فأخذتهم الدعشة وهم غافلون

حبيب العربنجي

الحوار المتمدن-العدد: 4476 - 2014 / 6 / 8 - 18:33
المحور: كتابات ساخرة
    

الناس وين تمشي؟؟ لا جديات ترى سؤال محيرني، مو المفروض الناس تمشي بالشارع؟ والشوارع يا إما مبلطة بالأسفلت ويا إما سيان ماركة عراقنا، وبالحالتين مرئية شوفة العينتين إللي ياكلهن الدود من هسة !
وفي حال أكو ناس الله مفضل عليهم وما يرهم يمشون بالشارع، فهذولة يطيرون يا إما بالطيارة أو الهليكوپتر أو بدعاء أبو علي الشيباني أو دعاء المعممين والملتحين، فدعاء واحد من هذولة يعادل قوة دفع أربعة توربينات رولز رويس بحسب وثيقة حوزيو في درس ديناميك الهواء. وبهاي الحالة همين ينشافون لو نسمع عفاطهم من يمرون من فوگانا !
وما أعتقد أكو ناس يمشون جوة الگاع عدنا في العراق الأبي الديمقراطي لأن إحنا نشگ الگاع ونعرف منو موجود هناك، عدنا خرفان يشگون الگاع بالباع وإحنا نشگها بالزواع، وبعدين جوة الگاع مالتنا خياسة ونزيزة وإحنا مثل ما تعرفون شعب أبي وأمي ما نقبل نصير بالخياس، وحتى من نموت نطشر ما نندفن لأن ما نقبل تلمنا الگاع الخايسة، يعني هاي الفرضية مال ناس يمشون جوة الگاع سولفوها للدبة.
خوش بوش !
ومثل ما أعرف شوارعنا بيها سيطرات أكثر من أنظمة السيطرة في مفاعل نووي من الجيل الرابع إلى درجة أن الشغل واگف بسيطراتنا وكل سيطرة تتعارك وي السيطرة إللي قبلها وبعدها بسبب الشغل ، وهذولة هم يگولون عن نفسهم (عيون ساهرة) ! وبگلبي حسرة أريد أعرفها ساهرة وأعتب عليها وعلى عيونها لان صايرة هواية تفلت هالأيام، يجوز كبرت ومحتاجة عملية ليزك لإعادة نشاط العين ! هسة گولي ونصرف لچ من صندوق المنفعة الشخصية بس مو تضربينا خازوق وإحنا نگول ناموا رغد ورنا وحلا لأن عيون ساهرة موجودة! تالي طلعت ساهرة نايمة صفح وإحنا ما ندري، يا حيف عليچ يا سوسو.
وبعدين شوارعنا مزدحمة لأن كل يوم عدنا عيد، وإحنا العراقيين ننطي موعد نتشاوف وي الناس إللي نحبهم بالشارع، لأن كلنا ولد شوارع ، والشوارع تعرفنا وإحنا وياها عمر منثور فوگ الطسات إللي نتغزل بيها مثل شامة على خد حبيبة سمرة، يعني مال الشوارع تلعب ويانا وتخوننا هاي همين عالدبة، شغلة ما تخش لا بالعقل ولا بغير مكان ما أگول لإعتبارات + 18 .
لعد هذولة منين وشلون يفوتون من مدينة لمدينة وما حد يشوفهم ؟؟؟
ولكم حتى گريندايزر ما چان مركب مخفي ولا حتى باربا الشاطر ولا عدنان وعبسي ، بس نوبات سازوكي چان يصير إنفزيبل بس بتصرف شخصي وعمرنا ما شفنا سازوكي سوى كل جيش النينجا إنفزيبل على عناد هانزو ! أو يجوز دا يلبسون طاقية الإخفاء ومن هاااااي الحكومة سوت عملية إستراتيجية بخطة عسكرية محكمة حكم للقبض على خياط داعش ! عملية طلبت سانت هيرست وويست پوينت بطلب رسمي من القيادة العراقية إدراجها في مناهج دروس الميدان والقيادة الگلگلية بإعتبارها تخص الخياطين ! حتى بعد ماكو خياطة طاقية الإخفاء...گبرررررررررررر لمكم نفر نفر...وحتى نص نفر وي شيش طماطة شوي !
ولكم شنو السالفة !!
أشو هيتة للضالين، منو وشنو وشلون ومن وين...أسئلة توگع علينا مثل التفلة القذرة، ونريد نعرف الجواب بس تزداد التفلة كثافة ، أقصد الأسئلة . وأكو شغلة اللخ، هذولة تگولون من جنسيات تونسية وليبية وسورية وسعودية وسورية، ميخالف وآني أتفق، بس نعرف أن اللهجة العراقي مجعمرة وما حد يجيبها حتى لو يجي التونسي ويظل عشرين سنة بالعراق، ذاك هو تونسي من يحچي برشة برشة نعرفه، إي هسة هذا شلون دا يفتر من مدينة لمدينة ولا حد يعرفه هو تونسي لو مغربي كله قاق وقيق أو سوري وتكرم عينك خيو !
يابة..أروح إلكم فدوة
ترى مللينا من الچذب، وقبل چنا ننتظر واحد نيسان حتى نچذب چذبة، وهسة صرنا ننتظر العمر كله حتى نسمع إلنا حچاية وحدة صادقة، رحمة لذاك الأب إذا أنتو مو نغولة، ورحمة على ذيچ الماما إذا أنتو نغولة، فكوا ياخة من عدنا، وهاي دعوة مخلصة لكل عراقي بعد لا يلبس قميص أبو الياخة ولا تي شيرت أبو الياخة، خلونا نفتر بالفانيلات التعلاگة بلكن بعد ما يگدرون يچلبون بياخاتنا...ترى صدگ مدعوشين دعشة ما صايرة...من وين وشلون...!!
يا رب..
صدگ إحنا مو خوش ونستاهل تفلة عالگصة...بس ما چنا نظن راح تاخدنا الدعشة ونحن غافلون ! غفرانك!
ممكن أگول والله الموفج لو أخاف زعلان !!!

#حبيب_العربنجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات