنى حضرت دفنتها من خمستاشر سنة ..
- و واحد و هو بيحلف, الريس بص لعينيه و قال له إمشى يا كداب يا واطى يا إبن الـ ..... ده إنت لو حلفت لى على المايَّة تجمد, برضه مش حا أشغلك معايا, أصله كان راجل عينه زايغة و فضيحة زى المنيل على عينه إللى فى يوم أغبر كان رئيس لمصر ..
و كل حِلفان و إحنا طيبين

#أيمن_غالى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل