زوريل العراق

حبيب العربنجي

الحوار المتمدن-العدد: 6413 - 2019 / 11 / 19 - 00:00
المحور: كتابات ساخرة
    

..........
من صدگ ما نعرف أوادمنا
رجّال تعب إلنا تعب وأسس مركز علمي متقدم يخلي معهد ماساتشوتس يلطم، هيچ رجال ما معبريه ولا ناطيه وزن كرشه ذهب في ميزان حسناته الوطنية، بس ميخالف هو من حزب زاهد في الدنيا وما تهمه من الدنيا غير وصخها، حزب إسلامي ينگط زهد من اللحية حتى القلاقيل، من وين ما تگلب أي واحد بيهم تلم كوشر زهد.
صدگ چذب
ولكم رجّال أسّس مركز علمي وتكنولوجي متطور بدون لا حس ولا خبر، وحتى لحد يصيب المركز بالحسد والعين بناه مو ببغداد، أصلاً من كثرة الخوف من الناس ياخذون الفكرة ويقلدوها سواه المركز إفتراضي مو حقيقي، يعني بحسب المصطلحات التكنولوجية والعلمية المركز ڤيرتشوال Virtual ماكو بالواقع، مركز سحابي، مو لازم أحچي بحسب لغة هذا الرجال الفلتة اللي كان هو زوريل العراق، تتذكرون زوريل وزير العلوم في حكومة فيگا الكبير في گريندايزر؟ هو هذا الصماخ زوريل العراق بحكومة فيگا العراق ، مع ذلك ما يريد لا مقابلات تلفزيونية ولا صورني وآني أضرب كلة بالنانو وأضرب تشريب پروتون ، إنما نخمطكم لخاطر العلم لا نريد منكم جزاءاً ولا شكوراً.
بس زوريل مالتنا من يخمط من أجل العلم ويخطط ما يعرف لا نانو ولا مايكرو، هو يتعامل بالميگا ، إيده ومليار ما شاءالله وما شاء فعل، وشلون فعل من مؤذن جامع إلى وزير علوم وتكنولوجيا، مو الآذان يحتاج له قياسات تكنولوجية متقدمة في الإنتقال من مقام الصبا إلى مقام النهاوند بسلاسة دون الإضرار بمصلحة المصلين وهمين ضبط توقيت الصلاة والآذان يحتاج لقياس وقت بدقة نانوية طيحان حظية. زوريل العراق كريم من أجل العلم، ما عنده شبر وشبرين، من هاي أخذ سلفة، سلفة قرضة حسنة بحسب أدبيات حزبه الديني، قرضة حسنة بواحد وستين مليار دولار لبناء مشروعه العلمي في مدينة معروفة بعلم الوضوء وإدارة صرفيات الماي في عملية المضمضة بشرط ما تتحرك الشوارب وأنت تمضمض لأن ذلك من أسباب بطلان الوضوء.
واحد وستين مليار دينار كلفة المشروع، الرفيق زوريل العراق سحب واحد ستين مليار دينار لتأسيس مشروعه العلمي النهضوي، لدرجة حتى التفلة راح يغلفها بالكلينكس حتى المتفول به ما ينحرج من واحد يتفل بوجهه ويدور كلينكس في لحظة قذف البلغم، لا التفلة تجي محترمة وياها كلينكس معطر، أفضل إختراع علمي في تاريخ البلغم، إضافة لتطوير الآذان، أول ما يصير وكت الصلاة تجيك ترددات والواتساب يقفل والأنترنت ينقطع حتى مو تجيك رسالة من الشيطان وأنت تصلي. مشاريع مستقبلية عابرة للأخلاق والوطنية ومشبعة بهلوسة الدراويش.
هسة عوفوا الرجّال بحاله ترى مو ذنبه إذا أنتو جهلة جهلة جهلة ( تكررها ثلاثاً بعد كل تشريب إذا البصل ماكو أو بعد كل مرة ينطفي النت)، شنو ذنبه إذا أنتو ما تعرفون المشاريع الإفتراضية وعبالكم كل مشروع لازم ينفذ في الواقع؟ روحوا شوفوا شلون واحد إشترى فستان إفتراضي لزوجته بتسعة ألاف دولار حتى تتصور بهذا الفستان من غير ما تلبسه، فستان ما موجود بالواقع، هيچ صار العلم والتكنولوجيا، وزوريل مالنا راح جاب إلنا هاي الفكرة وأسس مركز إفتراضي وتالي نتهمه بالسرقة وخمط السلفة؟ حاشا لله ما هذا البهتان والإفك المبين. عيوني روحوا ثقفوا نفسكم بعدين تعالوا نتحاسب. مو تريدون تتطورون؟ عبالكم المشاريع ما تتطور؟ ولكم هسة ماكو مشروع تشوفوه بعيونكم، بل تحسوه بضميركم وهذا هو المهم. ماكو لا مصنع ولا مركز أبحاث، كل شي إحساس، تگعد وتحس عدنا مصانع وعدنا مراكز، وإذا ما تحس راجع أقرب عيادة طبيب حساسية وعلاجك مدفوع من ميزانية وزارة العلوم والتكنولوجيا سابقاً- وزارة أكل هوا حالياً، والهستامين تستلمه من أقرب تكية. بس نصيحة نانوية، ترى مو كل علم مفهوم، عوفوا المشاريع الإفتراضية بحالها، فضحتونا وي الوادم وفشلة من بيل گيتس. سكتوا رحمة على النانو.

#حبيب_العربنجي (هاشتاغ)      

---

ترجم الموضوع إلى لغات أخرى - Translate the topic into other languages

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل