فلاح كفر الهنادوة هو إللى صح

أيمن غالى

الحوار المتمدن-العدد: 5855 - 2018 / 4 / 24 - 15:57
المحور: دراسات وابحاث في التاريخ والتراث واللغات
    

فى تمانينات القرن الماضى تواجدت مع مجموعة قاهرية؛ واحد منهم سألنى عن سعر إحدى السلع؛ فقلت له: بتلاتة جِنِى ( جنيه يعنى )؛ لقيته قهقه و وقع على ضهره من القهقهة, و يرجع يعيد السؤال و أنا أجاوب و هو يقهقه, و إستدار ليسألنى أمام باقى المجموعة القاهرية و يعيد السؤال و أنا أعيد الإجابة و الكل يقهقه ..
إكتشفت إنهم إكتشفوا فلاح كفر الهنادوة الحقيقى ( أحد أهم شخصيات كاريكاتير جريدة الأخبار المصرية ) و أخدوها فرصة للقهقهة ..
سألتهم سؤال القروى الساذج: هو فيه إيه ؟ هو السعر بيزغزغ ليه كده ؟!!
قالوا لى: إسمه جنيه مش جِنِى
و من يومها و أنا أخدت على نفسى عهد إنى أعيش فى جلباب فلاح كفر الهنادوة و قررت عدم التخلى عن كلمة " جِنِى " السكندرية و ليقهقه المتقهقهون و المتقهقهات ..
طيب؛ يا ترى و يا هل ترى مين إللى صح فى نطق الكلمة؛ فلاح كفر الهنادوة ( إللى هو أنا ) وَلَّا المتقهقهون القاهريون ؟

عملتنا المصرية مكتوب عليها بحروف عربية " Genēh جنيه " و مكتوب ترجمتها بالإنجليزية " Pound "؛ مع العلم إنه لا علاقة بين الجنيه و الباوند ( و غير متساويين فى القيمة ) .. يعنى الترجمة غير صحيحة ..
لَمَّا نشوف هجاء كلمة " جنيه " فى الإنجليزية؛ حا نلاقيها Guinea؛ بنفس النطق الإسكندرانى " جِنِى Geni " ..
و إللى بنقول عليه جنيه إسترلينى Sterling Pound؛ إسمه باوند مش جنيه Guinea ..
طيب إيه حكاية الجِنِى Guinea ده ؟
لو شوفنا هجاء الكلمة Guinea؛ حا نلاقيها هى نفسها هجاء إسم دولة " غينيا " الأفريقية ..
طيب إيه علاقة " الجِنِى المصرى " بغينيا ؟
أخد إسم " الجِنِى Guinea " من غينيا الأفريقية لأنها كانت من أهم مصادر الذهب المستخدم فى صناعة هذه العملة ..
الجِنِى الإنجليزى كان عبارة عن عُملة ذهبية تم صناعتها فى 6 فبراير 1663 من ذهب عيار 22 قيراط؛ وزنه 8.385 جم .. و كان وقتها الجِنِى بيساوى 20 شلن shillings إنجليزى, و مع الوقت زاد سعره لغاية 30 شلن إلى أن إستقر عند 21 شلن فى الفترة 1717 - 1816
يعنى الجِنِى Guinea كان بيساوى باوند إنجليزى + شلن؛ أو باوند و خمس بنسات ..
توقف التعامل بالـ Guinea فى بداية القرن الـ 19, و فى النصف التانى من القرن الـ 19 إستعمل المصريين كلمة الـ Guinea لَمَّا تصادف إن قيمته تساوت مع الـ 100 قرش مصرى ..
يعنى مثلا نتذكر تعبير النص فرنك إللى كان بيتقال على الـ 20 مليم مصرى ( قرشين )؛ لأنه وقتها كان الفرنك الفرنسى يساوى 4 قروش مصرية, و هكذا للشلن إللى إستخدمناه و أطلقناه على الـ 5 قروش مصرية لأنها كانت بتساوى قيمة shillings الشلن الإنجليزى
و إللى يهمنا دلوقتى عُملتنا المصرية و إللى قيمتها 100 قرش؛ إسمها Genēh جنيه حسب كتابتها على العُملة وَلَّا جِنِى Geni حسب النطق الإسكندرانى و الإنجليزى Guinea, وَلَّا نرجَّعه لأصله و نسميه غينيا ؟

خلاصة الكلام ..
الإسكندرانية نُطقهم هو إللى صح - للعملة المصرية - و فلاح كفر الهنادوة هو إللى صح ..

#أيمن_غالى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل