مصر القديمة كان إسمها كيمى مش كيميت

أيمن غالى

الحوار المتمدن-العدد: 5767 - 2018 / 1 / 24 - 13:17
المحور: دراسات وابحاث في التاريخ والتراث واللغات
    

مصر فى الكتابات المصرية القديمة كانت مكتوبة - زى كل الكتابات القديمة - بحرفين ساكنين " ك م km " بدون حروف عِلة / حركة ( من مد و كسر و ضم؛ يعنى بدون ضبط ), و بالتالى ما نقدرش نقرا الإسم و لا نعرف كيفية نطقه زى أى كلمة فى اللغة المصرية القديمة و جميع اللغات القديمة إللى كانت بدون حروف متحركة ..
و الجذر " كم " موجود فى المصرية القديمة و الحبشية و الأمازيغية و إللى هم من نفس الجذر اللغوى؛ بمعنى إسود ..
و إستخدام الجذر " كم " فى تسمية إسم مصر قديما راجع لكون أرضها مكتسية بطمى النيل الأسود اللون بعكس ما حولها من بلاد عُرفت ببلاد الرمال ..
حا ييجى إللى يقول إن إسم مصر فى النقوش المصرية القديمة مكتوبة بتلات حروف " ك م ت kmt " مش إتنين زى ما أنا بأقول, و بالتالى إسمها حا يكون " كِمِت kemet " بكسر جميع الحروف كالإصطلاح المتبع فى قراءة جميع الكتابات الهيروغليفية ..
و أنا فى رأيى إن حرف التاء التالت فى إسم مصر؛ حرف غير منطوق يفيد التأنيث ( مُخصص ), و حا نلاقى مراجع لغوية كتيرة كاتبة إسم مصر بالطريقة دى " km.t "؛ حاطين نقطة قبل حرف الـ t؛ للدلالة على كونه حرف غير أساسى فى نطق الإسم ..
طيب؛ و نعرف منين و نتأكد إزاى إن كان حرف الـ t مش من أصل الكلمة و إنه مخصص تأنيث ؟
هنا بقى للتأكيد و للفصل فى الحكاية دى؛ ضرورى نرجع للغة القبطية و إللى هى إمتداد المصرية القديمة فى تعديل و إختصار عدد و أشكال الحروف القديمة مع إضافة حروف الحركة من مد و كسر و ضم و فتح ( و ده إللى إتبعه شامبوليون فى بداية فرضيته فى كون القبطية هى الإمتداد الطبيعى للمصرية القديمة و مقابلته للكتابات الهيروغليفية بالقبطية ) ..
فى القبطية و إللى لهجاتها - حسب الإكتشافات لغاية النهاردة - تتعدى الـ 15 لهجة أساسية غير اللهجات الفرعية ( يعنى اللهجة القبطية الفيومية كمثل لها أكتر من 5 لهجات فرعية )؛ حا نلاقى إسم مصر من أربع حروف و أحيانا خمسة [ كيمى ] مع تعدد إختلافات حروف الحركة من كسرة خفيفة " i " و كسرة مكسورة " تقيلة ii أو y " أو كسرة مفتوحة " E كنطق حرف الـ e فى الفرنسية " مع ثبات وجود الحرفين الساكنين " ك م " كما فى الكتابات القديمة ..
و كتير من الكلمات فى المصرية القديمة و إللى ما كُنَّاش نعرف لها معنى؛ قدرنا نعرف معانيها عن طريق مقابلتها بالحروف الساكنة للكلمات القبطية و تجريدها من حروفها المتحركة ..
يعنى إسم مصر القديم منذ فجر التاريخ كان إسمها " كيمى " و أجدادنا كانوا بينطقوها " كيمى مش كيميت " و كانت بتتكتب " ك م km " مع إضافة حرف " ت t " كمخصص - علامة - تأنيث؛ لتوضيح تأنيث الكلمة و لتمييزها عن " km " بمعنى اللون الأسود أو شئ أسود اللون ..

سأقوم بإعادة كتابة البحث و تنقيحه بالنقوش و الكتابات المختلفة و المراجع .. المقال مكتوب باللغة المصرية الحديثة و سأقوم بإعادة نشره باللغة العربية

#أيمن_غالى (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل