عودة قوم عاد

أيمن غالى

الحوار المتمدن-العدد: 5834 - 2018 / 4 / 3 - 23:27
المحور: كتابات ساخرة
    

فيه مجموعة من جهابزة التخلف – إستكتروا علينا كوننا أحفاد صُناع أفضل و أعظم حضارات التاريخ - أتحفونا بنظرياتهم فى كون المصريين القدماء جاءوا من خارجها؛ من بلاد أخرى أو من كوكب آخر و إحتمال كبير من مجرَّة أخرى غير مجرَّة درب التبانة ..
قعدوا شوية قرون؛ بنوا فيها الأهرام و المعابد و مقابر إللى مات منهم, و شخبطوا شوية شخابيط – مالهاش معنى – على الحوايط, و فجأة .. بَح
لا نعرف مشيوا ليه و لا نعرف راحوا فين و لا جايين تانى وَلَّا لأ ..
و فيه فئة أكثر تخلفاً؛ طَشُّونا مؤخرا بنظريتهم إللى بتقول إن قوم عاد هم من سكنوا مصر لفترة؛ بنوا فيها الأهرام و طفشوا ( و فى قول آخر و خلعوا ) قبل ما يموت منهم واحد " ما هو إحنا ما لقيناش و لا حتى جثة وحيدة لواحد منهم " ..
و كعادة أصحاب نظريات التخلف فى كل زمان و مكان؛ إنه يتحفك بنظريته المتخلفة بدون لا فرضيات و لا مفردات و لا أدلة و لا براهين, و يكفى إنه يقول لك إنه جاله طيف فى المنام لابس أبيض فى أبيض و له أربع رجلين و ديل و ودان طويلة, و عمل ودانه مَبوَّلة و دلدق له فيها الكلمتين دول ..

يا ترى الكائنات الفضائية دى جات لنا إزاى ؟ يعنى مثلا نزلوا لنا مع زخَّات الشهب و النيازك وَلَّا مع المطر وَلَّا جرفتهم مياه فيضان نهر النيل إللى وقتها كان نابع من كوكب " حبظلم " قبل ما يتم تحويل منابعه لمنابعه الحالية من بحيرة فيكتوريا و هضبة الحبشة, وَلَّا جرَّفِتهم رياح الخماسين الغربية إللى بتيجى لنا من الصحرا الغربية, وَلَّا مع الرياح الجنوبية الغربية إللى بتجيب لنا الجراد كل سنة من اليمن و شمال السودان ؟!!
و هل ممكن أحد المذنبات و هو داير يلف بين كواكب المجرَّة يكون جابهم فى إيديه, و حدفهم عندنا, و رجع بعد كام ألف سنة و أخدهم تانى لمكان تانى ؟
طيب؛ نستبعد حكاية الكائنات الفضائية دول و نشوف حكاية قوم عاد إللى طلعوا لنا زى الدِمِّل فى القفا ..
طيب قوم عاد دول جُم لنا من أنهى داهية ؟!! طيب؛ راحوا فى أنهى داهية ؟!!
طيب؛ ما فيش منهم واحد مات نشوف جثته و نشوف طوله و عرضه إللى قالوا لنا عليه و إنهم من ضخامتهم كانوا بياكلوا عيال صُغَيَّرَة ؟
هل ما لقيناش وَلَّا جثة لواحد منهم بسبب سِلو الجماعة بتوع قوم عاد فى إن جثة الواحد منهم كانت بتتبخر بعد موته أو إنهم كانوا بياكلوا جثة إللى يموت منهم حتتك بتتك بلحمه و شحمه و عضمه و هدومه كمان ؟ وَلَّا كانت عاداتهم إنهم يحرقوا جثة إللى كان بيموت منهم بجاز وسخ علشان يوَلَّع و يِشَعلِل بسرعة ؟!!
طيب؛ ما شوفناش أى أثر لهباب حرق الجثث و لا هباب حرق الجاز الوسخ !!
بس للأمانة العلمية إحنا شامين النهاردة ريحة حرق الجاز الوسخ إللى شغَّالة بيه مواتير أمخاخ جهابزة التخلف إياهم ..

#أيمن_غالى (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات